سوڭعى جىلدارى قوعامدا كوزگە كورىنبەي قالىپتاسقان جاڭا قۇبىلىس بار. ول – «جۇرتقا كورسەتۋ ءۇشىن ءومىر ءسۇرۋ» مادەنيەتى. الەۋمەتتىك جەلىدە قىمبات كولىكپەن تۇسكەن سۋرەت، ءساندى مەيرامحاناداعى كەشكى اس، برەند كيىمدەر، نەسيەگە الىنعان تەلەفون مەن توي-دۋمان - «ءساتتى ءومىردىڭ» ولشەمىنە اينالىپ بارادى. وكىنىشكە قاراي، وسى جاساندى جارىس جاستاردىڭ ساناسىنا قاتتى اسەر ەتۋدە.

الماتىداعى كوميۋنيتي ورتالىقتاردا باستالعان «جاستار ىسىراپشىلدىققا قارسى. ۇنەم – سانا – مادەنيەت» جوباسى ءدال وسى ماسەلەنى كوتەرىپ وتىر. جوبا اياسىندا جاستارمەن كەزدەسۋلەر ۇيىمداستىرىلىپ، ارتىق شىعىن، الەۋمەتتىك جەلىنىڭ ىقپالى، نەسيەگە ءومىر ءسۇرۋ جانە رەسۋرستاردى ىسىراپ ەتۋ ماسەلەلەرى تالقىلانۋدا. بۇل – جاي عانا ترەنينگ ەمەس. بۇل – قازىرگى قوعامداعى اسا ماڭىزدى مادەني ءارى پسيحولوگيالىق ماسەلە تۋرالى اشىق اڭگىمە.

ىسىراپشىلدىق سانگە اينالىپ بارا ما؟

بۇگىندە كەي جاستار تابىسىنان بۇرىن «كورىنىسىنە» اقشا جۇمسايدى. ءبىرى سوڭعى ۇلگىدەگى تەلەفون الۋ ءۇشىن نەسيە راسىمدەيدى، ەندى ءبىرى توي نەمەسە دەمالىس ءۇشىن قارىزعا كىرەدى. الەۋمەتتىك جەلىدەگى قىسىم ادامداردى «باسقادان كەم كورىنبەۋگە» يتەرمەلەيدى. بىراق ەكرانداعى جىلتىر ءومىردىڭ ارتىندا كوبىنە قارجىلىق قيىندىق، پسيحولوگيالىق كۇيزەلىس جانە جاساندى باقىت تۇرادى. ەڭ قاۋىپتىسى – جاستاردىڭ شىنايى ءومىر مەن الەۋمەتتىك جەلىدەگى ءومىردى شاتاستىرا باستاۋى. Instagram مەن TikTok-تاعى قىسقا ۆيدەولار ادامداردىڭ ءومىرىن تولىق كورسەتپەيدى. كوپ جاعدايدا ول – ارنايى دايىندالعان كورىنىس، مونتاجدالعان ەموتسيا، ۋاقىتشا اسەر عانا.

وتىرىك كوۋچتار كوبەيگەن زامان

الەۋمەتتىك جەلىمەن بىرگە تاعى ءبىر قاۋىپتى قۇبىلىس قاتار ءوستى. ول – جالعان موتيۆاتسيالىق كوۋچتار مەن «وڭاي بايىپ كەتۋدىڭ جولىن» ساتاتىن پسەۆدو-ماماندار.

قازىر ينتەرنەتتە «ءبىر ايدا ميلليون تاپ»، «ەشتەڭە ىستەمەي اقشا تاپ»، «باي ادامنىڭ ساناسىن اشامىن» دەگەن ۋادەلەر كوبەيدى. كەي جاستار سوڭعى اقشاسىن وسىنداي كۋرستارعا جۇمساپ، الدانىپ قالىپ جاتادى. وكىنىشكە قاراي، ولاردىڭ كوبى كاسىبي ەكونوميست تە، پسيحولوگ تا، كاسىپكەر دە ەمەس. بىراق الەۋمەتتىك جەلىدەگى ادەمى كەڭسە، جالعا الىنعان كولىك پەن جاساندى وبراز ارقىلى ءوزىن تابىستى ادام رەتىندە كورسەتەدى. ناعىز ءبىلىم مەن ەڭبەك ەشقاشان ءبىر كۇندە ناتيجە بەرمەيدى. تۇراقتى تابىس – ءتارتىپتىڭ، ەڭبەكتىڭ جانە ۋاقىتتىڭ جەمىسى.

ۇنەمشىلدىك – كەدەيلىكتىڭ ەمەس، پاراساتتىڭ بەلگىسى

كەي ادامدار ۇنەمشىلدىكتى «اقشا قيماۋ» نەمەسە «كەدەيلىك» دەپ تۇسىنەدى. شىن مانىندە، ۇنەم – سانالى ءومىر ءسۇرۋ مادەنيەتى. سۋ مەن ەلەكتر قۋاتىن بوسقا جاقپاۋ، قاجەتسىز زات ساتىپ الماۋ، قارجىنى جوسپارلاۋ، تاماقتى ىسىراپ ەتپەۋ – بۇل تەك ەكونوميكالىق ەمەس، ادامگەرشىلىك ماسەلە. دامىعان ەلدەردىڭ كوپشىلىگىندە ۇنەمشىلدىك جوعارى مادەنيەت رەتىندە قابىلدانادى. ويتكەنى رەسۋرس شەكسىز ەمەس. سۋ، ۋاقىت، اقشا، ەنەرگيا – بارلىعى جاۋاپكەرشىلىكپەن جۇمسالۋى كەرەك. الماتىداعى جاستار جوباسىنىڭ باستى ەرەكشەلىگى دە وسىندا. قاتىسۋشىلار كۇندەلىكتى ومىردەگى قاراپايىم ادەتتەرگە جاڭاشا قاراۋدى ۇيرەنۋدە. سۋ ۇنەمدەۋ، ەلەكتر قۋاتىن ءتيىمدى پايدالانۋ، قارجىعا سانالى كوزقاراس قالىپتاستىرۋ سياقتى ماسەلەلەردىڭ بارلىعى بولاشاق قوعامنىڭ مادەنيەتىن قالىپتاستىرادى.

شىنايى ءومىر ساننەن ماڭىزدى

قازىرگى جاستارعا ەڭ كەرەگى – جالعان وبراز ەمەس، شىنايى ءومىردىڭ قۇنىن ءتۇسىنۋ. ادامنىڭ باعاسى كيىمىندە، كولىگىندە نەمەسە الەۋمەتتىك جەلىدەگى سۋرەتىندە ەمەس. ناعىز جەتىستىك – تۇراقتى بىلىمدە، ادال ەڭبەكتە جانە رۋحاني تەپە-تەڭدىكتە. ءسان قۋىپ ءومىر سۇرگەن قوعام ەرتە مە، كەش پە شارشايدى. ال سانالى تۇتىنۋدى ۇيرەنگەن قوعام ۇزاق مەرزىمدە تۇراقتى ءارى باقىتتى ءومىر سۇرەدى. سوندىقتان ىسىراپشىلدىققا قارسى مادەنيەت قالىپتاستىرۋ – تەك ەكونوميكالىق ماسەلە ەمەس، بۇل – ۇلتتىڭ ويلاۋ جۇيەسىنە قاتىستى ماسەلە. جاستار «كورىنۋ ءۇشىن ءومىر سۇرۋدەن» گورى، ماعىنالى ءومىر ءسۇرۋدى تاڭداعاندا عانا قوعام وزگەرەدى.

Abai.kz