بۇگىن وبلىس اكىمى بەيبىت يساباەۆ مادەنيەت جانە ونەر قىزمەتكەرلەرىنىڭ كۇنىنە وراي جەتىسۋدا بىرقاتار سالا ماماندارىنا مەملەكەتتىك ناگرادالار تابىستادى. سول سياقتى مادەنيەت مەكەمەلەرى التى نوميناتسيا بويىنشا ماراپاتتالىپ، «ۇزدىك وبلىستىق مادەنيەت مەكەمەسى» اتانعان حالىق شىعارماشىلىعى ورتالىعىنا جەڭىل اۆتوكولىكتىڭ كىلتى تابىستالدى. وسى كۇنى جالپى سانى 50-دەن استام قىزمەتكەرگە ءتۇرلى دەڭگەيدەگى ماراپات بەرىلدى، - دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.   

تالدىقورعانداعى بيكەن ريموۆا اتىنداعى اكادەميالىق دراما تەاترىندا وتكەن سالتاناتتى جيىندا سالا ماماندارىن قۇتتىقتاعان ءوڭىر باسشىسى مادەنيەت پەن ونەردىڭ قوعام ومىرىندەگى ماڭىزىن تىلگە تيەك ەتىپ، وبلىستا اتالعان سالانى قولداۋ شارالارىنا كەڭىنەن توقتالىپ ءوتتى.

- بۇگىنگى كۇنى زامانعا ساي ءورىسى كەڭەيگەن رۋحانيات سالاسى سوناۋ كونە عاسىرلار قويناۋىنان تامىر تارتادى. داۋىرلەردى جالعاعان، داستۇرلەردى ۇزبەگەن حالىقتىڭ ءتول تانىمى دا وسى مادەنيەت پەن ونەردە جاتىر. بۇل رەتتە ۇلت رۋحانياتىنىڭ وركەندەۋىنە، مادەني مۇرانى ساقتاۋ مەن ناسيحاتتاۋعا ولشەۋسىز ۇلەس قوسىپ كەلە جاتقان مادەنيەت جانە ونەر سالاسى قىزمەتكەرلەرىنىڭ ەڭبەكتەرى ەرەكشە. ەلىمىزدىڭ مادەني، رۋحاني ومىرىنە جاڭا ءورىس، دەم بەرىپ، جارقىن ىستەردىڭ ۇيىتقىسى بولىپ، ارقاشان دا بيىكتەن كورىنۋلەرىڭىزگە تىلەكتەسپىن، - دەگەن  ب.يساباەۆ سالانىڭ دامۋىنا ەڭبەك سىڭىرگەن بىرقاتار قىزمەتكەرلەرگە مەملەكەتتىك ناگرادالار تاپسىردى.

اتاپ ايتقاندا، د. راقىشەۆ اتىنداعى وبلىستىق فيلارمونيانىڭ ەسترادالىق-سيمفونيالىق وركەسترىنىڭ اسپاپشى ءارتىسى ومىرسەرىك اراپوۆقا «قۇرمەت» وردەنى، ءىلياس جانسۇگىروۆ اتىنداعى مادەنيەت سارايىنىڭ «ارداگەرلەر» ءانسامبلىنىڭ كوركەمدىك جەتەكشىسى ازات قۇرساباەۆ پەن تالدىقورعان قالاسىنىڭ مادەنيەت جانە تىلدەردى دامىتۋ ءبولىمىنىڭ باسشىسى ەلميرا مۇقىشەۆاعا «مادەنيەت سالاسىنىڭ ۇزدىگى» توسبەلگىسى تابىستالدى.

سونىمەن قاتار «ۇزدىك حالىق تەاترى» نوميناتسياسى پانفيلوۆ اۋداندىق دانەش راقىشەۆ اتىنداعى حالىق تەاترىنا، «ۇزدىك حالىقتىق، ۇلگىلى اتاعى بار ۇجىم» اتالىمى قاراتال اۋدانىنداعى «قىزعالداقتار» ۆوكالدىق توبىنا بەرىلسە، كوكسۋ اۋداندىق مادەنيەت ءۇيى «ۇزدىك مادەنيەت ءۇيى»، الاكول اۋدانىنداعى لەپسى تاريحي مۋزەيى «ۇزدىك مۋزەي»، اقسۋ اۋداندىق كىتاپحاناسى «ۇزدىك كىتاپحانا» اتاندى. ولاردىڭ بارىنە اقشالاي سىيلىق سەرتيفيكاتتارى بەرىلدى. ال ۇزدىك وبلىستىق مادەنيەت مەكەمەسى دەپ تانىلعان وبلىستىق حالىق شىعارماشىلىعى ورتالىعىنا جەڭىل اۆتوكولىكتىڭ كىلتى تابىستالدى.

ماراپاتتالۋشىلار اتىنان ءسوز سويلەگەن ومىرسەرىك اراپوۆ ارىپتەستەرىن كاسىبي مەرەكەمەن قۇتتىقتاپ، وبلىستا مادەنيەت سالاسىنا كورسەتىپ وتىرعان قولداۋلار ءۇشىن العىسىن ءبىلدىردى. سونداي-اق بۇل ماراپات وسى سالادا قىزمەت ەتىپ جۇرگەن بارشا مامانداردىڭ ەڭبەگىنە بەرىلگەن لايىقتى باعا دەپ بىلەتىنىن ايتتى.

«ۇزدىك مادەنيەت ءۇيى» اتانعان كوكسۋ اۋداندىق مادەنيەت ءۇيىنىڭ ديرەكتورى الىشەر جانعابىلوۆ ءوز پىكىرىن ءبىلدىردى:

- اۋدانىمىزدىڭ ونەرپازدارى بۇگىن ەرەكشە قۋانىش ۇستىندە. ءبىزدىڭ اۋداندا جالپى 12 مادەنيەت ءۇيى بار. ولاردا «كوكسۋ تولقىنى» ءانسامبلى، «اق كيمەشەك» اجەلەر ءانسامبلى، مۇقىرى حالىق تەاترى، بالالار وركەسترى سياقتى بىرنەشە شىعارماشىلىق ۇجىم جۇمىس ىستەيدى. ءبىزدىڭ اۋدان بىلتىر «جەر جانناتى جەتىسۋ» تەلەۆيزيالىق مادەني جوبادا باس جۇلدەنى يەلەندىك. وتكەن جىلى ءوڭىردىڭ مادەنيەت سالاسىنداعى بارلىق كورسەتكىشتەر بويىنشا تۇزىلەتىن رەيتينگىدە تالدىقورعان قالاسىنان كەيىنگى ەكىنشى ورىننان كورىندىك. بيىلعى جىلدىڭ دا باستاماسى جامان ەمەس. بۇل – ءبىزدىڭ ورتاق ەڭبەگىمىزدىڭ جەمىسى، - دەدى ول.

سول سياقتى «ۇزدىك مۋزەي» اتانعان الاكول اۋدانىنداعى لەپسى تاريحي مۋزەيىنىڭ مەڭگەرۋشىسى گۇلبارشىن مەرەەۆا دا وي قوستى:

- ءبىزدىڭ مۋزەيدىڭ تاريحى لەپسى اۋىلىنداعى جەرگىلىكتى ولكەتانۋشى مۋحارام ءحايبۋلليننىڭ باستاماسىمەن 2021 جىلى مەكتەپ ىشىندە قۇرىلعان شاعىن مۋزەيدەن باستالادى. كەيىن دەمەۋشىلەردىڭ كومەگىمەن مۋزەي جەكە عيماراتقا كوشىرىلىپ، قازىر بۇرىنعى لەپسى ۋەزىنىڭ تاريحىنان سىر شەرتەتىن ەكسپوناتتار ءبىرشاما تولىقتىرىلدى. مۋزەيدە 11 ادام جۇمىس ىستەيدى، ونىڭ 6-ۋى شىعارماشىلىق قىزمەتكەر. بۇگىن ەڭبەگىمىزدى باعالاپ، ارنايى اتالىمنىڭ جەڭىمپازى بولعانىمىزعا قۋانىشتىمىز، - دەدى گ. مەرەەۆا.

سالتاناتتى شارا مەرەكەلىك كونتسەرتپەن قورىتىندىلاندى.

ءبىر اتاپ وتەرلىگى، بۇگىن استانا قالاسىندا اقوردادا مۇقان تولەباەۆ اتىنداعى حالىق اسپاپتار وركەسترىنىڭ اسپاپشى-ءارتىسى ايناش قابىكەنوۆاعا «قۇرمەت» وردەنى، ال بيكەن ريموۆا اتىنداعى اكادەميالىق دراما تەاترىنىڭ ءارتىسى بازاربەك توقىمتاەۆقا «قازاقستاننىڭ ەڭبەك سىڭىرگەن قايراتكەرى» اتاعى تابىستالدى.

جالپى، جەتىسۋ وبلىسى قۇرىلعالى بەرى سالاعا كورسەتىلگەن قولداۋدىڭ ارقاسىندا مادەنيەت جانە ارحيۆ مەكەمەلەرىنىڭ شتات سانى 335 بىرلىككە ارتتى. ەلدى مەكەندەردە 32 مادەنيەت نىسانى ەل يگىلىگىنە بەرىلسە، جىل سوڭىنا دەيىن تاعى 5 مادەنيەت ءۇيىنىڭ قۇرىلىسى اياقتالىپ، ىسكە قوسىلادى. سونداي-اق سارىوزەك اۋىلىندا زاماناۋي كىتاپحانا سالىنۋدا. وعان قوسا تالدىقورعان قالاسىندا كوركەمونەر گالەرەياسى بازاسىندا زاماناۋي كرەاتيۆتى حاب اشىلادى. وتكەن جىلى ءوڭىر ونەرپازدارى ەلەۋلى تابىستارعا قول جەتكىزىپ، سونىڭ ىشىندە ەڭ ۇلكەن بەلەس – ب. ريموۆا اتىنداعى دراما تەاترىنا اكادەميالىق مارتەبە بەرىلگەن بولاتىن. سونىمەن قاتار وبلىستىڭ 14 كوركەمونەرپازدار ۇجىمى «حالىقتىق» ۇجىم اتاعىنا يە بولدى.

جەتىسۋ وبلىسى اكىمىنىڭ ءباسپاسوز قىزمەتى.

Abai.kz