اتىراۋدا سوڭعى كۇندەرى وزگە وڭىرلەردەن كەلگەن پاترۋلدىك كولىكتەردىڭ كۇرت كوبەيۋى تۇرعىندار اراسىندا قىزۋ تالقىعا ءتۇستى.

اسىرەسە الەۋمەتتىك جەلىلەردە جانە جۇرگىزۋشىلەر قاۋىمداستىقتارىندا ءتۇرلى بولجامدار تارالىپ، كەيبىر ازاماتتار جاپپاي تەكسەرۋلەر مەن رەيدتەر باستالدى دەپ الاڭداعان. قالا كوشەلەرىندە كەپتەلىس كۇشەيىپ، پوليتسيا توقتاتقان كولىكتەردىڭ ماڭىنا ادامدار جينالعانى دا بايقالدى.

وسىعان بايلانىستى اتىراۋ وبلىستىق پوليتسيا دەپارتامەنتى رەسمي تۇسىنىكتەمە بەردى.

ۆەدومستۆو مالىمەتىنشە، وڭىردە 21-23 مامىر ارالىعىندا «قۇقىقبۇزۋشىلىققا توسقاۋىل» جەدەل-پروفيلاكتيكالىق ءىس-شاراسى ءوتىپ جاتىر. وسىعان بايلانىستى اتىراۋعا استانا قالاسىنان، قاراعاندى جانە قوستاناي وبلىستارىنان قوسىمشا پوليتسيا كۇشتەرى تارتىلعان.

پوليتسيا دەپارتامەنتى بۇل شارانىڭ قانداي دا ءبىر كولىك يەلەرىنە نەمەسە بەلگىلى ءبىر ءنومىرلى اۆتوكولىكتەرگە قارسى باعىتتالماعانىن ەرەكشە اتاپ ءوتتى. تەكسەرۋ جۇمىستارى بارلىق جول قوزعالىسىنا قاتىسۋشىلارعا بىردەي جۇرگىزىلەدى.

ءىس-شارانىڭ نەگىزگى ماقساتى – جول قوزعالىسى ەرەجەلەرىن بۇزۋدىڭ الدىن الۋ، قوعامدىق قاۋىپسىزدىكتى قامتاماسىز ەتۋ جانە قۇقىقبۇزۋشىلىقتاردىڭ جولىن كەسۋ، – دەپ مالىمدەدى دەپارتامەنتتەن.

پوليتسيا قىزمەتكەرلەرى ماس كۇيىندە كولىك جۇرگىزۋ، جىلدامدىقتى اسىرۋ، قارسى جولاققا شىعۋ، جول قيىلىستارىنان ءوتۋ ەرەجەلەرىن بۇزۋ سەكىلدى قۇقىقبۇزۋشىلىقتارعا ەرەكشە نازار اۋدارادى.

اتىراۋ وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى قۇتتىباي سادىقوۆ بارلىق پروفيلاكتيكالىق شارا زاڭ اياسىندا جۇرگىزىلەتىنىن ايتىپ، تۇرعىنداردى جالعان اقپاراتقا سەنبەۋگە شاقىردى.

رەسمي مالىمەت بويىنشا، جەدەل-پروفيلاكتيكالىق ءىس-شارا 23 مامىردا اياقتالادى.

Abai.kz