19 ماۋسىمدا وتكەن سوت وتىرىسىندا توميريس قىدىربەكتىڭ اكەسى پاكتى كەشىرمەيتىنىن ايتىپ، ودان ەشقانداي اقشا المايتىنىن ايتقان.

سوت ءتوميريستىڭ اكەسىن جابىرلەنۋشى دەپ تانىعان. بۇعان دەيىن سوتتا مارقۇمنىڭ اناسى سوتتالۋشى پاكتى كەشىرىپ، ەشقانداي تالاپ-ارىزى جوعىن ايتقان.

پروكۋرور ءوتىنىشتى قاناعاتتاندىرۋدى سۇرادى.

ال الەكساندر پاكتىڭ ادۆوكاتى قارسىلىق ءبىلدىردى. ول توميريس قىدىربەكتىڭ اناسىنا وتەماقى تولەنگەنىن العا تارتتى. پاكتىڭ ءوزى ادۆوكاتىن قولدايتىنىن ايتتى.

ايىپتاۋ 

ايىپتاۋ اكتىسىنە سايكەس، 1993 جىلى تۋعان الەكساندر پاك جول اپاتى بولعان ءتۇنى جالعان مەملەكەتتىك ءنومىر تاعىلعان Zeekr X كولىگىن تىزگىندەپ، ءال-فارابي داڭعىلى بويىمەن باتىس باعىتتا كەلە جاتقان.

تەرگەۋ نۇسقاسىنا سايكەس، ول ماس كۇيدە بولعان، جول قوزعالىسى ەرەجەلەرىنىڭ بىردەن بىرنەشە تارماعىن بۇزعان، قاۋىپسىز جىلدامدىقتى ساقتاماعان، قارسى جولاققا شىعىپ كەتىپ، Mercedes-Benz C300 كولىگىمەن سوقتىعىسقان.

الەكساندر پاكتىڭ قانىنان 1,3 پروميللە الكوگول انىقتالعان. سونداي-اق سوتتىڭ اۆتوتەحنيكالىق ساراپتاما دەرەگىنشە، سوقتىعىس ساتىنە دەيىن Zeekr X كولىگىنىڭ جىلدامدىعى شامامەن ساعاتىنا 219 شاقىرىم بولعان.

– جول اپاتى سالدارىنان وقيعا ورنىندا Mercedes-Benz C300 كولىگىنىڭ جۇرگىزۋشىسى، 1996 جىلى تۋعان ەلامان تىلەمىسوۆ جانە ونىڭ ەكى جولاۋشىسى – 2003 جىلعى قۇمار تەڭەۋباەۆا مەن 2005 جىلى تۋعان توميريس قىدىربەك قازا تاپتى، – دەلىنگەن ايىپتاۋ اكتىسىندە.

كۇدىكتى الەكساندر پاككە قىلمىستىق كودەكستىڭ 345-1 4-بابى بويىنشا ايىپ تاعىلعان.

جول اپاتى

21 ناۋرىزدا الماتىداعى ءال-فارابي جانە مەڭدىقۇلوۆ كوشەلەرىنىڭ قيىلىسىندا Zeekr Xاۆتوكولىگى جولدىڭ قارسى بەتىنە شىعىپ كەتىپ، Mercedes-Benz C300  كولىگىمەن سوقتىعىسقان. جول اپاتىنان ءۇش ادام قازا تاپقان. بۇل وقيعا قوعامدا قىزۋ تالقىلانىپ، كەيىننەن قالالىق پوليتسيا دەپارتامەنتىنىڭ بىرنەشە لاۋازىمدى شەندىسى قىزمەتىنەن كەتكەن.

سول ۋاقىتتا جەلىدە ءال-فارابي كوشەسىندە قىمبات كولىكتەر مەملەكەتتىك ءنومىرىن اۋىستىرىپ، قالادا جارىس ۇيىمداستىرادى دەگەن اقپارات تاراعان.

Abai.kz