ەلىمىز 2026-2027 جىلدارى جەتى الەم چەمپيوناتىن وتكىزۋ قۇقىعىن جەڭىپ الدى

بيىل ەلىمىز كۇرەس تۇرلەرىنەن الەم چەمپيوناتىن قابىلداسا، 2027 جىلى وليمپيادالىق سپورت تۇرلەرى بويىنشا ۇستەل تەننيسى، دزيۋدو، بوكس، تاەكۆوندو، سونداي-اق كيبەرسپورت پەن شورت-ترەكتەن جاسوسپىرىمدەر اراسىنداعى الەم چەمپيوناتتارى ۇيىمداستىرىلادى.

ەلىمىزدە ءىرى حالىقارالىق سپورت جارىستارىن وتكىزۋ – مەملەكەت باسشىسىنىڭ سپورتتى دامىتۋ، ەلدىڭ حالىقارالىق بەدەلىن نىعايتۋ جانە قازاقستاندى وڭىردەگى جەتەكشى سپورت ورتالىقتارىنىڭ بىرىنە اينالدىرۋ جونىندەگى تاپسىرمالارىن جۇيەلى ىسكە اسىرۋدىڭ ناتيجەسى.

2027 جىلى الەم چەمپيوناتتارىنىڭ بارلىعى استانا قالاسىندا ۇيىمداستىرىلادى. اتاپ ايتقاندا، شورت-ترەكتەن جاسوسپىرىمدەر اراسىنداعى الەم چەمپيوناتى 28-31 قاڭتار ارالىعىندا، بوكستان الەم چەمپيوناتى 10-26 ساۋىردە، ۇستەل تەننيسىنەن الەم چەمپيوناتى 22-30 مامىردا، دزيۋدودان الەم چەمپيوناتى 7-14 ماۋسىمدا، ال تاەكۆوندودان الەم چەمپيوناتى 7-13 شىلدە كۇندەرى وتەدى. كيبەرسپورتتان الەم چەمپيوناتىنىڭ ناقتى مەرزىمى كەيىنىرەك جاريالانادى.

تاۋەلسىز قازاقستان تاريحىندا العاش رەت ەلىمىز ەكى جىل ىشىندە جەتى الەم چەمپيوناتىن وتكىزۋ قۇقىعىنا يە بولدى. بۇل – قازاقستاننىڭ سپورت ينفراقۇرىلىمى مەن ۇيىمداستىرۋشى الەۋەتىنىڭ جوعارى دەڭگەيدە ەكەنىن ايعاقتايتىن ماڭىزدى جەتىستىك. سونىمەن قاتار بۇل الەمدىك سپورت قاۋىمداستىعى الدىنداعى زور جاۋاپكەرشىلىكتى دە بىلدىرەدى.

الەم چەمپيوناتتارىنا دۇنيەجۇزىنىڭ ەڭ ۇزدىك سپورتشىلارى قاتىسادى دەپ جوسپارلانعان. مۇنداي ءدۇبىرلى دودالار وتاندىق سپورتتىڭ دامۋىنا تىڭ سەرپىن بەرىپ، سالاماتتى ءومىر سالتىن كەڭىنەن ناسيحاتتاۋعا جانە جاستاردىڭ سپورتقا دەگەن قىزىعۋشىلىعىن ارتتىرۋعا ىقپال ەتەدى.

سونىمەن قاتار اۋقىمدى حالىقارالىق جارىستار وقيعالىق ءتۋريزمنىڭ دامۋىنا، قوناقۇي بيزنەسىنىڭ جاندانۋىنا، قىزمەت كورسەتۋ سالاسى مەن ينفراقۇرىلىمنىڭ دامۋىنا وڭ اسەرىن تيگىزىپ، قازاقستاننىڭ حالىقارالىق ءيميدجىن ودان ءارى نىعايتادى.

وسىنداي دەڭگەيدەگى حالىقارالىق جارىستاردى وتكىزۋ – سپورت ينفراقۇرىلىمىن جۇيەلى دامىتۋ، جارىستاردى ۇيىمداستىرۋ ساپاسىن ارتتىرۋ جانە حالىقارالىق سپورت فەدەراتسيالارىمەن ىنتىماقتاستىقتى نىعايتۋ باعىتىندا جۇرگىزىلگەن كەشەندى جۇمىستىڭ ناتيجەسى.

بۇگىندە قازاقستان الەمدىك دەڭگەيدەگى ەڭ ءىرى سپورت جارىستارىن حالىقارالىق ستاندارتتارعا ساي ۇيىمداستىرا الاتىن مەملەكەتتەردىڭ قاتارىنا سەنىمدى تۇردە ەنگەنىن اتاپ وتكەن ءجون.

Abai.kz