قازاقستان رەسپۋبليكاسى پرەزيدەنتىنىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا قازاقستان رەسپۋبليكاسىنىڭ كونستيتۋتسيالىق سوتىمەن بىرلەسكەن «وتباسى ساياساتى مەن گەندەرلىك ادىلەتتىلىكتىڭ كونستيتۋتسيالىق كەپىلدىكتەرى» تاقىرىبىندا ۆەدومستۆوارالىق تالقىلاۋ وتكىزدى.

وتباسىن، انا مەن اكەنى، بالانى قورعاۋ – مەملەكەتتىك ساياساتتىڭ باسىم باعىتتارى قاتارىندا ءارى قازاقستان رەسپۋبليكاسىنىڭ كونستيتۋتسياسىندا بەكىتىلگەن نەگىزگى قۇندىلىقتاردىڭ ءبىرى. جيىنعا قاتىسۋشىلار مەملەكەت باسشىسى قاسىم-جومارت توقاەۆ ايقىنداعان باسىم مىندەتتەردىڭ ءبىرى، وسى كونستيتۋتسيالىق كەپىلدىكتەردى ءىس جۇزىندە قامتاماسىز ەتۋ ماسەلەسىن تالقىلادى.

تالقىلاۋدى ۇلتتىق كوميسسيا توراعاسىنىڭ ورىنباسارى، وتباسى ماسەلەلەرى جونىندەگى ۋاكىل سنەجاننا يماشەۆا جۇرگىزدى. ول جاڭا كونستيتۋتسيا نورمالارى وتباسى ينستيتۋتىن ودان ءارى نىعايتۋدىڭ بەرىك قۇقىقتىق نەگىزىنە اينالاتىنىن اتاپ ءوتتى.

ءىس-شاراعا كونستيتۋتسيالىق سوتتىڭ توراعاسى ەلۆيرا ءازىموۆا، پرەزيدەنت جانىنداعى ادام قۇقىقتارى جونىندەگى كوميسسيانىڭ توراعاسى جاقىپ اسانوۆ، كونستيتۋتسيالىق سوتتىڭ سۋدياسى ايجان جاتقانباەۆا، ادام قۇقىقتارى جونىندەگى ۋاكىل ارتۋر لاستاەۆ، مادەنيەت جانە اقپارات ۆيتسە-ءمينيسترى ەۆگەني كوچەتوۆ، ۇلتتىق كوميسسيا مۇشەلەرى، مەملەكەتتىك ورگانداردىڭ، عىلىمي جانە ساراپشىلىق قاۋىمداستىقتىڭ وكىلدەرى قاتىستى.

جيىندا ۇلتتىق كوميسسيانىڭ مەملەكەتتىك وتباسى ساياساتىن جەتىلدىرۋدەگى رولىنە ايرىقشا ءمان بەرىلدى. كوميسسيانىڭ قولداۋىمەن 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى جاڭارتىلىپ، وتباسىن قولداۋ ورتالىقتارىنىڭ جەلىسى كەڭەيىپ كەلەدى. بۇگىندە ەلىمىزدە وسىنداي 160 ورتالىق جۇمىس ىستەيدى. 2026 جىلدىڭ باسىنان بەرى وتباسىن قولداۋ ورتالىقتارىنا 50 مىڭنان استام ءوتىنىش كەلىپ ءتۇستى. 43 مىڭنان استام وتباسى كونسۋلتاتسيالىق كومەك الىپ، 6 مىڭعا جۋىق وتباسى ۇزاق مەرزىمدى سۇيەمەلدەۋگە الىندى.

كوميسسيا قىزمەتىنىڭ نەگىزگى باعىتتارىنىڭ ءبىرى – وتباسى قۇندىلىقتارىن نىعايتۋ جانە جاۋاپتى اتا-انا مادەنيەتىن قالىپتاستىرۋ. وسى ماقساتتا «اتا-انالار اكادەمياسى» جوباسى جۇزەگە اسىرىلىپ كەلەدى. 2025 جىلى استانا قالاسى، اقمولا جانە قاراعاندى وبلىستارىندا 2 500-دەن استام ادام وقۋدان ءوتتى. 2026 جىلدان باستاپ جوبا ەلىمىزدىڭ بارلىق وڭىرىندە جۇرگىزىلىپ جاتىر. وقۋ ماتەريالدارىن ata-ana.kz پلاتفورماسىنان تابۋعا بولادى.

سونىمەن بىرگە وتباسىن قۇرۋعا نيەتتى جۇپتارعا ارنالعان ادىستەمەلىك قۇرال ازىرلەندى. ونى ءبىلىم بەرۋ ۇيىمدارى مەن وتباسىن قولداۋ ورتالىقتارىنىڭ جۇمىسىندا پايدالانۋ جوسپارلانىپ وتىر.

جيىندا كونستيتۋتسيالىق سوتتىڭ وتباسى زاڭناماسىن جەتىلدىرۋگە ىقپال ەتكەن قۇقىقتىق ۇستانىمدارى دا كەڭىنەن تالقىلاندى.

تالقىلاۋ قورىتىندىسى بويىنشا بىرلەسكەن جۇمىستىڭ الداعى باسىم باعىتتارى ايقىندالدى.

Abai.kz