الماتى اكىمدىگى ساتس جانە اۋەزوۆ تەاترلارىنىڭ قۇرىلىسى تۋرالى پىكىر ءبىلدىردى. 

ءبىر تەاتردىڭ قۇرىلىس جۇمىستارى مەرزىمىنەن بۇرىن اياقتالادى.

الماتىداعى ناتاليا ساتس اتىنداعى مەملەكەتتىك اكادەميالىق ورىس بالالار مەن جاسوسپىرىمدەر تەاترى عيماراتىنىڭ رەكونسترۋكتسياسى اياقتالۋعا جاقىن. 

الماتى قالاسى قۇرىلىس باسقارماسىنىڭ باسشىسى نۇربول نۇرساعاتوۆتىڭ ايتۋىنشا، اتالعان نىساننىڭ تاپسىرىس بەرۋشىسى – الماتى قالاسى قۇرىلىس باسقارماسى. كەلىسىمشارتقا سايكەس قۇرىلىس جۇمىستارى قىركۇيەك ايىندا اياقتالۋى ءتيىس بولعانىمەن، مەردىگەرلەر جوبانى جوسپارلانعان مەرزىمنەن بۇرىن اياقتاپ جاتىر.

قازىرگى ۋاقىتتا نىسان بويىنشا ىسكە قوسۋ كوميسسياسىنىڭ اكتىسىنە قول قويىلىپ جاتىر. ياعني، قۇرىلىس جۇمىستارى اياقتالۋ ساتىسىندا، – دەدى نۇربول نۇرساعاتوۆ.

ال مۇحتار اۋەزوۆ اتىنداعى قازاق ۇلتتىق دراما تەاترى عيماراتىنىڭ رەكونسترۋكتسياسىنا قاتىستى الماتى قالاسى اكىمدىگى تاپسىرىس بەرۋشى ەمەس ەكەنىن ايتتى.

بۇل نىسان بويىنشا جەرگىلىكتى اتقارۋشى ورگان تاپسىرىس بەرۋشى بولىپ سانالمايدى. سوندىقتان اتالعان جوباعا قاتىستى ناقتى اقپارات الۋ ءۇشىن تاپسىرىس بەرۋشى ۋاكىلەتتى ورگانعا جۇگىنگەن ءجون، – دەدى باسقارما باسشىسى.

ەسكە سالايىق، الماتى قالاسىنداعى م. اۋەزوۆ اتىنداعى قازاق ۇلتتىق دراما تەاترىندا عىلىمي-رەستاۆراتسيالىق جۇمىستارى جۇرگىزىلىپ جاتىر. تەاترداعى كۇردەلى جوندەۋ جۇمىستارى 2024 جىلى باستالدى. جوبانىڭ تاپسىرىس بەرۋشىسى – تەاتردىڭ ءوزى. قازاقستان رەسپۋبليكاسى مادەنيەت جانە اقپارات مينيسترلىگىنىڭ مالىمەتىنشە، رەكونسترۋكتسيانىڭ تۇپكىلىكتى قۇنى بارلىق جۇمىستار تولىق اياقتالعاننان كەيىن عانا بەلگىلى بولادى.

Abai.kz