وپەك ەلدەرى شىلدە ايىندا مۇناي ءوندىرۋ كولەمىن ايتارلىقتاي ارتتىردى. ءبىر اي ىشىندە تاۋلىكتىك ءوندىرىس 1,66 ملن باررەل ءوسىپ، 23,63 ملن باررەلگە جەتتى. سونىمەن قاتار ۇيىم الەمدەگى مۇنايعا دەگەن سۇرانىس بولجامىن تومەندەتىپ وتىر.

شىلدە ايىندا مۇناي ءوندىرىسىن ەڭ كوپ ارتتىرعان ەل – يراك. ەل تاۋلىكتىك ءوندىرىس كولەمىن 665 مىڭ باررەل ۇلعايتىپ، 2,62 ملن باررەلگە جەتكىزدى.

ودان كەيىن ساۋد ارابياسى تۇر. مۇندا ءوندىرىس 590 مىڭ باررەل ءوسىپ، تاۋلىگىنە 7,35 ملن باررەل بولدى. كۋۆەيت ءوندىرىستى تاعى 393 مىڭ باررەل ارتتىرىپ، 1,85 ملن باررەلگە جەتكىزدى.

الايدا بارلىق ەل ءوندىرىس كولەمىن ارتتىرا قويعان جوق. نيگەريا تاۋلىكتىك ءوندىرىستى 37 مىڭ باررەل قىسقارتىپ، 1,55 ملن باررەلگە ءتۇسىردى. بىرىككەن اراب امىرلىكتەرىندە ءوندىرىس 30 مىڭ باررەل ازايىپ، 3,78 ملن باررەل بولدى.

جالپى وپەك ەلدەرى شىلدە ايىندا تاۋلىگىنە 23,63 ملن باررەل مۇناي ءوندىردى. بۇل ماۋسىممەن سالىستىرعاندا 1,66 ملن باررەلگە كوپ.

ءوندىرىستىڭ ءوسۋى كارتەلگە كىرمەيتىن ءىرى مۇناي ءوندىرۋشى مەملەكەتتەر دە بار وپەك+ توبى بويىنشا دا تىركەلدى. شىلدە ايىندا وپەك+ ەلدەرى تاۋلىگىنە جالپى 37,66 ملن باررەل مۇناي ءوندىردى. ءبىر اي ىشىندە بۇل كورسەتكىش 1,42 ملن باررەل ارتقان.

سونىمەن قاتار وپەك 2026 جىلعا ارنالعان الەمدىك مۇناي سۇرانىسىنىڭ وسىمىنە قاتىستى بولجامىن تومەندەتتى. ەندى ۇيىم بيىل الەمدە تاۋلىگىنە ورتا ەسەپپەن 105,74 ملن باررەل مۇناي قاجەت بولادى دەپ بولجاپ وتىر. بۇل بىلتىرعىمەن سالىستىرعاندا شامامەن 580 مىڭ باررەلگە كوپ.

سۇرانىستىڭ ءوسۋى نەگىزىنەن ەكونوميكالىق ىنتىماقتاستىق جانە دامۋ ۇيىمىنا (ەىدۇ) كىرمەيتىن ەلدەردىڭ ەسەبىنەن بولادى. بۇل مەملەكەتتەردەگى سۇرانىس تاۋلىگىنە 610 مىڭ باررەل ءوسىپ، 59,82 ملن باررەلگە جەتۋى مۇمكىن.

ال ەىدۇ ەلدەرىندە كەرىسىنشە، سۇرانىس تاۋلىگىنە 40 مىڭ باررەلگە تومەندەپ، 45,91 ملن باررەل بولادى.

2027 جىلعا ارنالعان بولجام بۇدان دا وپتيميستىك. وپەك الەمدىك مۇناي سۇرانىسى تاۋلىگىنە بىردەن 2,16 ملن باررەل وسەدى. بۇل جاعدايدا الەمدىك سۇرانىس تاۋلىگىنە 107,9 ملن باررەلگە جەتەدى.

بۇعان دەيىن وپەك+ ەلدەرى قىركۇيەك ايىنان باستاپ مۇناي ءوندىرىسىن تاۋلىگىنە تاعى 188 مىڭ باررەلگە ارتتىرۋعا كەلىسكەن ەدى.

قازاقستان ءۇشىن ءوندىرىس كۆوتاسى تاۋلىگىنە 10 مىڭ باررەل ءوسىپ، 1,628 ملن باررەلگە جەتتى. وسى شەشىممەن اليانس بۇعان دەيىن نارىقتان ەرىكتى تۇردە الىپ تاستاعان مۇناي كولەمىن قايتارۋ پروتسەسىن اياقتايدى.

Abai.kz