بۇگىن قازاقستاندا ماڭىزدى ساياسي وقيعا – قۇرىلتاي سايلاۋى ءوتىپ جاتىر. ونىڭ بارىسىن باقىلاۋ ءۇشىن ەلىمىزگە حالىقارالىق باقىلاۋشىلار كەلدى. سولاردىڭ قاتارىندا قىرعىز رەسپۋبليكاسى ورتالىق سايلاۋ جانە رەفەرەندۋمدار وتكىزۋ جونىندەگى كوميسسياسىنىڭ توراعاسى شاينازاروۆ تىنچتىك بار. ول استانا قالاسىنداعى №164 داۋىس بەرۋ ۋچاسكەسىنە بارىپ، داۋىس بەرۋ پروتسەسىمەن جانە ۇيىمداستىرۋ جۇمىستارىمەن تانىستى. ونىڭ ايتۋىنشا، ازاماتتاردىڭ ءوز ەركىن ءبىلدىرۋى ءۇشىن بارلىق قاجەتتى جاعداي جاسالعان.

«ورتالىق سايلاۋ كوميسسياسى باسقا مەملەكەتتىك ورگاندارمەن ءوزارا ءىس-قيمىل جاساي وتىرىپ، قازاقستان رەسپۋبليكاسى ازاماتتارىنىڭ ءوز ەركىن ءبىلدىرۋىن قامتاماسىز ەتۋ ءۇشىن بارىنشا كۇش-جىگەر جۇمساعان. ازاماتتاردىڭ كەلىپ، داۋىس بەرۋى ءۇشىن بارلىق جاعداي جاسالعان»، – دەدى ول.

شاينازاروۆ ۋچاسكەلەردەگى ۇيىمداستىرۋ دەڭگەيىن جوعارى باعالاپ، حالىقتىڭ بەلسەندىلىگى مەن كوڭىل كۇيىنە وڭ باعا بەردى. سونىمەن قاتار جاستاردىڭ، مۇمكىندىگى شەكتەۋلى ازاماتتاردىڭ ساياسي پروتسەسكە قاتىسۋىنا جانە گەندەرلىك تەڭگەرىمگە جاعداي جاسالعانىن اتاپ ءوتتى.

«زاڭنامالىق تۇرعىدا جاستاردىڭ وكىلدىگى قامتاماسىز ەتىلگەنىن اتاپ وتكىم كەلەدى. سونىمەن قاتار مۇمكىندىگى شەكتەۋلى ازاماتتار دا ەسكەرىلگەن جانە گەندەرلىك بالانسقا ءمان بەرىلگەن. بۇل قۋانتارلىق جاعداي»، – دەدى ول.

حالىقارالىق باقىلاۋشىنىڭ پىكىرىنشە، ازاماتتاردىڭ ءوز وكىلدەرىن تاڭداۋ مۇمكىندىگى ولاردىڭ مەملەكەت باسقارۋىنا قاتىسۋىن كەڭەيتەدى. ول حالىقتى بيلىكتىڭ نەگىزگى باستاۋى رەتىندە اتاپ ءوتتى.

«بيلىكتىڭ باستاۋى – حالىق. حالىقتىڭ ءوز وكىلدەرى ارقىلى قاجەتتى زاڭداردى قابىلداۋ جولىمەن قازاقستان رەسپۋبليكاسىنىڭ قۇرىلتايى ەلدى دامىتۋعا جانە ازاماتتاردىڭ ءال-اۋقاتىن ارتتىرۋعا كۇش سالادى دەپ ۇمىتتەنەمىن»، – دەدى شاينازاروۆ.

ول №164 ۋچاسكەدەگى ازاماتتاردىڭ بەلسەندىلىگىن دە اتاپ ءوتىپ، باسقا داۋىس بەرۋ ورىندارىنا بارۋدى جوسپارلاپ وتىرعانىن ايتتى.

«باسقا ۋچاسكەلەردى دە قارايمىز. جالپى، ءبىز ريزامىز. سايلاۋدى وتكىزۋ دەڭگەيى جوعارى دەپ ايتۋعا بولادى»، – دەدى ول.

جالپى، حالىقارالىق باقىلاۋشى قازاقستانداعى سايلاۋ پروتسەسىنىڭ ۇيىمداستىرىلۋىنا وڭ باعا بەردى. ونىڭ ايتۋىنشا، ازاماتتاردىڭ داۋىس بەرۋىنە قاجەتتى جاعداي جاسالعان، ال حالىقتىڭ بەلسەندىلىگى جوعارى.

بۇگىنگى قۇرىلتاي سايلاۋى – ەلدىڭ قوعامدىق-ساياسي ومىرىندەگى ماڭىزدى وقيعا. ازاماتتاردىڭ ءوز تاڭداۋىن ءبىلدىرۋى قازاقستاننىڭ بولاشاعىنا قاتىستى شەشىمدەرگە قاتىسۋىنىڭ ماڭىزدى تەتىگى بولىپ تابىلادى.

Abai.kz