«امەريكا كۇندەلىكتەرى» – جازۋشى تۇرسىن جۇرتبايدىڭ ساپارنامالىق جاناردا جازىلعان تىڭ دۇنيەسى. اباي.kz پورتالى بۇل مايەكتى تۋىندىنى جاريالاپ كەلە جاتقانىنا كوپ ۋاقىت وتكەن جوق. مۇحيتتىڭ ارعى جاعىنداعى الپاۋىت ەلدىڭ ىشكى سىرىنا ءۇڭىلىپ، ساراپقا سالاتىن جازبالار الداعى كۇندەرى دە تۇراقتى جارىق كورەتىن بولادى.

ال، بۇعان دەيىن جارىق كورگەن بولىمدەرىن بىلاي تابۋعا بولادى:

http://abai.kz/post/view?id=2489 

http://abai.kz/post/view?id=2464     

http://abai.kz/post/view?id=2450

http://abai.kz/post/view?id=2410 

http://abai.kz/post/view?id=2392

http://abai.kz/post/view?id=2365

http://abai.kz/post/view?id=2341

http://abai.kz/post/view?id=2328

http://abai.kz/post/view?id=2298 

http://abai.kz/post/view?id=2264

http://abai.kz/post/view?id=2251

http://abai.kz/post/view?id=2238 

14 قاڭتار، 2014. ۆاشينگتون

كۇن بۇلىڭعىر. ۇساق جاڭبىر بۇركىپ-بۇركىپ الادى دا تىنا قالادى. بۇگىن مۇراجايلار كۇنى. بىراق ەڭ الدىمەن اق ۇيگە قايتىپ بارۋىمىز كەرەك. اۋلاسىنا كىرۋ مۇمكىندىگى بار. سميتسون مۇراجايلار جۇيەسىنە قاراستى ۇندىستەردىڭ تاريحى، كوركەمونەر جانە اەروناۆتيكا-عارىش مۇراجايلارىنا كوز سۇعىن قاداپ ۇلگەرسەم جەتەر ەدى.

ءبىز قونعان مەيمانحانا مەريلەند شتاتىنىڭ 15 مىڭ تۇرعىنى بار نيۋ-حارلتون كەنتىنە قاراستى ەكەن. تازا. كوگالدى. مەترونىڭ سوڭعى ايالداماسى وسىندا تىرەلەدى. ۆاشينگتوننىڭ قوناقۇيلەرى ءبىزدىڭ ءاميانىمىزدى ءبىر تاۋلىكتە تاقىرلاپ شىعاتىن كورىنەدى. سوندىقتان دا كورپەمىزگە قاراي كوسىلىپپىز. ورتالىققا 25-30 مينۋتتا جەتىپ باراسىڭ. ارداگەرلەر داڭعىلى مەن دەنداريدى بويلاپ، كەزىندە 1 دوللارعا ساتىلعان 2 قاباتتى ۇيلەردى كورىپ، بۇرىنعى ۆوكزالدىڭ عيماراتىنا كەلدىك. بۇكىل امەريكانىڭ قانىن بۇلكىلدەتكەن بۇرىنعى ۆوكزال قازىر مۇراجاي. ونىڭ الدىندا حريستافور كولمۋبكە ەسكەرتكىش قويىلىپتى.  ال الىستان حابار الدىرعان بۇرىنعى پوچتا ءۇيى دە بايلانىس مۇراجايى (ايتپاقشا، دج.كەنناننىڭ سەمەيدەن جولداعان جەدەلحابارلارى مەن حاتتارىن، جولجازباسىن، سۋرەتتەرىن قابىلداعان، ابايدىڭ اتى العاش رەت امەريكادا اتالعان پوچتا). بۇلار كاپيتوليدىڭ تۇبىندە. ەسكى ۇيلەردى قولتىعىنا قىسىپ اپ، وزدەرى اسقاقتاپ تۇرعان زاۋلىمدەر كەزدەستى. جەر قىمبات، ال ەسكى ءۇيدى يەلەرى ساتقىسى كەلمەگەندىكتەن دە، كونە ءۇيدىڭ شاتىرىن سىرىپ تاستاپ، تۇعىرلى تەمىر بەتوننان تىرەۋ قويىپ، 6-7 قاباتتى ءۇيدى سالا بەرەدى. ءۇيدىڭ بيىكتىگى كوشەنىڭ ەنىنەن 6 مەتردەن ارتپاسا بولدى. ولاردى مۇندا دا «اۋا ساتقاندار» دەيتىن كورىنەدى. سەبەبىن تۇسىنبەدىم – دەپ كەشە ەسكەرتىپ ەدىم عوي. بيىكتەگى دج.ۆاشينگتوننىڭ ەسكەرتكىشى ءوزىنىڭ ۇستىنىن نۇسقاپ تۇر. مۇندا ەمەۋىرىنسىز ساۋلەت پەن ءمۇسىن ورناتىلمايدى. ال مىنا قارا تۋ تىگىلگەن عيمارات – سوعىستا حابارسىز كەتكەندەردى ىزدەستىرۋمەن اينالىساتىن مەكەمە. ەڭ بيىك ءۇي فرانكليننىڭ الاڭىنا سالىنىپتى. ءبىزدىڭ دە قارا تۋ تىگەتىن قاسىرەتتى تاريحي بەتتەرىمىز از ەمەس قوي. 1921-1922, 1931-1932 جىلعى اشارشىلىقتاعى بەس ميلليون قۇرباننىڭ قۇرمەتىنە ءبىر قارا تۋ تىگەتىن توبەنى بەلگىلەگەنىمىز دۇرىس شىعار. ول قازاق حالقىنىڭ ۇشتەن ەكىسىن قامتيتىن ارۋاقتارعا كورسەتىلگەن قۇرمەت بولار ەدى.

1773 جىلى سالىنعان پرەزيدەنت پەن ونىڭ وتباسى تۇراتىن اق ۇيگە تاعى كەلدىك. بۇگىن اينالاسى اشىق، كۇزەت تە، قاراۋىل دا جوق. ەكى قاباتتى كادىمگى ءۇي. ۋسادبا سياقتى دا اسەر قالدىردى. قالاي قاراپايىم كورىنگەنىمەن دە بۇتكىل دۇنيەنىڭ دامۋ باعىتىن ءوز ىرقىنا بەيىمدەي باعىتتاپ وتىر. اۋلاسى – اۋلا ەمەس، الاڭ. ەمەن، ۇيەڭكە، قاراعاش ءوسىپ تۇر. تابالدىرىعىنان، ارينە، اتتاتپايدى. سۋرەتكە تۇستىك. بايقاعانىم – اق ءۇي قالىڭ ەسكەرتكىشتىڭ ورتاسىنان ورىن الىپتى. الاقانداي جەر بۇيىرسا – ەسكەرتكىش ورناتاتىن ىسپەتتى. كاسىپوداق مۇشەلەرىنە دە ءبىر بۇرىش بۇيىرىپتى. اق ۇيگە قاراي-قاراي كوزىمىز تالعان سوڭ سميتسوننىڭ مۇراجايلار جۇيەسى الاڭىنا كەلدىك. ءۇش ساعات ەركىن ۋاقىت بەردى. قالاعان مۇراجايىمىزعا بارىپ، عارىش-ۇشاق مۇراجايىنىڭ الدىندا جۇزدەسپەكپىز.

امەريكاداعى بىردەن-ءبىر مەملەكەتتىڭ دەمەۋىنە سۇيەنەتىن مادەني وشاق – وسى سميتسون مۇراجايلار جۇيەسى. ونىڭ وزىندە دە مەملەكەت تىكەلەي قاراجات بولمەيدى، مۇراجايدىڭ ءوز قاراجاتىنان بولىنگەن نە دەمەۋشىلەردەن تۇسكەن قاراجاتتى رەتتەپ وتىرادى. مۇنىڭ باستى كىلتيپانى – سميتسون دجەيك – اعىلشىن عالىمى، ءومىرى ۇيلەنبەگەن. ەگەر جيەنى ۇيلەنسە، ارتىنداعى مۇرالارىن سونىڭ بالالارىنا قالدىرۋعا، ۇيلەنبەسە – ول قاراجاتتى امەريكانىڭ كونگرەسىنىڭ ەركىنە بەرۋگە، ءسويتىپ، مادەنيەتتى دامىتاتىن ىسكە جۇمساۋدى وسيەت ەتىپتى. دجەيمس سميتسوننىڭ ءوزى يتاليادا كوز جۇمىپتى. سۇيەگىن كەيىن امەريكاعا اكەلىپ جەرلەپتى.

 كونگرەسس ول قاراجاتتى مۇراجاي مەن عىلىمعا جۇمساۋدى ۇيعارىپتى. ءسويتىپ، سميتسون مۇراجايى كونگرەسستىڭ قانجىعاسىنا بايلانىپ قالىپتى. الايدا ءىستى جۇرگىزگەن ادۆوكات پەن ديرەكتورلار كەڭەسىنىڭ قارجىنى ورىندى، ءوسىمدى ورنالاستىرعانى سونداي، دۇنيە جۇزىندەگى ەڭ باي، قورى دا باي، ارقايسىسى ءوزىن-ءوزى قارجىلاندىراتىن – ۇلتتىق كوركەمسۋرەت گالەرەياسى، امەريكانىڭ تاريحى مۇراجايى، تۇرعىلىقتى امەريكاندىقتار (ۇندىستەر) تاريحى مۇراجايى، جاراتىلىستانۋ مۇراجايى، اۆياتسيا مەن عارىش مۇراجايى، افروامەريكالىقتار تاريحى مۇراجايى، قازىرگى ونەر مۇراجايى ىسپەتتى مۇراعاتتاردىڭ باسىن بىرىكتىرگەن. بۇلاردىڭ ارقايسىسىن تولىق ارالاپ شىعۋعا ءبىر-ءبىر كۇن كەتەدى.

كۇن سىركىرەي جاۋدى. ءبىز ساياحاتىمىزدى ۇلتتىق كوركەم سۋرەت گالەرەياسىنان باستادىق. ايتپاقشى، سميتسون مۇراجايلارى بيلەت ساتپايدى. تەگىن. مۇنداعى نەگىزگى قوردى ۇيىتقان – ەندريۋ مەلان. ول ءتۇرلى-ءتۇستى اسىل زات ساتىپ بايىعان. سول جيناعان كارتينالار كوللەكتسياسىنىڭ نەگىزىندە مۇراجاي اشىلعان. ءبىزدىڭ بايلار – بايلىقتى  ۇرلىقپەن تاۋىپ، وزىنەن، ۇيىنەن، ەلىنەن ۇرلاپ اكەتىپ، شەتەلدىك وسىمقوردىڭ قالتاسىنا تىقپالايدى.  وسىنداي ءبىر يگىلىككە يىلسە – كەگەجەسى كەرى كەتىپ قالاتىن سياقتى. شەتىنەن ءارى ساراڭ، ءارى ساۋاتسىز ھام كورسەقىزار كەلەتىنى نەسى ەكەن؟!. دۇنيەگە ءماشھۇر سۋرەتشىلەردىڭ ءماشھۇر كارتينالارىنىڭ  دەنى وسىندا. سولاردىڭ بەلگىلى-بەلگىسىزىنە كوز سۇزە ءجۇرىپ لەوناردو دا ءۆينچيدىڭ «دجەنەفەر» اتتى پورترەتىنە ايالدادىم. مۇنى بىرەۋلەر: تازالىقتىڭ بەلگىسى، ەكىنشىلەرى، قۋلانعان قىزدىڭ قىلىمسۋى، شەتى شىعىپ تۇرعان بۇتاق – كۇنالىنىڭ بەلگىسى– دەيدى ەكەن. بارلىق قۇپياسىن قىزدىڭ قىلىمسىعان جىميىسىنا جياتىن دا ءۆينچيدىڭ سۋرەت مانەرى ەكەنى بەلگىلى. مەن «دجەنەفەردىڭ» كۇلىمسىرەگەن كوزىنىڭ قيىعى مەن كەكەسىنى بار ەزۋىنە قاراپ، سوڭعى پىكىرگە سەندىم.

تەزدەتە شىعىپ امەريكا تاريحى مۇراجايىنا باردىم. ەرەكشەلىگى – مۇندا مەكتەپ وقۋشىلارى اۆتوبۋس-اۆتوبۋس بوپ، ءۇزىلىسسىز كەلىپ جاتىر. مۇنداعى جاراتىلىستانۋ، اسىل تاستار، وسىمدىكتەر، جاندىكتەر، جان-جانۋارلار  ءبولىمىنىڭ ارقايسىسى ءبىر-ءبىر مۇراجايعا تاتىرلىق. سونىڭ ىشىندە گەوگرافيالىق مينەرالدار  بولىمىندەگى دە موندتىڭ اتىشۋلى «كوگىلدىر الماسىن» ىزدەپ ءجۇرىپ، الەمدەگى مينەرالدىق زاتتاردىڭ تاڭعاجايىپ ۇلگىلەرىن كوردىم. ارقايسىسىنا زەر سالساڭ،  بۇل مۇراجايدا ءبىر اپتا ءجۇرۋىڭ مۇمكىن. ەرلى-زايىپتى سەرىكتەستەرىم جولىعىپ قالىپ، «كوك الماسقا» الىپ باردى. تۋرا وسى گاۋھار القالى كوك الماستى الدىندا ءۇش رەت كورىپ: قىرسىعى مول، ۇرىدان قارىعا، قارىدان قاراقشىعا ءوتىپ بارىپ دە موندتىڭ قولىنا كوشكەن اتىشۋلى «كوگىلدىر كەسەل» بۇدان كورى ءىرى شىعار – دەپ ويلاعام. جازۋشىنىڭ «تاعدىرعا» قىزىعۋى ەكەن. «ە» – دەپ قويىپ ۇندىستەردىڭ مۇراجايىنا بەتتەدىم. جولاي وسى زاماننىڭ مودەرنيستىك-اۆانگاردتىق ونەر مۇراجايىنىڭ سىرتقى سۇلباسىن كورىپ-اق ءتۇڭىلىپ، ىشكە كىرمەدىم.

امەريكانىڭ بايىرعى تۇرعىندارىنىڭ تاريحي مۇراجايى.

امەريكانىڭ ەجەلگى تۇرعىندارىنىڭ مۇراجايى ايگىلى «گولوس امەريكي» راديوستانتسياسىنىڭ قارسىسىنا، كاپيتوليانىڭ وكپە تۇسىنا ورنالاسىپتى. مۇندا تەك ۇندىستەردىڭ وزدەرى قىزمەت ەتەدى-ءمىس. ارينە، ولاردىڭ دا اسسميلياتسياعا تۇسكەندىگى اڭعارىلادى. مەن سونداي ءبىر تەكتىك ەرەكشەلىكتى اڭعارا المادىم. ءتورت قاباتتى. ءبىرىنشى قاباتى اسپۇزىل. ەكىنشى قاباتى – كورمە. قولتىق-قولتىققا بولىنگەن. ءار قولتىق – ءار تايپانىڭ تاريحى مەن تاعدىرىنا  ارنالعان. كورمەدە، كاسىپتەرى، تاعدىرى تۋرالى سۋرەتتەرمەن بەزەندىرىلگەن كورنەكى قۇرالدار، بەينەتاسپالار، ءۇنتاسپالار رەت-رەتىمەن قويىلعان. مۇندا ولاردىڭ كاسىبىنە، تۇرمىسىنا، تەكتىك بولمىسىنا، جاعىراپياسىنا، بۇگىنگى تىرشىلىگىنە باسا كوڭىل بولىنگەن. بەينە جانە ءۇن تاسپالاردى قىزىقتاساڭ، وسى قاباتتىڭ ءوزىن بۇگىن تاۋىسپايسىڭ. مەن تۇرمىسىنان تۇركىلىك سىپات ىزدەۋمەن شەكتەلدىم. جىلقىنىڭ ءوزىن ەۋروپالىقتار كەلگەن سوڭ كورىپ، ۇيرەتكەن ۇندىستەردىڭ ويۋ-ورنەكتەرى، تۇسكيىزدەرى، قورجىندارى، بەت-ءبىتىمى عانا ارعى ءبىر ىقىلىم زامانداعى ۇندىستىكتى ەلەستەتەدى. اندەرىندە دە ءبىر ۇقساس سارىندار قۇلاققا شالىنادى.

زەردەلەي سۇقتانسام ۇزاققا كەتەرىمدى سەزىپ، ءۇشىنشى قاباتتاعى زاتتاي مۇرالاردىڭ كورمەسىنە كوتەرىلدىم. اتتىڭ جالىنا جابىسقان،  ساداق تارتقان، قۇس ۇستاعان ۇندىستەردىڭ ءمۇسىنى ەتەنە تانىس ءومىردى كوز الدىما اكەلدى. الا دوربا، جۇقا سىرماق، سىبىزعى، سىلدىرماق، قوسباستى قورجىن، كەلى-كەلساپ، اعاش سوقا، وراق تا كوزگە ىستىق تارتتى. كۇيەۋى ولگەندە ايەلدەرىنىڭ بەتىن تىرناپ قاناتۋى، جوسا جاعۋى دا كونە تۇركىنىڭ داستۇرىندە بار. كونەدەن باستالعان كورمە بۇگىنگى ونەر تۋىندىلارىمەن اياقتالادى ەكەن. ابستراكتىلى بەينەلەۋگە قۇشتارلىعى تانىلادى. اسەر مول. تۇيگەن وي كوپ. سەزىم سان قيلى. بىراق العان اسەرىمنەن ورتاق تۇجىرىم جاساي المادىم. ءبىر كورگەننەن تۇيگەن ءتۇيىن قايبىر جۇعىمدى بولار دەيسىڭ. ءتورتىنشى قاباتى كونتسەرت زالى، ءتۇرلى ۇيىرمەلەر مەن دارىستەر، كۋرستار وتەدى. دوڭگەلەنە جينالىپ، پىكىر الىسىپ وتىرعان عالىمداردى دا كوردىم. ءبارىنىڭ الدىندا ءبىر-ءبىر نوۋتبۋك. ىستەرىنە ءسات تىلەپ، ءبىرىنشى قاباتتاعى اسپۇزىلعا بارىپ، وزىمىزگە تاڭسىق ۇندىستەردىڭ تاعامدارىمەن تۇستەندىك. ۋماش كوجەسى مەن قاقتاعان بالىعى، بۇعىنىڭ ەتى، ارينە، ۇنادى. قازىرگى ەۋروپالىق ءمازىردىڭ 65 پايىزى وسى ۇندىستەردىڭ ەجەلگى اس-تاعامدارى، جيدەك-جەمىسى، كوكتاتى (وۆوشش) ەكەن.

اۆياتسيا مەن كوسموس مۇراجايىنىڭ كورمەسى – قىتايدىڭ باتپىراۋىعىن اسپانعا ۇشىرۋمەن باستالادى. ۇشاقتاردىڭ بارلىق ءتۇرى، ايعا بارعان اپپاراتتار، ايدىڭ تاسى، سويۋز – اپوللون عارىش كەمەسىنىڭ قاڭقاسى بار. مىنبەدە تۇرىپ ەكرانداعى سۋرەتتەرگە قاراعاندا ءوزىڭ دە ۇشىپ بارا جاتقانداي سەزىنەسىڭ.

افروامەريكاندىقتارعا ارنالعان مۇراجاي باراكا وباما پرەزيدەنتتىككە  كەلگەن سوڭ بەلسەندى تۇردە قولعا الىنىپتى. وندا وبامانىڭ ايەلى ينناگۋراتسياعا كيىپ شىققان كويلەگى كورمەگە قويىلىپتى. ءبىزدىڭ سارا الپىسقىزىنىڭ العاشقى يناگۋراتسياداعى كويلەگى قايدا ەكەن؟ ول دا تاريحتىڭ ءبىر جورگەمى ەكەن-اۋ!

ءبىر اڭعارعانىم، اسكەريلەر ءوزىن-ءوزى جانە فورماسىن قاتتى سىيلايدى ەكەن. ءتارتىپتىڭ ۇلگىسىن كورسەتىپ، قاي كەزدە دە شيراق، سەرگەك، سىمپىستاي بوي تارتىپ جۇرەدى. بىلايعى تۇرعىندارعا قۇرمەتپەن قارايدى. ال ءبىزدىڭ اسكەريلەردىڭ قارىنى اياعىن كورسەتپەيدى، بوكسەسى – بەلىن وراپ العان، جەلكەسى – بۇقا مويىن، بەتى – شارىق بوپ، سىرتىنا قاراي جارىلا جازداپ تۇرادى.

قوش، سونىمەن ۆاشينگتونعا ءبىر قونىپ، بۇيىرعانىن كورىپ، كوزايىم بوپ نيۋ-يورككە قايتتىق.

جولدا ءبىراز قىسىر سوزدەر ايتىلدى. 1848 جىلى باستالعان «كاليفورنيا التىن دەلبەسى»، ونداعى ۇلى بۇلقىنىستار مەن بۋىنۋلار (شىن ماعىناسىندا), التىن قورىن تابا الماي اتىلىپ ولگەن دوسىنىڭ كورىن قازىپ تۇرىپ، 70 كيلوگرامم «سامورودنىي سارى التىن» تاپقان ميلليونەر، ۇلى دەپرەسسيا جىلدارىنداعى تۇڭىلىستەر، ودان سەرگىتكەن №95, №97 فەدەرالدىق جولدار، رۋزۆەلتتىڭ ەڭبەگى تۋرالى ءسوز قوزعالدى. امەريكاداعى اسفالت توسەلگەن جولدىڭ ۇزىندىعى 500 ميلليون شاقىرىم ەكەن. تاق ساندى جول – شىعىس (مىسالى، 95) پەن باتىسقا، جۇپ ساندى جول – وڭتۇستىك پەن سولتۇستىككە جۇرەدى. وڭ جاقپەن جۇرەتىن جول – اق، سول جاقپەن جۇرەتىن جول – سارى تۇسپەن بويالادى ەكەن. بۇل جۇرگىزۋشىلەردىڭ تۇماندا، قىستا، تۇندە جۇرگەندە اداسپاۋىنا سەپتىگىن تيگىزەدى. جولدىڭ قارسى جاعىنا شىعىپ كەتۋدەن ساقتاندىراتىنى انىق.

تاعى دا ورمان. تاعى دا ۇلى وزەندەر. ورمان – بايلىق. ۇلى وزەندەر – تەگىن ەلەكتر قۋاتى، ازىق-تۇلىكتىڭ سۋاتى. اۋىز سۋ قورى. ال ءبىز شەلەكتەپ تاسىعانعا ءمازبىز. ەكىنشىدەن، ماعان – ءبىز امەريكالىقتار ءۇشىن، مونعول، وزبەك، تاجىك، تۇرىكمەن قۇرلى وبرازى قالىپتاسپاعان ەل سياقتى كورىنەتىن ءتارىزدىمىز. جاقۇت – ساقا، قالماق (تاتار ەمەس), باشقۇرت، التايلىقتار سياقتى بۇلدىر ەلەسىمىز عانا بار ىسپەتتى سەزىلدى. قازاقستان – ولار ءۇشىن جەكە ۇلت، تاۋەلسىز مەملەكەت ەمەس، اق ناسىلدىلەردىڭ بودانىنان ەندى قۇتىلعان پرەتوريا، ياعنىي، تۇرعىنداردىڭ 85 پايىزى زاڭگىلەر بولا تۇرا بار بايلىقتىڭ 15 پايىزىن يەلەنىپ قالعان زاڭگىلەر ەلى ىسپەتتى قابىلدايتىنداي كورىندى. ۇلت ەمەس، قىزىل تەرىلى ءناسىلدىڭ ءبىر بۋىنى رەتىندە سەزىنەتىنىن اشىق ايتپاسا دا، انىق بايقالىپ تۇرادى.

اششى دا بولسا مۇنىڭ انىق بەلگىسى – قازاقستاننىڭ اەروپورتىنا كەلىپ، شەكارالىق كەدەننەن وتكەندە: «ۆاش فاميليا؟» – دەپ قارسى الاتىن «ۆەليكي، موگۋششي، رۋسسكي يازىك» (تۋرگەنەۆ). تىلدەسكەن ەكى-ءۇش امەريكاندىق سونداي سىڭاي تانىتتى. بۇعان داندەتكەن شالاقازاق ەلشىلەر مەن مامىلەگەرلەر، «قارا ورىس» شاكىرتتەر. ۇلتتىق ەرەكشەلىگىڭ سەزىلىپ تۇرماسا، سەنى ازات ەلدىڭ ازاماتى ەمەس، وتار ەلدىڭ ولەرمەنى – دەپ ەسەپتەيدى. مۇنى وزىمىزگە كەلگەن امەريكاندىقتار، ءتىپتى، ءوزىمنىڭ قازاقشا سۋداي ساپىراتىن كۋرت – قۇرمانبەك كورشىم دە ەمەۋىرىنمەن جەتكىزدى.

سورلى، «قاسىقتاي بالعا مالعان قايران ءتىلىم» (قارا ولەڭنەن), ەندى ساعان نە دەيىن؟ سەنى دە، ءوزىمدى دە قايتىپ جۇباتام؟!.

(جالعاسى بار...)

اباي.kz