جاقىندا بەلگىلى قارت جازۋشى، اقىن، جۋرناليست دۋلات احمەتۇلى شالقارباەۆتىڭ (1923–2012) ءوزى ءومىرىنىڭ اقىرعى جىلدارىندا دايىنداعان سوڭعى كىتابى «رۋح بگ» باسپاسىنان جارىق كوردى.  جيناق جازۋشى بەيبىت قويشىباەۆتىڭ العىسوزىمەن اشىلعان.

دۋلات شالقارباەۆ  شيرەك  عاسىر بويى اۋداندىق، وبلىستىق گازەتتەردە، كاسىپتىك ءبىلىم بەرۋ جانە مادەنيەت سالالارىندا تابىستى قىزمەت اتقارا ءجۇرىپ، كوركەم شىعارماشىلىقپەن دە ۇزبەي شۇعىلداندى. جيىرما شاقتى پوەزيالىق جانە پروزالىق كىتاپتىڭ، بىرنەشە پەسانىڭ،  بالالارعا ارنالعان كوپتەگەن تۋىندىلاردىڭ اۆتورى بولدى. ونىڭ قازاق ۇلت-ازاتتىق قوزعالىسى جايىنداعى «كەنەسارى مەن مىڭجاسار» پوەماسى، تاريحتاعى «اقتاڭداقتاردى» جويۋعا ۇلەس قوساتىن  «اقيىقتار» دەگەن تانىمدىق كىتابى جانە اۋىلداستارىنىڭ 20–30-شى جىلداردا باستان كەشكەن قيلى تاعدىرىن كورسەتەتىن  «دۇربەلەڭ» اتتى تاريحي رومانى بار.

جاڭا كىتابى ەكى بولىمنەن تۇرادى. العاشقى ء«ومىر ءوزى سويلەيدى» بولىمىندە   كەمەل جاسقا كەلگەن اقىننىڭ زاماناعا كوزقاراسىن، بەلگىلى تۇلعالار تۋرالى وي-پىكىرىن، تىرشىلىك حاقىنداعى فيلوسوفيالىق تولعامدارىن تانىتاتىن ولەڭ-جىرلارى مەن تولعاۋلارى بەرىلگەن. تاريحتىڭ ءارتۇرلى كەزەڭىندە ءومىر سۇرگەن ساكەن سەيفۋللين، دىنمۇحامەد قوناەۆ، قانىش ساتباەۆ، جازىلبەك قۋانىشباەۆ سىندى حالىق ۇلدارىنىڭ، وزگە دە بەلگىلى تۇلعالاردىڭ ونەگەلى قاسيەتتەرى جىر ارقاۋى بولعان.  ال ەل اۋزىنداعى شەشەندىك سوزدەر جيناقتالعان «بابالار تاعلىمى» ءبولىمى  وزىنشە ءبىر ءتالىمدى تاريح بولىپ شىققان. بۇل توپتامادا وقىرمان قازاق شەجىرەسىنىڭ كوپشىلىككە بەيمالىم تارماقتارىمەن، اتى اڭىز بوپ كەتكەن ايگىلى قارابۋرا اۋليەنىڭ ءومىر تاريحىمەن،  ايبىندى ابىلاي حان، سىرىم باتىر، كەنەسارى حان، اتاقتى قوبىزشى-سازگەر ىقىلاس ءتارىزدى بەلگىلى ادامداردىڭ عيبراتتى سوزدەرىمەن، ارقا توسىندە، وڭتۇستىك وڭىردە سولارمەن سەرىكتەسىپ، قويان-قولتىق ءومىر سۇرگەن ەل اعالارى، قاتارداعى ازاماتتار جونىندەگى مولتەك اڭگىمەلەرمەن تانىسادى.   

كوپ جاساپ، كوپتى كورگەن قارت قالامگەردىڭ وسىناۋ شىعارماشىلىق مۇراسى وقىرمانعا مول رۋحاني ءلاززات سىيلارى حاق.

اباي-اقپارات