«ەكستەرميزممەن شاتالىپ، ءدىني اعىمداردىڭ ارباۋىنا ءتۇسىپ، سوتتالعانداردىڭ 80 پايىزى  ورىستىلدىلەر. سوندىقتان تىلدىك ورتاسىنا بايلانىستى ءدىني ۋاعىزداردى ورىس تىلىندە دە ايتۋعا تۋرا كەلەدى. بۇل جالپى تاجىريبەدە بار. مىسالى، مۇسىلمان دۇنگەن، شەشەن مەشىتتەرىندە ۋاعىزدار ورىس تىلىندە ايتىلىپ كەلە جاتىر» دەدى   ءدىن ىستەرى كوميتەتىنىڭ توراعاسى عالىم شويكين.

«دىنارالىق قاتىناستار سالاسىنداعى مەملەكەتتىك اقپاراتتىق ساياساتتى جۇزە اسىرۋ جانە باق-تا لاڭكەستىك پەن ءدىني ەسكترەميزمدى اقپاراتتاندىرۋ ەرەكشەلىكتەرى» اتتى جيىن بارىسىندا جوعارىداعىداي دەرەكتى مالىمەت ايتقان عالىم شويكين مەشىتتەردە ۋاعىزدى ورىس تىلىندە ايتۋ ماسەلەسىنە توقتالا كەلىپ: "ورىس تىلىندە ۋاعىز ايتۋ "قازاق ءتىلدى ورتادا، قازاق ءتىلدى جاماعات جينالعان جەرلەردە بولمايدى" دەپ اتاپ ءوتتى.

وسىلايشا، شيرەك عاسىر بويى شەشىمىن تاپپاعان مەملەكەتتىك ءتىل ماسەلەسى كۇردەلەنىپ، تەرەڭدەپ قوعامنىڭ الدىنان وزەكتى ءارى قاۋىپتى ماسەلە بولىپ شىعىپ وتىر. قاۋىپتىسى – تەرىس ءدىني اعىمداردىڭ ۋاعىزدارى ورىس تىلىندە ايتىلادى، كىتاپتارى، اۋديو/ۆيدەولارى دا رەسمي تىلدە تارايدى. قازىرگى كۇنى قازاقستان ءۇشىن تەرىس ءدىني اعىمداردان ءتونىپ وتىرعان قاۋىپتىڭ جوعارى ەكەنىن ءاربىر ادام جاقسى بىلەدى. مۇنداي قاۋىپتىڭ ءبىر ۇشى قازاق ءتىلى – مەملەكەتتىك ءتىل ماسەلەسىن تۇبەگەيلى ءارى زاڭ-قۇقىقتىق تۇرعىدان بىرىڭعاي ەتىپ، ناقتى ىستەرمەن شەشپەگەن بيلىكتە جاتىر. بيلىك ءالى كۇنگە ءتىل ماسەلەسىنەن بويىن اۋلاق سالىپ، قاشادى. ماسەلەنى شەشۋدىڭ ورنىنا جالعان ءارى ارزان ۇران تاستاپ، ءارتۇرلى دياسپورا وكىلدەرىنىڭ اراسىندا قازاق ءتىلى بايقاۋىن وتكىزىپ، مەملەكەتتىك ارنالاردا سونداي ارزان پيار جاساۋدان اسا الماي كەلەدى. ال، ءتىل ماسەلەسىنەن بيلىك قاشقان سايىن ول ۇلكەيىك، كۇردەلەنىپ، قاۋىپ-قاتەر بولىپ ءبىزدى وكشەلەپ قۋىپ كەلەدى. بىراق، بيلىك ءدىن ماسەلەسىنىڭ نەگىزى تىلدە دەپ بىلمەيدى...

كۇردەلى بولاتىنى – ءبىر ەل – ءبىر ءتىل ساياساتى سالتانات قۇرماعان سوڭ، قوعام جىل سايىن تىلدىك ورتاعا قاراي ءبولىنىپ، بۇل ءوز كەزەگىندە قوعامنىڭ بولشەكتەنۋىنە جانە ازاماتتاردىڭ ورىس تىلىندە تارايتىن اقپاراتتىڭ تولىققاندى تۇتىنۋشىسى ءارى سونىڭ قولداۋشىسىنا اينالۋىنا الىپ كەلدى. مۇنىڭ ار جاعى قوعامنىڭ جىكتەلىپ، بولىنۋىنە اپاراتىنى ءسوزسىز. بۇل جەردە دە بيلىك ەش ارەكەتسىز وتىر. تاعى دا سول ارزان پياردان، حالىق سەنىمىنە كىرمەيتىن ۇراندارمەن عانا شەكتەلىپ كەلەدى.

الداعى ۋاقىتتا دا ءتىل ماسەلەسى وتكىرلەنىپ، تەرەڭدەي بەرەتىنى داۋسىز، باسى اشىق نارسە. ويتكەنى، قازاقتىڭ سانى جىل سايىن ارتىپ كەلە جاتقاندىقتان قازاقستان ءۇشىن ءتىل ماسەلەسى ەڭ وتكىر ءارى قاۋىپتى ماسەلەگە اينالاتىنى ازىردەن-اق سەزىلىپ وتىر...

نۇرا ماتاي

Abai.kz