مەملەكەتتىڭ اقشاسى «جالاڭاش قىزدارعا» بولىنە مە؟
«پلاتون مەنىڭ دوسىم, دەگەنمەن شىندىق ودان دا قىمبات». سول قىمبات شىندىقتى قازاقتىلدى اقپارات قۇرالدارىندا قىزمەت ەتەتىن دوستاردىڭ كوڭىلىنە قاراماي، اشىپ ايتاتىن ۋاقىت جەتتى دەپ ويلايمىن. ءبارىڭىز بىلەسىزدەر، قازاق تىلىندەگى ساناۋلى اقپاراتتىق پورتالدار قازىر پورنوگرافيالىق ءھام ەروتيكالىق سيپاتتاعى ماقالالاردى ءجيى جاريالايتىن ىندەتكە شالدىقتى. بۇعان باستى سەبەپ - وقىرمان تارتۋ. وقىرمانى كوپ ينتەرنەت باسىلىمعا مەملەكەت تاراپىنان دا قوماقتى قارجى بولىنەدى. سول قوماقتى قارجى قازاق ۇلتىن ازدىرۋعا جۇمسالىپ جاتقانىن بۇگىندە ەشكىم جوققا شىعارا المايدى.
ەشبىر سايتتىڭ اتىن اتاپ، ءتۇسىن تۇستەمەي-اق قويالىق. سوندا دا ءسوزىمىز جالاڭ بولماۋى ءۇشىن وقىرماننىڭ «جاعاسىن ۇستاتا، ۇستاتا» كىرلەتىپ بىتكەن بىرەر ماقالانىڭ تاقىرىپتارىن عانا نازارلارىڭىزعا ۇسىنىپ كورەيىك.
- باحرەيندە جەزوكشەلىككە سالىنعان قاراعاندىلىق قىز قۇلدىقتان قۇتقارىلدى
- قايداعى ۇيات! اسەل بايانداروۆانىڭ ەڭ «باتىل» سۋرەتتەرى
- ۇلان قونىسباەۆ — قازاقتان شىققان رونالدۋ! نەبىر كۇشتى قىزدارمەن جۇرەدى ءوزى
- بالالارعا نە بولىپ بارادى؟ وقۋشى قىز جالاڭاش سۋرەتىمەن ماقتاندى
- قازاق جىگىتى جاس ايەلىن باسقا ەركەكپەن ۇستاپ الدى!
- مىنا قىزداردا ۇيات بار ما؟
- ەڭ ۇياتسىز توي. تۋعان كۇنگە جالاڭاش قىز سىيلاعاندى كوردىڭىز بە؟
- وقو-دا رۋلاس قارىنداسىن زورلاماق بولعان جىگىت ءبۇتىن اۋىلدى دۇرلىكتىرىپ وتىر
- قاراعاندىدا 10-شى سىنىپ وقۋشىسى نەمەرە قارىنداسىن زورلاپ، جۇكتى ەتتى
- شىمكەنتتىك كەيۋانا تويدا ءتانىن جالاڭاشتاپ بيلەيتىن قىزدار ءۇشىن ۇيالدى
- الماتىدا ورىنعا تالاسقان جەزوكشەلەر كليەنتتىڭ كوزىنشە جاعا جىرتىستى
- رەسەي سۋرەتشىسى توسىمەن رامزان كادىروۆتىڭ سۋرەتىن سالدى.
- ەلباسى قاتىسقان جيىنعا ديلناز احماديەۆا توسقاپ كيمەي بارعان با؟
- تىر جالاڭاش دەنەسىنە كيىمنىڭ سۋرەتىن سالدى
- تويعا جالاڭاش كەلگەن ەكى مودەل الەمدى شۋلاتتى.
قوش! بۇل ءتىزىمدى بۇگىن تاۋىسىپ بىتە المايمىز.
قازاق ۇلتىنىڭ نامىسىن جىرتۋى ءتيىس سايتتارىمىز اۋزىنىڭ سۋ قۇرىپ جالاڭاش قىزداردى اڭدىپ وتىراتىنى كەيدە قازاقتى ۇلتتىق بولمىستان ايىرۋعا جاسالعان ارنايى باعدارلاما سەكىلدى كورىنەدى.
بىرىنشىدەن، مۇنداي "جالاڭاش ماقالالار" قازاق ۇلتىن ازدىرۋعا قىزمەت ەتەتىنى بەلگىلى. ەلدى "بەلدەن تومەن" اڭگىمەمەن الداپ، توبىرعا اينالدىرۋدى ماقسات ەتكەندەردىڭ تىرلىگى.
ەكىنشىدەن، قازىر ەلىمىزدە پورناگرافيالىق ءھام ەروتيكالىق ونىمدەردى جاريالاۋعا تيىم سالعان زاڭ بار. كەيبىر ينتەرنەت باسىلىمدار سول زاڭدى اينالىپ ءوتىپ، «حالىقتىڭ نارازىلىعىن تۋعىزدى، بۇل نە دەگەن ازعىندىق» دەگەن سەكىلدى بەتپەردەمەن الەۋمەتتىك جەلى ارقىلى كۇللى ينتەرنەت قولداناتىن قازاق جۇرتىن وزدەرىنىڭ يىرىمدەرىنە باتىرىپ بارادى.
ۇشىنشىدەن، بۇل قازاقى يسلامعا دا – جات قىلىق.
قازاقستان پرەزيدەنتى نۇرسۇلتان نازارباەۆ «پورنوگرافيالىق باسىلىمدار اينالىمىنىڭ جانە ولاردى ساۋدالاۋدىڭ جولىن كەسۋ تۋرالى حالىقارالىق كونۆەنتسيانى راتيفيكاتسيالاۋ تۋرالى» زاڭعا 2013 جىلى قول قويعان بولاتىن.
قازاقستاننىڭ سول زاڭى بويىنشا سەكسۋالدى-ەروتيكالىق سيپاتى بار زاتتار مەن ونىمدەردى باق-تا جاريالاۋعا دا ارنايى تىيىم سالىنعان.
1923 جىلى 12 قىركۇيەكتە جەنەۆا قالاسىندا قابىلدانعان سول كونۆەنتسيانى ماقۇلداعان مەملەكەتتەر پورنوگرافيالىق ماتەريالداردى ساتۋ، تاراتۋ جانە جارياعا شىعارۋ ءۇشىن ولاردى تاسىمالداۋ، اينالىمعا ءتۇسىرۋ، جارنامالاۋ، ءوندىرۋ، ساقتاۋ، ازىرلەۋدى جازالاۋ شارالارىن بەكىتكەن.
كونۆەنتسيادا پورنوگرافيالىق سۋرەتتەردى، گراۆيۋرالاردى، كارتينالاردى، باسپا ونىمدەرىن، بەينەلەردى، افيشالاردى، ەمبلەمالاردى، فوتوگرافيالاردى، كينەماتوگرافيالىق فيلمدەردى، باسقا دا زاتتاردى ساتۋعا، تاراتۋعا، جاريالاۋعا، تاسىمالداۋعا، جارنامالاۋعا، وندىرۋگە، ساقتاۋعا تىيىم سالىنعان. بۇل تىيىمداردى بۇزعان تۇلعالاردى سوتقا تارتۋ جونىندە ايتىلعان. پورنوگرافيالىق زاتتاردى تۇتقىنداۋ، تاركىلەۋ جانە جويۋ قاراستىرىلعان.
قازىر دەرەۋ كۇشتىك قۇرىلىمدار، اقپاراتتىق پورتالدارعا رەۆيزيا جاساپ، پورنوگرافيالىق ونىمدەردى ناسيحاتتاعانى ءۇشىن جاۋاپقا تارتۋى كەرەك. جوعارىدا ايتىلعان كەز-كەلگەن ماتەريالدان قر زاڭدارىن ورەسكەل بۇزعان زاڭسىزدىقتى تاۋىپ الۋعا بولادى.
ەندى قر باق تۋرالى زاڭىنا نازار سالىڭىز!
وسى زاڭعا سايكەس «پورنوگرافيالىق ونىمدەر رۇقسات ەتىلگەن ورىندا عانا تارالۋى ءتيىس. ال ولاردىڭ تارالۋ ورنىن جەرگىلىكتى اتقارۋشى بيلىكتەگىلەر انىقتايدى. ەروتيكالىق سيپاتتاعى ونىمدەر ارنايى بەلگىلەنگەن ورىننان تىس جەردە تارالسا، وندا ونى تاراتۋشى زاڭ الدىندا جاۋاپكەرشىلىككە تارتىلادى. سونداي-اق زاڭعا سايكەس ەروتيكالىق ونىمدەر 18 جاسقا تولماعاندارعا ساتىلسا جانە ونى جاساۋعا 18-گە تولماعانداردىڭ قاتىسى بولعانى انىقتالعان جاعدايدا ولاردى اكىمشىلىك قۇقىق بويىنشا جاۋاپقا، ال ءونىم «پورنورگرافيالىق» ءونىم ساناتىنا جاتقىزىلسا، قر قىلمىستىق كودەكسى بويىنشا جاۋاپقا تارتىلۋى مۇمكىن. باق تۋرالى زاڭدا «ەروتيكالىق سيپاتتاعى ءونىم دەگەنىمىز – بۇل ءبىرتۇتاس جۇيەلى تۇردە جىنىستىق قاتىناستى ناسيحاتتايتىن قۇرال» دەلىنگەن. سول سەبەپتى عالامتور جەلىلەرىندە، كوشەدە، جارنامالاردا پورنوگرافيا تۇگىلى ەروتيكالىق سيپاتتاعى كەز-كەلگەن ءونىمدى تاراتۋعا زاڭمەن تىيىم سالىنعان.
وسىنداي زاڭبۇزۋشىلىقتى جاساپ قانا قويماي، وقىرمانى كوپ باسىلىم رەتىندە مەملەكەتتىڭ قارجىسىنا اۋىز سالعان ينتەرنەت باسىلىمداردىڭ تىزگىنىن تارتقىزاتىن كەز كەلدى. جوعارىداعى شەنەۋنىكتەر دە ينتەرنەت پورتالداردىڭ رەيتينگىسىنە ەمەس، جاريالاعان ماقالالارىنىڭ مازمۇنىنا ساراپتاما جاساپ، بيۋدجەت قارجىسىن دۇرىس ماقساتتاعى اقپارات قۇرالدارىنا ءبولۋى كەرەك.
ايتپەسە، قازىر مەملەكەت قارجىسىن جالاڭاش قىزدارعا ارناپ ءبولىپ جاتقانداي اسەر قالدىرادى. ءسىز قالاي ويلايسىز؟
قانات ابىلقايىر
Abai.kz
