جەر قويناۋىنداعى تابيعي بايلىقتى ءتيىمدى پايدالانۋ بۇگىندە جاھاندىق ماڭىزى بار ماسەلەگە اينالىپ وتىر. بيىل وڭتۇستىكتە «جاسىل» ەكونوميكانى ەندىرۋ جونىندە جوبالار قولعا الىندى. ونىڭ اياسىندا وندىرىستىك قالدىقتار قايتا وڭدەلدى. قوقىس تاستايتىن پوليگونى تاپشى وڭىردە ەكولوگياعا زياندى قالدىقتار قالاي جويىماق؟

وڭتۇستىكقازاقستاندىق ەكولوگتاردىڭ سوزىنشە، «جاسىل» ەكونوميكاعا كوشۋ ءبىزدىڭ وبلىستى عانا ەمەس، مەملەكەتىمىزدى ەكولوگيالىق توقىراۋدان ساقتايدى.

ء«بىز «جاسىل» ەكونوميكا بويىنشا ۇلكەن ساۋالدار كوتەرىپ جاتىرمىز قازىر. ءونىم قالدىقتارىن وندىرىستىك تسيكلگە قايتارۋ 115 مىڭ تونناعا دەيىن جەتكەن. بۇل ەكونوميكا ءۇشىن حالىقارالىق ستاندارتقا ساي تەحنيكا قاجەت. ايتپاقشى، «ورداباسى قۇستىڭ» ۇسىنىسىمەن ءبىز قۇستار مەن مالداردىڭ ءناجىسىن دە قاجەتكە جاراتۋىمىزعا بولادى. بۇل جونىندە ارنايى كوميسسيادا دا ايتىلدى. جانە «شىمكەنت تسەمەنت»، «ساستوبە — شىمكەنت» مەكەمەلەرى دە جاڭا باعىت بويىنشا جۇمىس ىستەمەك، ياعني، قالدىقتاردى قايتا وڭدەۋدى قولعا الماق»، - دەيدى وقو ەكولوگيا دەپارتامەنتىنىڭ ماماندارى.

ال ونداي تەحنيكا ازىرگە ەلىمىزدە ساناۋلى عانا. ەگەر جاڭا تالاپ تولىقتاي ەنگىزىلسە، وڭىردەگى ءوندىرىس ورىندارى ەسكى ءادىس بويىنشا جۇمىس جاساي المايدى. مۇنى جەرگىلىكتى كاسىپكەرلەردىڭ ءوزى مويىنداپ وتىر. ال بىرنەشە كاسىپورىندار قازىردىڭ وزىندە ءونىم قالدىقتارىن قايتا وڭدەۋ ءۇشىن جاڭا جوبالاردى قولعا الدى.

بۇگىندە تابيعي قوردى ساقتاۋ مەن ونى پايداعا جاراتۋ — ۋاقىت تالابى. دامىعان ەلدەردىڭ ءوزى وسىنداي جاڭا تەحنولوگيا مەن جاڭا باعىتتار بويىنشا جۇمىس جاساپ ءجۇر. بۇل — قازاقستاندىق وندىرىستەردىڭ «جاسىل» ەكونوميكانى جەدەل جۇزەگە اسىرۋى كەرەك ەكەنىن بايقاتادى.

اباي-اقپارات