ءبىز قحر-دان ورالىپ، جامبىل وبلىسى، تاراز قالالىق كوشى-قون پوليتسياسىنان ىقتيارحات العان 250-دەي ەتنيكالىق قازاق شىلدە ايىنان بەرى ۇرەيمەن كۇن كورىپ جاتقانىن ارنايى جازىپ، قازاقستان رەسپۋبليكاسىنىڭ پرەمەر-ءمينيسترى باقىتجان ساعىنتاەۆتان اراشا سۇراعان ەدىك.  

قايدا بارىپ، كىمنەن كومەك سۇرارىن بىلمەگەن جۇرت بىزگە كەلدى. ولاردىڭ بارلىق قۇجاتتارىن راسىمدەگەن قالالىق كوشى-قون پوليتسياسى باسقارماسىنىڭ باسشىسى مەن ونىڭ بىرنەشە ينسپەكتورى قاماۋعا الىنىپ، تەرگەۋ جۇرگىزىلىپ جاتىر. ال، جامبىل وبلىسىنىڭ كوشى-قون پوليتسياسى بولسا، كەشە 250 قانداسقا جالعان ىقتيارحات بەرمەگەنىن رەسمي مالىمدەدى.

بۇل مالىمدەمە بيلىكتەن كومەك كۇتكەن اعايىننىڭ ءۇمىت ءجىبىن ءۇزىپ جىبەرگەندەي اسەر ەتكەنىن حالىق بىلە مە؟

250 قانداس دەگەن - 250 وتباسى، ياعني مىڭداعان ادامنىڭ تاعدىرى. سول تاعدىرلارعا ساعىنتاەۆ تىزگىنىن ۇستاعان ۇكىمەتتەگى ازاماتتار الاڭداۋى ءتيىس دەپ بىلەمىز.

ءبىز بۇگىن سول 250-ءدىڭ ىشىندەگى بىرنەشە اداممەن تىلدەسىپ، ارىز-ارمانىن تىڭدادىق. سىزدەر دە وقي وتىرىڭىزدار!

Abai.kz اقپاراتتىق پورتالى

ەرزات زاتايۇلى. قازاقستاندا تۋعان بالامنىڭ جايى نە بولماق؟

– مەنىڭ اتى-ءجونىم ەرزات زاتايۇلى، كەلىنشەگىم ءشاريپا ارىپحانقىزى ەكەۋمىز ەكى بالامىزبەن 2015 جىلى تاريحي وتانىمىزعا قونىس اۋداردىق. ەلگە كەلگەننەن سوڭ، ازاماتتىق الۋ ءۇشىن ىزدەنە باستادىق. سويتسەك، زاڭ بويىنشا الدىمەن ىقتيارحات الۋ كەرەك ەكەن. ىقتيارحات العاننان كەيىن ءتورت جىلدان سوڭ، قۇجاتتارىمىزدى ازاماتتىققا تاپسىرۋ كەرەكتىگىن بىلدىك.

ءبىز قۇجات دايىنداتىپ جاتقان كەزدە الماتى مەن استانا قالالارىنان ىقتيارحات الۋ مۇمكىن بولماي تۇردى. ال، قىتايعا ۆيزا اشۋ قيىنداپ كەتتى. امالدىڭ جوعىنان ەلمەن بىرگە تارازعا بارىپ، 2016 جىلى ىقتيارحاتتى الدىق. ەندى مىنە، قولىمىزدا بۇكىل قۇجات دايىن بولسا دا ازاماتتىققا قۇجات وتكىزە الماي سابىلىپ ءجۇرمىز. ىقتيارحاتىمىزدى جالعان دەپ ءوزىمىزدىڭ ۇستىمىزدەن ءىس قوزعاپ، قىتايعا شىعارىپ جىبەرۋ قاۋپى ءتونىپ وتىر. مۇندا كەلگەننەن سوڭ، ءۇشىنشى بالالى بولعان ەدىم. ەندى ونىڭ، ياعني بالا-شاعامنىڭ جايى نە بولماق؟ ارينە، قىتايعا بارعاننان كەيىن ول ەل ءبىزدىڭ باسىمىزدان سيپاماسى انىق.

ايدىن داكىلۇلى. ايەلىم، بالا-شاعام قازاقستاننىڭ ازاماتتارى، ال مەن...

– مەن ايدىن داكىلۇلى 2014 جىلدىڭ كۇزىندە قىتايدان كوشىپ كەلدىم. الماتى مەن استانا قالالارىنان ىقتيارحات الۋ مۇمكىن بولماعاندىقتان 2015 جىلدىڭ اقپانىندا ورلەۋ دەگەن دەلدال جىگىتكە قۇجاتتارىمدى بەردىم. 2015 جىلدىڭ ءساۋىر ايىنىڭ 24-ءى كۇنى ىقتيارحاتىم قولىما ءتيدى. بىراق، قاراشا ايىندا مەنى ول جاقتان تۇراقتى تىركەۋدەن شىعارىپ جىبەرىپتى. ەندى مىنە، ىقتيارحاتتارىڭ جارامسىز دەپ ءبىزدىڭ ۇستىمىزدەن ءىس قوزعاماقشى ەكەن. ونى كەشە رەسمي ورگانداردىڭ حابارلاۋىنان ەستىپ، باسىمىزعا جاي تۇسكەندەي بولىپ وتىر. مەنىڭ ايەلىم، ەكى بالام - قازاقستاننىڭ ازاماتتارى. دەلدالداردىڭ سالدارىنان ءبىر وتباسىنىڭ شاڭىراعى ورتاسىنا تۇسپەي مە؟  نە قىتايدا، نە قازاقستاندا جوق، ەكى وتتىڭ ورتاسىندا قالدىق.

ۇلپان جەكسەنباي. ءسابيىم - قازاقستان ازاماتى

– 2010 جىلى قازاقستانعا كەلىپ، ءال-فارابي اتىنداعى قازاق ۇلتتىق ۋنيۆەرسيتەتىنە وقۋعا ءتۇستىم. 2015 جىلى ازاماتتىق الۋ ءۇشىن الدىمەن ىقتيارحات الۋ كەرەك بولدى. ول كەزدە ىقتيارحاتتى تەك تاراز قالاسىندا بەرىپ جاتقاندىقتان، سول جاققا قۇجاتتارىمىزدى تاپسىرىپ، ءۇش ايدان سوڭ، ىقتيارحاتىمىزدى قولىمىزعا الدىق. وسى قۇجاتپەن بىرنەشە رەت قىتايعا بارىپ كەلدىم.

جاقىندا عانا بۇل قۇجاتىم جالعان ەكەنىن، سول سەبەپتى تۇراقتى تىركەۋدەن شىعارىپ جىبەرگەنىن ءبىلدىم. قازاقستانعا وتانىم، ەلىم، جەرىم دەپ كەلىپ، وسى ەلدە ءبىلىم الىپ، تۇرمىس قۇرىپ، بالالى بولعاندا قىتايعا كۇشپەن قايتارسا، جاعدايىمىز نە بولماق؟ بالام دۇنيەگە قازاقستاندا كەلگەندىكتەن – قازاقستان ازاماتى. انانى باۋىر ەتى بالاسىنان ايىراتىن اۋىر احۋال باسىمىزعا ءتۇسىپ وتىر. بۇل قازاقستاننىڭ زاڭىن بىلمەيتىن ءبىزدىڭ ەمەس، جامبىل وبلىستىق ىشكى ىستەر دەپارتامەنتىنىڭ كىناسى دەپ ويلايمىز. جەرگىلىكتى جەردىڭ قۇجاتتاردى دۇرىس جاساماۋ سەبەبىنەن تالاي ادامنىڭ تاعدىرىنىڭ بىت-شىتى شىعايىن دەپ وتىرعانىن ەل اعالارى تۇسىنسە، بىزگە ازاماتتىق بەرسە دەگەن ءوتىنىشىمىز بار. ءبىزدىڭ قازاقستان ازاماتى بولىپ، تاريحي وتانىمىزدا قالعىمىز كەلەدى. بىزگە جۇرەگى قازاق دەپ سوققان ەل اعالارىنىڭ كومەگى اۋاداي قاجەت.

باقىت قۇرماشۇلى. ىقتيارحاتتى كوشەدەن ەمەس، مەملەكەتتىك مەكەمەدەن الدىق

- 2015 جىلدارى الماتىدان تۇراقتى تىركەۋگە تۇرىپ، ىقتيارحات الۋ مۇمكىن ەمەس بولاتىن. تانىس ادامدار ارقىلى تارازدا ىقتيارحات جاساتۋعا بولاتىنىن ءبىلىپ، ورلەۋ دەگەن جىگىتكە جولىقتىم. اقشا بەرسەڭ، قۇجاتتارىڭدى تۋرالاپ بەرەمىن دەدى. ىقتيارحات جاساتۋ ءۇشىن 130 مىڭ تەڭگە سۇرادى. اقشاسىن تولەپ، قۇجاتتارىمدى بەردىم. ەكى جارىم ايدا كەيىن تارازعا بارىپ، سۋرەتكە ءتۇستىم. ول جەردە ەلەكتروندى قول قويعىزادى ەكەن. ارادا ءبىر اي وتكەن سوڭ، قولىما ىقتيارحات ءتيدى.

سوسىن ول جەردەن تالون بەردى. سول تالوندى الىپ، الماتىعا كەلىپ قۇجاتتارىمدى جينادىم. قۇجاتتار دايىن بولعان سوڭ، ازاماتتىققا تاپسىرىپ ەدىم، كوشى-قونداعى كەيبىر قىزمەتكەرلەردىڭ ءىستى بولىپ جاتقانىن ەستىدىم. «سوت اياقتالماي، ەشتەڭە جاساي المايمىز» دەدى.

ەندى، ءوزىڭىز قاراڭىز. مەن قولدى قويۋعا باسقا جەرگە ەمەس، كوشى-قون پوليتسياسىنىڭ مەكەمەسىنە باردىم عوي. وسى ىقتيارحاتپەن بىرنەشە رەت قىتايعا بارىپ كەلدىم. بانكتەن دەپوزيت تە اشتىم. سونىڭ بارىنە جارامدى بولعان قۇجات ەندى نەگە جالعان بولىپ شىققانىن تۇسىنبەيمىن.

ءىستى بولعان ادامدار ءبىزدىڭ دەلونى ورتەپ جىبەردى مە، تىعىپ قويدى ما بىلمەيمىز. ايتپەسە، بىزبەن قاتار تارازدان ىقتيارحات جاساتقان كوپ ادام ازاماتتىعىن الىپ الدى. ولاردىكى قالاي ىسكە استى، ءبىز نەگە تۇتىلىپ وتىرمىز. ءتۇسىنۋ قيىن.

قازاقستانعا قىتايدان كەلۋدەگى ماقساتىمىز اقشا تابۋ ەمەس ەدى. وسى ەلدە ءبىرجولا قالامىز، ءوسىپ-ونەمىز دەپ كەلدىك. بۇل – ءبىزدىڭ وتانىمىز. ءوز وتانىمىزدان كۇشپەن شىعارىلساق، قىتايدا ءبىزدى تۇرمە كۇتىپ تۇر. ءبىزدىڭ ول جاقتا ءتىرى قالاتىنىمىزعا ەشكىم كەپىلدىك بەرە المايدى. قازىر كوپتەگەن قازاقتاردى كەدەننەن وتە سالا باسىنا قارا پاكەت كيگىزىپ الىپ كەتىپ جاتقانىن ەستىپ جاتىرمىز. قايدا اكەتتى، قاي جاقتىڭ تۇرمەسىنە جاپتى - ەشكىم بىلمەيدى. ءوزىمىزدى عانا ءىستى قىلسا جارايدى، ەل جۇرتقا بارىپ ءوسىپ-ءونسىن دەگەن نيەتپەن ءبىزدى قازاقستانعا جىبەرگەن اكە-شەشەمىزگە، تۋىستارىمىزعا زارارىمىز تيەتىن بولدى.

قازىرگى قولىمىزداعى ىقتيارحاتتى قايتارىپ الىپ، ايىپپۇل سالسىن. قايتادان قۇجات جيناۋعا مۇمكىندىك بەرسىن. ءۇش جارىم جىل ءبىر جەردە جۇمىس جاساپ جاتىرمىن. ءبىر جەردە تۇرىپ كەلەمىن. قازاقستاننىڭ ەشقانداي زاڭىن بۇزعان ەمەسپىن. مەنىڭ بار كىنام، اقشا بەرىپ ىقتيارحات جاساتۋ بولىپ وتىر. مەن عانا ەمەس، بۇكىل قانداستار قۇجاتتارىن اقشامەن جاساتىپ جۇرگەنى قازىر ەشكىمگە جاسىرىن ەمەس قوي. بىزگە قانداي جازا قولدانسا دا، تاريحي وتانىمىزدا قالدىرۋدى سۇرايمىز.

گۇلنار ادىلەتقىزى. ەكى ۇلىممەن ايرىلامىن با دەپ قورقامىن  

- تاريحي وتانىما ورالۋدى ورتا مەكتەپتە وقىپ ءجۇرىپ ارماندادىم. 2013 جىلى بالام ەلارىس ءبىرىنشى سىنىپقا باراتىن بولدى. سول سەبەپتى دە، سەگىزىنشى ايدا جەدەل قازاقستانعا كوشىپ كەتتىك. ونداعى جالعىز ماقساتىمىز – بالامدى قازاق ەلىنىڭ مەكتەبىندە وقىتۋ ەدى. بىزگە بەرىلگەن ۆيزا ۋاقىتى ءبىر جىلعا عانا جارامدى ەدى. الماتىعا كەلگەن سوڭ نە ۆيزانىڭ ۋاقىتىن ۇزارتا المادىق، نە تۇراقتى تىركەۋگە تۇرا المادىق. «ۆيزاڭدى ۇزارتپايمىز، شەكارادان شىعىپ كەت» دەدى. قىتايعا قايتار جول قالدىرماي ءبىرجولا كەلگەن ەدىم. بالام مەكتەپتە وقىپ جاتقاندىقتان نە بولسا دا تاريحي وتانىمىز وزەكتەن تەبە قويماس دەپ جارتى جىل ۆيزاسىز ءجۇردىم. سول كۇندەردەگى باسىمنان وتكەن اۋىر جاعدايلاردى دۇشپانىما دا تىلەمەس ەدىم. جۇرەگىم قان جىلاپ، نە وتانىمدا، نە قىتايدا جوق، بوسقىن ادامداي كۇي كەشتىم.

تارازدا ىقتيارحات بەرەدى ەكەن دەگەن سوڭ، امالدىڭ جوقتىعىنان سول جاققا باردىم. ورلەۋمەن جولىعىپ، 350 مىڭ تەڭگە تولەپ، ءۇش ايدان كەيىن، ياعني 2015 جىلى قولىما ىقتيارحات الدىم. سول كۇنگى قۋانىشىمدى اۋىزبەن ايتىپ جەتكىزۋ مۇمكىن ەمەس. ورالمان كۋالىك قولىما ءتيىپ، وسى كۇنىمە مىڭ شۇكىر ايتىپ جىلاپ تا الدىم. ارادا ءۇش اي وتكەن سوڭ، 2016 جىلى ازاماتتىققا قۇجاتتارىمدى تاپسىردىم. ىقتيارحاتىمنان قاتەلىك شىققانىن ايتتى.

ەكىنشى ۇلىم دۇنيەگە كەلىپ، ەندى قازاقستان ازاماتى بولدىق پا دەگەن كەزدە تاعى باسىمىز سەرگەلدەڭگە ءتۇسىپ وتىر. كۇيەۋىم مەن بالا-شاعام ازاماتتىق الىپ الدى. ەندى ەكى قۇلىنىم شىرىلداپ اناسىنان اجىراپ قالا ما دەپ تۇندە ۇيقىمنان، كۇندىز كۇلكىمنەن ايرىلدىم. نە جازا كورسەك تە، قازاقستاندا بولۋدى، ولسەك تە وسى توپىراققا كومىلۋدى قالايمىز.

بانكتەن دەپوزيت اشىپ، بالاما كۋالىك الۋعا جاراعان ىقتيارحاتىم نەگە ازاماتتىق الۋعا جارامايتىنىن تۇسىنە الماي دالمىن. مەملەكەتتىك مەكەمەگە كىرىپ تۇرىپ، ەلەكتروندى قول قويدىق قوي. سول كەزدە «بۇلار جالعان قۇجات جاساپ جاتىر» دەپ نەگىزگى كىنالى قىلمىسكەرلەردى ۇستايتىندار قايدا قالدى؟ وزگەلەردىڭ كەسىرىنەن وتباسىمىزدىڭ ويرانى شىعايىن دەپ تۇر. بيلىكتەگى اعالارىمىز انالاردىڭ، سابيلەردىڭ كوز جاسىنا قالماسا ەكەن دەيمىن.  

اينۇر مۇقاشقىزى. بالاما اياعىم اۋىر بولعاندىقتان دەلدالدىڭ كومەگىنە جۇگىندىم

- بالا كەزدەن اتا-جۇرتىمىزدى اڭساپ جۇردىك. سول ارمان تىلەگىمىز 2006 جىلى ورىندالىپ، قازاقستانعا ءبىرجولاتا كوشىپ كەلدىم. 2007 جىلى ۇبت-دان ءوتىپ، قوجا احمەت ياسساۋي اتىنداعى قازاق ۇلتتىق ۋنيۆەرسيتەتىنە مەديتسينا ماماندىعى بويىنشا وقۋعا ءتۇستىم.

قازاقستاندا تۇرمىس قۇرىپ، ءبىر ۇل، ءبىر قىزدى بولدىم. جولداسىم، ەكى بالام – قازاقستان ازاماتتارى. 2016 جىلى جۇمىسىما ازاماتتىق الماعانىم قيىندىق تۋعىزدى. ەكىنشى بالاما اياعىم اۋىر بولعاندىقتان دەلدالدىڭ كومەگىنە جۇگىنىپ، تارازدان ىقتيارحات الدىم. ات-بابالارىمىز اق بىلەكتىڭ كۇشىمەن، اق نايزانىڭ ۇشىمەن قورعاعان ازات ەلدىڭ ۇلانى بولۋ ارمانىمىز ەدى. وسى ۇلانعايىر جەرىمىزدە ەركىن ءجۇرىپ تۇرا المايتىن، تەكتى ۇل مەن قىز وسىرە المايتىن جاعدايعا دۋشار بولىپ وتىرمىز. 130-دان اسا دياسپورا وكىلدەرىن سىيعىزعان مەكەنگە قانى دا، جانى دا قازاق ءبىزدىڭ سىيماۋىمىز قاسىرەت ەمەي نەمەنە؟ ماعان قازاقستاننان تەك «قازاقستان ازاماتى» دەگەن قۇجات قانا كەرەك.

مانات ماحپۋداۇلى. 7 جىل قازاقستاندا ءبىلىم الدىم

– ۇيلەنگەنمىن. ءبىر بالام بار. جولداسىم مەن بالام – قازاقستان ازاماتتارى. 2007 جىلى وقۋعا ءتۇسىپ، 7 جىل قازاقستاندا ءبىلىم الدىم. وقۋ ورنىنا تىركەلگەن قۇجاتپەن ازاماتتىق الۋ مۇمكىن بولماعاندىقتان ازاماتتىق الۋىم كەشەۋىلدەپ قالا بەردى. وقۋ ورنىنىڭ جاتاقحاناسىنان شىعىپ، باسقا جەرگە تۇراقتى تىركەۋگە تۇرۋ وتە قيىن ەدى، ول كەزدە. ەشبىر تانىسىم بولماعاندىقتان دالادا قالمايىن دەپ وقۋىمدى وقىپ جۇرە بەردىم. وقۋىم بىتكەن سوڭ، ازاماتتىق الۋ ءۇشىن ىزدەنە باستادىم. بەرىلگەن ۆيزا ۋاقىتى ءبىتىپ بارا جاتتى. قىسقا مەرزىمدە ۆيزانى ۇزارتۋ مۇمكىن بولمادى. سول كەزدەگى زاڭ بويىنشا الدىمەن ىقتيارحات الۋ كەرەك ەدى. الماتى مەن الماتى وبلىسىندا ىقتيارحات بەرمەي جاتقاندىقتان، جامبىل وبلىسى ارقىلى قۇجاتتارىمدى ازىرلەدىم. ورلەۋ دەگەن جىگىتكە اقشامدى بەرىپ، 2015 جىلدىڭ شىلدە ايىندا ىقتيارحاتقا قۇجاتتارىمدى وتكىزدىم. قاراشانىڭ باسىندا ىقتيارحات الىپ، ازاماتتىققا تاپسىرماق بولىپ ەدىم، تاعى اقشا سۇرادى. امالسىز تۇراقتى تىركەۋىمدى الماتى وبلىسىنا اۋىستىرماق بولىپ ەدىم، وعان مۇمكىندىك بولمادى. قۇلان اۋدانىنان تانىس تاۋىپ، سول جاقتان ازاماتتىققا قۇجات وتكىزبەك بولعانىمدا مەنى تۇراقتى تىركەۋدەن شىعارىپ جىبەرگەنىن ءبىلدىم. ءبىزدىڭ قۇجاتتارىمىزدى دايىنداعان ينسپەكتور ءىستى بولىپ كەتىپتى. ەندى سونىڭ زارارىن تالاي وتباسى تارتىپ جاتىر.

قاستەر بىرلىكۇلى. ايەلىم زار ەڭىرەپ جىلاپ جاتىر

- 2014 جىلى قازاقستانعا وتباسىممەن ورالدىم. قىتايدا ءبىر بالالى بولعان ەدىم. ەكىنشى بالام وسىندا دۇنيەگە كەلدى. ءبىز كەلگەندە الماتى وبلىسىندا تۇراقتى تىركەۋگە تۇرۋ مۇمكىن بولمادى. بۇل جاقتا ەشقانداي تانىسىمىز بولماعاندىقتان ءارى ۆيزانىڭ ۋاقىتى ءبىتىپ بارا جاتقاندىقتان، ونىڭ ۇستىنە ايەلىم بوساناتىن كەز كەلگەندىكتەن جامبىل وبلىسىنا بارىپ، ىقتيارحات الۋعا قۇجات تاپسىردىق. كەشەلى بەرى جامبىل وبلىستىق ىشكى ىستەر دەپارتامەنتىنىڭ كوشى-قون پوليتسياسى وزدەرىنىڭ باسىن اراشالاپ، جالعان قۇجات جاساعان جوقپىز دەگەندى ەستىپ، ايەلىم زار ەڭىرەپ جىلاپ جاتىر. ەندىگى كۇنىمىز نە بولارىن مەن دە بىلمەيمىن.

ءتۇيىن ورنىنا

كەشە ءبىزدىڭ پورتالىمىزدىڭ ەلەكتروندى پوشتاسىنا "اbai.kz ارقىلى اراشا سۇرايمىز!" دەگەن حات كەلىپ ءتۇستى. 

"قۇرمەتتى، اbai.kz اقپاراتتىق پورتالىنىڭ قىزمەتكەرلەرى!

تاريحي وتانىنا كوشىپ كەلگەن 250 وتباسى سىزدەر ارقىلى اراشا سۇرايدى. ءبىز وتانىمىزعا كوشىپ كەلىپ، جامبىل وبلىسىنان ىقتيارحات الامىز دەپ، باسىمىز داۋعا قالىپ وتىر.

ءبىز، بىرىنشىدەن، بۇل جاقتىڭ جازۋ-سىزۋىن بىلمەگەندىكتەن دە قۇجات جيناۋ بارىسىندا حاتتامالار تولتىرۋ سەكىلدى ماسەلەلەردە قيىندىقتارعا تاپ بولىپ، دەلدالداردىڭ كومەگىنە جۇگىنۋگە ءماجبۇر بولعانىمىز انىق.

ەكىنشىدەن، قازاقستاننىڭ زاڭىن تولىق بىلمەگەندىكتەن، قۇجات وتكىزۋدە حابارى بار ادامداردىڭ كومەگىنە جۇگىنۋگە تۋرا كەلدى.

قازاقستان رەسپۋبليكاسىندا تۇراقتاپ تۇرۋعا قۇقىق بەرەتىن ىقتيارحات قولىمىزعا تيگەن سوڭ، ازاماتتىق الۋ ءۇشىن قۇجاتتارىمىزدى ءتيىستى ورگانعا تاپسىرىپ ەدىك، ءبىزدىڭ ىقتيارحاتىمىز تىركەلمەگەن بولىپ شىقتى.

قازىر وت پەن سۋدىڭ ورتاسىندا قالدىق. نە جۇمىسقا تۇرا المايمىز، بالالارىمىزدى مەكتەپكە بەرۋ ماسەلەسىندە دە قيىندىقتار تۋىپ جاتىر" دەلىنگەن ول حاتتا.

سول حاتتى ىندەتە زەرتتەپ، جوعارىداعى ازاماتتاردان سۇحبات الدىق.

قازاق ەلى قانداي جاعداي بولماسىن انالاردىڭ كوز جاسىنا قالماۋى كەرەك. ءبىر وتباسىن ەكىگە ءبولىپ، ءوز قانداستارىمىزدى وققا بايلاپ بەرگەننەن گورى وسى ءىستى بىلىقتىرعان كىنالى ادامداردى تاۋىپ، جازاعا تارتقان وڭاي.

جامبىل وبلىستىق ىشكى ىستەر دەپارتامەنتى ءوز باسىن داۋدان اراشالاۋ ءۇشىن قانداستاردىڭ باسىن بايگەگە تىكپەۋى كەرەك.

"جامبىل وبلىسىنان ىقتيارحات جاساتامىز" دەپ باسى داۋعا قالعان قانداس باۋىرلاردىڭ باسقوسۋى

گۇلجانات قالي ءوزىنىڭ ەمەس، قوس ءبۇلدىرشىنىنىڭ تاعدىرىنا الاڭدايدى

سەرىكحان سامارحان مەن سارا تۇڭعىشباي قازاق ەلىنە ءىستى بولۋ ءۇشىن ەمەس، ءوسىپ-ءونۋ ءۇشىن كەلگەنىن ايتادى. 

س

ۇلپان جەكسەنباي "انانى باۋىر ەتى بالاسىنان ايىراتىن اۋىر احۋال باسىمىزعا ءتۇسىپ وتىر" دەپ شىرىلدايدى

قاستەر بىرلىكۇلى بالالارىنىڭ تاعدىرى ءۇشىن بارىنە دايىن

ەرزات زاتايۇلى "قىتايعا بارعاننان كەيىن ول ەل ءبىزدىڭ باسىمىزدان سيپاماسى انىق" دەيدى.

جەتى جىل قازاقستاندا ءبىلىم العان اينۇر مۇقاش قۇدايدان دا، قازاقستان ۇكىمەتىنىڭ قامقورلىعىنان دا كۇدەر ۇزىگىسى كەلمەيدى.

ورىمدەي جاستار، جاس وتباسىلار قىتاي ەلىنە ەمەس، بىزگە كەرەك. مىنا سۋرەتتەگىلەردىڭ ەشقايسىسى قىلمىسكەر ەمەس، قىلمىسكەرلەر - مەملەكەتتىك قىزمەتتە وتىرىپ، اقشا ساۋعان شەندى-شەكپەندىلەر بولسا كەرەك...

دايىنداعان قانات بىرلىكۇلى

Abai.kz