راسىندا قازاقتا كەڭ قولتىق، اشىق قول اتىمتاي ازاماتتار از بولماعان. الاش قوزعالىسىنا 1905 جىلدان باستاپ قولداۋ كورسەتكەن قازاق بايلارى قاتارىندا جەتىسۋداعى مامان بايدىڭ بالالارى بۇگىنگى قازاق مەتسەناتتارىنىڭ ناق ۇلگىسى دەسەك، ولار الاش ميليتسياسىن جاساقتاۋ ىسىندە اسكەري كومەك كورسەتكەن، حح عاسىردىڭ 20-30 جىلدارىندا سوۆەتتىك ءباسپاسوز تاراپىنان ناقاق ايىپتالعان.

دەسە دە كەشەگى مامان بايدىڭ بالالارىنىڭ مارتتىگى قانىنا سىڭگەن ۇرپاق ارامىزدا ءجۇر بۇگىندە. ول – ءسابيت سۇلتان. جەتىسۋ توپىراعىندا تۋىپ، جامبىل جەرىندە جۇرگەن اتىمتاي ازامات جايلى ءسوز ەتپەكپىز.

قازىرگى قوعامنىڭ قىل وڭەشىندە قىلتاناقتاي قالقيىپ تۇرعان قاساڭ قاعيدا – ابىرويدى اقشامەن، دارەجەنى دۇنيەمەن سالىستىرۋ. سوندايلارعا ۇلگى رەتىندە يگى ىستەرىمەن اتى شىققان ازامات – ءسابيت سۇلتاندى بىرەۋ بىلسە، بىرەۋ بىلە بەرمەيدى. قازاقتا «جاقسىنىڭ جاقسىلىعىن ايت» دەگەن ءسوز بار. ءبىز بۇگىن ايتامىز. مۇنىمىز وعاش بولماس.

تاۋەلسىزدىكتىڭ ەلەڭ-الاڭ شاعىندا ابدىراپ قالعان حالىق اراسىنان الدىمەن ەس جيىپ، جان-جاعىنا قاراپ ۇلگەرگەندەر شارۋامەن اينالىسا باستادى. ولاردىڭ ىشىندەگى ءىسىن ءساتتى جۇرگىزگەندەر بۇگىندە داۋلەتتى ادامدارعا اينالىپ، ەل-حالقىنىڭ، مەملەكەتىنىڭ دە دامۋىنا ۇلەس قوسىپ كەلەدى. سولاردىڭ ءبىرى دە بىرەگەيى – ساكەڭ ەدى. ساكەڭ بايلىعىن باسىپ جەمەي، شاشىپ جەگەندەردىڭ سورتىنان. ولايشا داراقى ماقتاۋىمىزدىڭ دا سەبەبى بار.

وتكەن جولى پرەزيدەنتپەن كەزدەسىپ، ارمان-تىلەگىن اقتارىپ العان جاقسىلىق ۇشكەمپىروۆتىڭ اۋزىنان «5000 كاسىپكەر 5000 اۋىلدى گۇلدەندىرسە» دەگەن تىلەك-ءسوز ايتىلعان-دى. ءسابيت سۇلتان ءوز اۋىلىنىڭ اجارىن كىرگىزىپ، اۋىز تولتىرىپ ايتارلىق جۇمىس جاساعان ازامات.

جامبىل وبلىسىنا قاراستى تۇرار رىسقۇلوۆ اۋدانىندا يۋبيلەينىي دەگەن اۋىل بار. ساكەڭنىڭ شارۋاشىلىعى دا سوندا ەدى. مۇندا 2013 جىلعا دەيىن وبلىستاعى ەڭ وزىق «پودگورنىي» اق اتتى سەرىكتەستىك جۇمىس جاساپ تۇردى. يەلىگىندە 5 مىڭ باس قوي، 2 مىڭ باس ءىرى-قارا، مىڭ باس جىلقى بولعان. ءتىپتى ءسۇت وڭدەيتىن ارنايى زاۋىت اۋىل تۇرعىندارىن جۇمىسپەن قامتىپ تۇردى. ەگىستىكتەن جيىلعان ءداندى الىپساتارلاردىڭ تيىن-تەبەنىنە بەرمەس ءۇشىن، 500 مىڭ دوللارعا استىق قابىلداۋ پۋنكتىن اشىپ، تاۋلىگىنە 60-70 توننا بيداي تارتىپ وتىرعان. جوعارى سۇرىپتى ۇننىڭ 3 سورتى وندىرىلەتىن. ودان بولەك اۋدان ورتالىعى قۇلاندىدا شۇجىق زاۋىتى بولعان. بۇرىن «پودگورنىيدىڭ» فەرماسىنان ەت كەلىپ، شۇجىققا پايدالانىلاتىن. زاۋىت قازىر دە جۇمىس ىستەپ تۇر ەكەن. تەك ەتتى باسقا تاسىمالداۋشىلاردان الىپ وتىر. ال اۋداننىڭ ءوز كاسىپكەرلەرى الدەبىر اتىگورلەردىڭ كەسىرىنەن قىپ-قىزىل شىعىنعا باتىپ وتىرعان كورىنەدى. ەندى وسىلار جايلى جاي-جاپسارىمەن ايتايىق.

سوناۋ توقسانىنشى جىلدارى اۋىلشارۋاشىلىق قوجالىقتارى جەكەشەلەندىرۋگە تۇسكەندە، تالان-تاراجعا تۇسپەگەن جالعىز پودگورنىي سوۆحوزى ەكەن. اۋىلداعى 367 ەڭبەكشى بىرىگىپ ءارى قاراي جۇمىس ىستەي بەرۋدى ءجون كورگەن. ءسويتىپ اكتسيونەرلىك ۇيىم قۇرعان. ونى 1995 جىلدىڭ 7-جەلتوقسانى كۇنى جامبىل وبلىستىق ادىلەت باسقارماسىنا تىركەتەدى. ونىڭ باسىندا ءسابيت سۇلتان مىرزا بولعان. 2004 جىلى 5-قازاندا اكتسيونەرلەردىڭ جيىنى ءوتىپ، 27-قازان كۇنى «پودگورنىي» اق اتىمەن قايتا تىركەلەدى. ايتپاقشى، وسى جيىندا كەلىسكەندەي، اق قايتادان جشس بولىپ قايتا قۇرىلعان.

1994 جىلى پارلامەنتتىڭ قابىلداعان جەر كودەكسىنە سايكەس، 1995 جىلدىڭ 1-قاڭتارىنا دەيىن پاي ۇلەسكەرلەرى نە جەردى ساتىپ الۋى نەمەسە جشس قۇرامىنا ەنۋى ءتيىس بولدى. ويتپەگەندە، ۇكىمەت ول جەرلەردى قايتارىپ الۋعا قۇقىلى ەدى. ءسويتىپ، جشس قۇرىلادى. «پودگورنىي» ەليتتىق ءداندى-داقىلدار شارۋاشىلىعى» رەتىندە تىركەلگەن وبلىستا جالعىز شارۋا قوجالىق وسى ەدى. قازىر دە سولاي. كۇنى-بۇگىنگە دەيىن وبلىستا باسقا ەليتتىق ءداندى-داقىلدار وندىرەتىن شارۋاشىلىق جوق.

«ەدى» دەپ وتكەن شاققا سالۋىمىزدىڭ سەبەبى بار. اكىرەڭدەگەن الدەبىرەۋلەر اپەرباقاندىققا سالىپ،  بۇكىل اۋىل بىرىگىپ حالىقارالىق دارگەيگە جەتكىزگەن شارۋاشىلىقتىڭ جۇمىسىن تەجەپ، تالاسقا سالعان. ول تۋرالى وتكەن جولى كەڭەيتىپ جازدىق. (Abai.kz).

ەل-جۇرت ءسابيت سۇلتاندى مەتسەنات دەپ قاتتى قۇرمەتتەيدى. ونىسى راس تا. «پودگورنىي» اكتسيونەرلىك قوعامىنىڭ يەلىگىندە 15 مىڭ گەكتار جەر بولعان. بۇل 2013 جىلعا دەيىن ەدى. قازىر جەردەگى ۇلەسكەرلەر جان-جاققا تاراپ كەتكەن. 370 اكتسيونەر، ونىڭ ىشىندە 170-ءىنىڭ پايدان ۇلەسى بار ەدى.

ءسابيت سۇلتان مىرزا كۇنى كەشەگە دەيىن 150-دەن استام ادامدى جۇمىسپەن قامتىپ كەلدى. ولار باسقا جاقتان كەلگەن جوق. ءوز اۋىلداستارى.

جوعارىدا ايتقانداي ءىرى مال شارۋاشىلىعى بولدى. 5 مىڭ قوي، 2 مىڭ ءىرى-قارا، 1000 جىلقى ۇستادى. 2013 جىلى ليزينگكە قۇنى 3 ميلليون دوللاردى قۇرايتىن امەريكالىق تەحنيكا ساتىپ العان.

ءدال سول جىلى داۋكەستەر كوزتويماستىققا سالىپ، تالاس جاساعاندا جەردەن ايىرىلىپ قالادى. ءسويتىپ، سۋ جاڭا تەحنيكا قازىر گاراجدا قاڭىراپ تۇر ەكەن. تەحنيكانىڭ اقىسىن تولەۋ ءۇشىن قوراداعى مال شىعىندالادى. اقىرى مال باسى 2 ەسەگە ازايعان. سەبەپ سول – جايىلاتىن جەر جوق. جەم-ءشوبى تاعى بار. ونىڭ ۇستىنە ارىزدى تولەۋ تاعى كەرەك.

ساكەڭ باسشىلىق ەتىپ ءسۇت زاۋىتىن اشقان. دالىرەك ايتساق، اۋداندا قاڭىراپ تۇرعان زاۋىتتا اۋكتسيون ارقىلى ساتىپ الىپ، كۇردەلى جوندەۋدەن وتكىزەدى. جاڭا تەحنيكا ساتىپ الىپ ورنالاستىرادى. بۇعان شامامەن 1 ميلليون دوللار جۇمسايدى. مۇندا دا 40-50 شاقتى ادامدى جۇمىسپەن قامتيدى. ولار دا اۋىل ازاماتتارى ەدى.

جشس قىزمەتكەرلەرىنە دەپ 100 پاتەر سالىپ بەرگەنى تاعى راس. «پودگورنىي» جشس قاراماعىنا كىرەتىن «پودگورنىي-قۇرىلىس» كومپانياسى اۋدان اكىمشىلىگىن سالۋمەن اينالىسقان ەكەن. جالپى شىعىننىڭ 50 پايىزى «پودگورنىيدىڭ» ەسەبىنەن بولعان.

سۋ جاڭا مادەنيەت ءۇيىن سالعان. بۇعان كەتكەن شىعىن 1,5 ميلليون دوللاردى قۇراپتى. سول مادەنيەت ءۇيىنىڭ قىزىعىن كۇنى بۇگىنگە دەيىن اۋىل جۇرتشىلىعى كورىپ وتىر.

اۋىلعا گاز جۇيەسىن كىرگىزىپ، قۇبىر تارتقىزعان. بۇعان شامامەن 2 ميلليون دوللار جۇمسايدى. بۇل دا اۋىلداستاردىڭ يگىلىگى ءۇشىن جاساعان جۇمىس.

اۋىز سۋ قۇبىرىن كىرگىزەدى. جالپى سوماسى 500 مىڭ اقش دوللارىن شىعىندايدى. وبلىستا تەڭدەسى جوق 2 مەشىت سالعانىن ءبىز ەمەس، اۋىلداستارى ايتىپ ءجۇر. بىلۋىمىزشە بۇل ءۇشىن مەتسەنەت 1 ميلليون دوللار جۇمساعان.

ءسوزىمىز سۇيىق شىقپاس ءۇشىن، جوعارىدا ءسابيت سۇلتاننىڭ  اتىمتايلىعىنان ءبىراز دايەك كەلتىردىك. دەسە دە قازاقتا «وڭ قولىم بەرگەندى سول قولىم كورمەسىن» دەگەن ءسوز بار. ساكەڭ دە سول سالتتان جاڭىلماعان جىگىت.

ءسوزىمىزدىڭ سوڭىن مامان بايدىڭ بالالارىنىڭ مەتسەناتتىعىنا قايتا بۇرساق، ولار قازاق حالقىنىڭ قوعامدىق-ساياسي، مادەني ومىرىندە بولىپ جاتقان ايتۋلى شارالاردا ۇلت زيالىلارىمەن قاتار تىزە ءتۇيىستىرىپ، ەل مۇددەسىن قورعاۋدا ايانىپ قالماعان. ءتىپتى، الاش اۆتونومياسى جاريالانىپ، مەملەكەتتىك قۇرىلىمدى جاساقتاۋدا الاشوردا ۇكىمەتى ءۇشىن ۇلتتىق ينۆەستور بولدى. سونداي الاش مۇددەسىنە قامقورلىق تانىتىپ، بارىنشا ماتەريالدىق جانە قارجىلىق تۇرعىدا قولداۋ كورسەتكەن.

قازاق بايلارىنىڭ مەتسەناتتىعى سول - قازاق ءباسپاسوزىنىڭ وركەندەۋىنە، ۇلت مادەنيەتىنىڭ دامۋىنا قارجىلىق قولداۋ جاساعانى. بۇل تۇرعىدا 1913-1918 جىلدار ارالىعىندا 265 ءنومىرى جارىق كورگەن «قازاق» گازەتىنىڭ جارىققا شىعۋىنا جانە ەل ىشىنە تارالۋىنا ىقپال ەتكەن اۋقاتتى قازاقتاردىڭ بولعانى شىندىق. ماسەلەن، «قازاق» گازەتىنىڭ 1915 جىلعى سانىندا «اۋقاتتى الاش ازاماتتارىنا» اتتى ماقالادا گازەت ىسىنە قارجىلاي جاردەمدەسۋ جونىندە ۇندەۋ جاريالانادى. كومەك بەرۋشىلەر قاتارىندا ەسەنعۇل قاجى باستاعان مامان بايدىڭ بالالارى بەلسەندىلىك تانىتقانى ايتىلادى.

مىنە، الاش مەتسەناتتارىن تۋعان توپىراق ءسابيت سۇلتاندى دا دا تۋعان.  ساكەڭ بۇگىنگى قازاق جۇرتىنىڭ قامقورشىسى. جوق-جىتىكتى تۇگەندەۋشى، جەتىم-جەسىردى جارىلقاۋشى. بۇگىنگى باسپاناسىز قازاقتىڭ ينۆەستورى. مۇنىسى ۇلتتىق دەڭگەيدە ايتىلىپ تا ءجۇر.

گرەكتە «فيلانتروپ» دەگەن ءسوز بار. قازاقشاعا قوتارعاندا - «جاقسى كورۋ، ۇناتۋ» دەگەن ۇعىم بەرەدى. ءوز قازاعىن، ءوز اۋىلداستارىن، ءوز ۇلتىن ەرەكشە سۇيەتىن – ساكەڭدى سول فيلانتروپ دەسەك ابدەن لايىق. مەملەكەت بەرگەن دارداي اتاقتارىن جىپكە ءتىزىپ جاتپادىق. سەبەبى، اۋىلداعى اعايىننىڭ اقجارما تىلەگى، اق باتاسى اتاق-شەننەن مىڭ مارتە قۇرمەتتى.

وكىنىشكە وراي، وسىنداي تابىسقا يە بولىپ، رەسپۋبليكاداعى اۋىلشارۋاشىلىق سەكتورىنا ايتارلىقتاي تابىس اكەلىپ وتىرعان شارۋاشىلىق كۇيرەگەن.  تۇپ-تۋرا 5 جىل بۇرىن. شارۋاشىلىقتىڭ شارۋاسىنىڭ شايقالۋىنا بىردەن ءبىر سەبەپ – قايسىبىر شەندى مىرزانىڭ «رەيدەرلىك» ارەكەتى بولعان.

وسى رەتتە ءسابيت سۇلتان مىرزانىڭ پرەزيدەنتتىڭ اتىنا جازعان اراشا حاتىن جاريالاۋدى، ءسوزدىڭ ءتۇيىنىن سولاي كەلتىرۋدى ءجون كوردىك.

اشىق حات

قۇرمەتتى ەلباسى، نۇرسۇلتان اعا!

مەن ءسابيت سۇلتان، تاۋەلسىز قازاقستانىمىزدىڭ  اۋىلشارۋاشىلىعىنا ءوز ۇلەسىمدى قوسىپ جۇرگەن ازاماتپىن.

ءوزىڭىز ەكى مارتە ارنايى كەلىپ، كورىپ، وڭ باعاڭىزدى، اق باتاڭىزدى بەرىپ كەتكەن جامبىل وبلىسى، تۇرار رىسقۇلوۆ اۋدانىنداعى «پودگورنىي» جشس بۇگىندە اشكوزدەردىڭ تالان-تاراجىسىنا ءتۇسىپ جاتىر. بۇگىن وزىڭىزدەن اراشا سۇراي وسى ءبىر ءۇشبۋ حاتتى جازىپ وتىرمىن.

قۇرمەتتى ەلباسى، مەن بۇگىن وزىڭىزگە ۇلكەن ءۇمىت ارقالاي وتىرىپ، حات جازىپ وتىرمىن. ءسىز ەلىمىز تاۋەلسىزدىك العان العاشقى جىلداردان باستاپ-اق، بىزگە كومەگىڭىزدى كورسەتىپ، اقىلىڭىزبەن جول سىلتەپ كەلەسىز. بۇگىن دە وزىڭىزگە قايرىلماقپىن.

ءوزىڭىز بىلەتىندەي، مەن تاۋەلسىزدىكتىڭ العاشقى جىلدارىنان باستاپ ءوزىڭىزدىڭ قاسىڭىزدان تابىلدىم. ءوزىڭىزدىڭ قاسىڭىزعا ەرىپ، شەتەلدەرگە ساپارلارعا شىقتىم. ءسىزدىڭ تىكەلەي تاپسىرماڭىز بويىنشا، تاجىربيە الماسۋ، شەتەلدىك ينۆەستورلاردى ەلگە اكەلۋ ىسىنە ەڭ ءبىرىنشى بولىپ كىرىسكەندەردىڭ ءبىرىمىن. قازاقستانعا اۋىلشارۋاشىلىق سەكتورىنا العاش بولىپ شەتەلدىك ينۆەستور اكەلدىم. ءوزىڭىزدىڭ قامقورلىعىڭىزبەن جانە قولداۋىڭىزبەن اقش-قا بارىپ، ارنايى حالىقارالىق بيزنەس مەكتەپتەن ءبىلىم الىپ كەلىپ، سول ءبىلىمىمدى قازاقستاننىڭ اۋىلشارۋاشىلىق سەكتورىن دامىتۋعا پايدالاندىم. اۋىل تۇرعىندارىنىڭ جاعدايىن جاساۋعا بار كۇشىمدى سالدىم.

قۇرمەتتى ەلباسى، نۇرسۇلتان اعا!

«پودگورنىيعا»جشس-عا ءوزىڭىز ارنايى ەكى رەت كەلىپ ەدىڭىز. ءبىرىنشى جولى ششۇجىق زاۋىتىن ءوزى اشتىڭىز. ەكىنشىدە، ءبىزدىڭ شارۋا قوجالىعىمىزدىڭ تىنىس-تىرشىلىگىمەن تانىسىپ قايتتىڭىز. وڭ باعاسىن بەرگەن ەدىڭىز. ءبىز دە سول قارقىمەن، سول قولداۋمەن جۇمىس ىستەپ كەلدىك.

مەن ءوزىڭىزدىڭ تاپسىرماڭىز بويىنشا قازارگو حولدينگتەن 3 ميلليون دوللارعا ليزينگپەن امەريكاندىق تەحنيكا العان ەدىم. قازىر سول تەحنيكانىڭ بارلىعى بەكەر تۇر. سەبەبى، شارۋاشىلىقتى الدەبىر دوكەيلەر بارىمتالاماق بولىپ، قازىر جۇمىس توقتاپ قالعان. ءبىر كەزدەرى گۇلدەنىپ تۇرعان اۋىل قازىر ادام تانىماستاي كۇيگە تۇسكەن. ءوزىڭىز كورگەن، ءوزىڭىز اشقان سول شارۋاشىلىقتىڭ بۇگىنگى كۇيىن كورسەڭىز، تانىماي قالاسىز.

قۇرمەتتى ەلباسى! بىزدەگى تەحنيكا ءوزىڭىز بىلەتىندەي وزىق ساپالى. قازىردىڭ وزىندە وبلىستا ەكى-ءۇش شارۋاشىلىقتا عانا بار شىعار، بۇنداي تەحنيكا. قالعاندارىنىڭ بارلىعىندا سوۆەت وكىمەتىنەن قالعان ەسكى-قۇسقى كومبايندار مەن تراكتورلار.

مىنە، وسى شارۋاشىلىقتىڭ قازىر  جۇمىسى تۇرالاپ تۇر. ماشينا-تراكتور ستانساسى قاڭىراپ، گاراجدار ۇڭىرەيىپ، ناۋبايحانانىڭ ويرانى شىققان.

قۇرمەتتى ەلباسى!

ءبىزدىڭ ىسىمىزگە كوز الارتقاندار جشس جۇمىسىنا بارىنشا كەدەرگى كەلتىرىپ جاتىر. راس، العاشقىدا پايشىلارعا بەرەشەگىم بولدى.سودان سىنىقتان-سىلتاۋ ىزدەگەندەر ۇزىن-سونار سوت پروتسەسسىن باستاپ كەتتى. اراعا ىرىتكى سالعاندار پايشىلاردىڭ ىشىنەن ەكى ازامات 2004-جىلعى 5-قازانداعى شەشىمدى تەرىستەۋ جايلى ارىزدانادى. ەندى رەت-رەتىمەن ايتايىن:

2013 جىلدىڭ 28-اقپانى. جامبىل وبلىسىنىڭ اۋدانارالىق مامانداندىرىلعان ەكونوميكالىق سوتى شەشىم شىعارىپ، پايشىلارعا 14 ميلليون 524 مىڭ 775 تەڭگە جانە مەملەكەتتىك الىم تولەۋىم كەرەك بولادى. مەن بۇل سومانى تۇگەلىمەن تولەدىم.

2013 جىلدىڭ 22-مامىرى. جامبىل وبلىستىق سوتىنىڭ ازاماتتىق جانە اكىمشىلىك ىستەر جونىندەگى سوت القاسى شەشىم شىعارىپ،  الدىڭعى سوت شەشىمىن وزگەرتەدى. ول بويىنشا، اۋەلدە كەلىسىلگەن 5,6 پايىزى – جەر ۇلەسىنەن، 94,4 پايىزى دەگەن قوعامنىڭ نەگىزگى قور ءتۇرىن­دەگى ۇلەسىنەن دەگەن حاتتاماسى كۇشىن جويعىزدى. سونداي-اق، بانككە جەردى كەپىلگە قويۋ تۋرالى حاتتاما مەن كە­پىلدىك تۋرالى كەلىسىمشارت تا كۇشىن جويدى.

2017 جىلدىڭ 7-قاراشاسى. قر جوعارعى سوتى ازاماتتىق ىستەر جونىندەگى سوت القاسى قاۋلى قابىلداپ، جوعارىداعى حاتتامالاردى تەرىستەدى. وبلىستىق سوت اكتىلەرىن توقتاتادى. ءىستى جامبىل وبلىستىق سوتىنىڭ ازاماتتىق ىستەر جونىندەگى سوت القاسىنا قايتا قاراۋعا جىبەرەدى.

ال 2018 جىلدىڭ 11-قاڭتارى. وبلىستىق سوتتىڭ ازاماتتىق ىستەر جونىندەگى القاسى تاعى سوناۋ 2013 جىلعى شەشىمدى قايتالاپ شىعاردى.

قارىزىمدى ەڭ باسىندا-اق، تولەدىم.  بىراق، سەرىكتەستىك زاڭسىز بولىپ شىقتى. اۋىلداعى تىرشىلىك توقتادى.

جوعارعى سوت ءبىزدىڭ پايدامىزعا شەشىم شىعارعانىمەن، وبلىستىق سوت ەسكى شەشىمدى قايتالاپ وتىر.

قازىر جۇرت جەرلەرىن ءبولىپ العان. مۇلدە بولەك بىرەۋلەرگە جالعا بەرىپ وتىر. ولاردان اۋىلعا كەلىپ-كەتەر پايدا جوق. اۋىل تۇرعىندارى باياعىداي ەمەس، ارقايسىسى جان-جاققا تەنتىرەپ كەتكەن، جۇمىس ىزدەپ. مەنىڭ سۇرايتىنىم بىرەۋ-اق. جامبىل وبلىستىق سوتى جوعارعى سوتتىڭ شەشىمىنە ساي، الدىڭعى ەكى شەشىمدى جوققا شىعارسا دەيمىن عوي. وكىنىشكە وراي، بۇل قيىن بولىپ تۇر قازىر.

ءوزىڭىز بىلتىر كۇزدە وبلىسىمىزعا ارنايى كەلىپ، مۇنداعى شارۋاشىلىقتىڭ جاي-كۇيىن ءوز كوزىڭىزبەن كورىپ، تومەن باعا بەرىپ كەتكەنىڭىزبى بىلەمىن.

ءسىزدىڭ ەلدەگى شاعىن جانە ورتا كاسىپتى دامىتۋعا جاساپ جاتقان تىڭ باستامالارىڭىزدى بىلەمىز. ءسىز ءوز سوزىڭىزدە «كاسىپكەرلەردى ءجون-جوسىقسىز قۋدالاي بەرمەڭدەر» دەپ ءجيى ەسكەرتەسىز. ءتىپتى، بيىلعى جىلعى قازاقستان حالقىنا جاساعان جولداۋىڭىزدا ءدال وسى اۋىلشارۋاشىلىق سەكتورىنا ارنايى باسىمدىق بەردىڭىز. بۇل دا ءسىزدىڭ شارۋاشىلىقتاعى اعايىنعا، بىزگە دەگەن ەرەكشە قامقورلىعىڭىز دەپ ۇعىندىق.

ءسوز ءوز سوزىڭىزدە «اقىلدى تەحنولوگيالار – اگروونەركاسىپ كەشەنىن قارقىندى دامىتۋدىڭ مۇمكىنىگى» دەپ تايعا تاڭبا باسقان كورسەتتىڭىز. ءوزىڭىز بىلەتىندەي ءبىزدىڭ شارۋاشىلىق قازاقستان تاريحىندا ەڭ ءبىرىنشى بولىپ بيدايدى ۆاليۋتاعا ساتقان ەك. قازىر دە شارۋا قوجالىعىمىز امەريكالىق، ەۋروپالىق تەحنيكالارمەن جابدىقتالعان. ءبىز ءسۇت جانە بيداي ونىمدەرىن الەمنىڭ 10 مەملەكەتىنە ەكسپورتقا شىعاردىق. ول دا ءسىزدىڭ تكەلەي قاموورلىعىڭىزبەن بولعان ەدى.

سونداي-اق، جولداۋدا ءسىز «اۋىل شارۋاشىلىعى سۋبەكتىلەرىنىڭ كووپەراتيۆ تۇرىندە جۇمىس ىستەۋىنە جان-جاقتى قولداۋ كورسەتۋ كەرەك» دەپ انىقتاپ ايتقان ەدىڭىز. ءسىزدىڭ وسى قامقورلىعىڭىزدى حات تانيتىن، جولداۋمەن تانىسىپ شىققان ءاربىر ادام بىردەن تۇسىنەرى انىق.

وكىنىشكە وراي، ورتاق ءىس وڭعا باسپاي تۇر. دەسەك تە، بارلىعىن قايتا قالپىنا كەلتىرۋگە ءالى دە بولادى.

اقش پەن ەۋروپادان، اراب ەلدەرىنەن ينۆەستورلار دا بار ەكەن. ولار «پودگورنىيمەن» جۇمىس جاساۋعا دايىن وتىر. ەندىگى جالعىز ءۇمىتىم وزىڭىزدە، قۇرمەتتى نۇرسۇلتان اعا!

قۇرمەتپەن، ءىنىڭىز ءسابيت سۇلتان

Abai.kz