پارلامەنتتىڭ بۇگىنگى جالپى وتىرىسىندا قىزىق وقيعا ورىن الدى. ءماجىلىستىڭ دەپۋتاتى تاڭىربەرگەن بەردىوڭعاروۆ ارىپتەستەرىمەن جارقىن امانداسىپ الىپ، كەڭەس اسكەرىندە قىزمەت جاساعانداردى ايتۋلى مەرەكەلەرىمەن قۇتتىقتاپ وتپەسى بار ما. العاشىندا قانداي مەرەكەنى ايتىپ تۇر دەپ تۇسىنبەي قالعانىمىز راس. سويتسەك ەل الدەقاشان «ۇمىتىپ» كەتكەن «كەڭەس ارمياسى جانە اسكەري تەڭىزى فلوتىنىڭ قۇرىلعان» كۇنى ەكەن عوي بۇگىن. اپىراي، ونى قارا باسىپ قالاي ۇمىتىپ قالعانبىز. «ەستى» دەپۋتاتتىڭ ەسىمىزگە سالعانىنا «شۇكىرشىلىك» ايتتىق ىشىمىزدەن. بىلۋىمىزشە، رەسەي بۇل كۇندى «ۇمىتپاي» جىلدا اتاپ وتەتىن كورىنەدى. ەندەشە ول كۇندى ءبىز قالاي اينالىپ وتپەكپىز. كورشىنىڭ كوڭىلىنە قاراۋ كەرەك ەمەس پە؟ ەگەر دەپۋتات ەسىمىزگە سالماعاندا اۋزىمىز اڭقيىپ «قاستەرلى» كۇنگە ءمان بەرمەي وتە شىعادى ەكەنبىز. جىبەرگەن ولقىلىعىمىزدى حالىق قالاۋلىسى تىگىسىن جاتقىزا مىنبەردەن «سۇيىنشىلەپ» ايتقاندا، تاريحتىڭ قويناۋىنا كەتىپ قالعان «قوي ۇستىنە بوزتورعاي جۇمىرتقالاعان» داۋىرگە ءبىر بارىپ قايتقانداي بولدىق. ەلباسىنىڭ قازاقپەن قازاق انا تىلىندە سويلەسسىن دەگەن «تاپسىرماسىن» ورىنداۋعا قۇلىقسىزدىق تانىتىپ، بۇگىن ۇيرەنگەن ءسوزىن ەرتەسىنە ۇمىتىپ قالا بەرەتىن دەپۋتات مىرزانىڭ تاۋەلسىز ەلدىڭ تورىندەگى سيلى ورىنتاقتا وتىرىپ، تۇلىپقا قاراپ موڭىرەگەن سيىرداي، كەلمەسكە كەتكەن كەڭەستىك كەزەڭنىڭ مەرەكەسىن «پاميتىنەن» وشىرمەۋىن نەگە جورىرىمىزدى بىلمەدىك.

پارلامەنتتىڭ بۇگىنگى جالپى وتىرىسىندا قىزىق وقيعا ورىن الدى. ءماجىلىستىڭ دەپۋتاتى تاڭىربەرگەن بەردىوڭعاروۆ ارىپتەستەرىمەن جارقىن امانداسىپ الىپ، كەڭەس اسكەرىندە قىزمەت جاساعانداردى ايتۋلى مەرەكەلەرىمەن قۇتتىقتاپ وتپەسى بار ما. العاشىندا قانداي مەرەكەنى ايتىپ تۇر دەپ تۇسىنبەي قالعانىمىز راس. سويتسەك ەل الدەقاشان «ۇمىتىپ» كەتكەن «كەڭەس ارمياسى جانە اسكەري تەڭىزى فلوتىنىڭ قۇرىلعان» كۇنى ەكەن عوي بۇگىن. اپىراي، ونى قارا باسىپ قالاي ۇمىتىپ قالعانبىز. «ەستى» دەپۋتاتتىڭ ەسىمىزگە سالعانىنا «شۇكىرشىلىك» ايتتىق ىشىمىزدەن. بىلۋىمىزشە، رەسەي بۇل كۇندى «ۇمىتپاي» جىلدا اتاپ وتەتىن كورىنەدى. ەندەشە ول كۇندى ءبىز قالاي اينالىپ وتپەكپىز. كورشىنىڭ كوڭىلىنە قاراۋ كەرەك ەمەس پە؟ ەگەر دەپۋتات ەسىمىزگە سالماعاندا اۋزىمىز اڭقيىپ «قاستەرلى» كۇنگە ءمان بەرمەي وتە شىعادى ەكەنبىز. جىبەرگەن ولقىلىعىمىزدى حالىق قالاۋلىسى تىگىسىن جاتقىزا مىنبەردەن «سۇيىنشىلەپ» ايتقاندا، تاريحتىڭ قويناۋىنا كەتىپ قالعان «قوي ۇستىنە بوزتورعاي جۇمىرتقالاعان» داۋىرگە ءبىر بارىپ قايتقانداي بولدىق. ەلباسىنىڭ قازاقپەن قازاق انا تىلىندە سويلەسسىن دەگەن «تاپسىرماسىن» ورىنداۋعا قۇلىقسىزدىق تانىتىپ، بۇگىن ۇيرەنگەن ءسوزىن ەرتەسىنە ۇمىتىپ قالا بەرەتىن دەپۋتات مىرزانىڭ تاۋەلسىز ەلدىڭ تورىندەگى سيلى ورىنتاقتا وتىرىپ، تۇلىپقا قاراپ موڭىرەگەن سيىرداي، كەلمەسكە كەتكەن كەڭەستىك كەزەڭنىڭ مەرەكەسىن «پاميتىنەن» وشىرمەۋىن نەگە جورىرىمىزدى بىلمەدىك. ادەتتەگىدەي «جەڭىل» قاتەلىك سانالىپ، «حاننىڭ قىزىندا دا بولا بەرەتىن» ارەكەتكە بالانىپ، حالىق قالاۋلىسىنىڭ «ەركەلىگىنە» كوز جۇما قاراپ، تاعى دا ءبىر «كەشىرە» سالۋعا بولار ەدى بەيباقتى. ستسەناري بويىنشا سولاي ءوربىپ تە كەلە جاتقانداي بولعان. بەردىوڭعاروۆتىڭ «الاڭعاسار» سوزىمەن، «البىرت» ويىنا نازار اۋدارماي، جاس دەپۋتاتتىڭ كەلەشەگىنە كىرشىكسىز سەنگەن ارىپتەستەرى ەسكەرتۋ دە جاساماي، ءبىر قالىپتى جۇمىس تارتىبىمەن «سال جەلدىرتىپ» ساۋالدارىن جولداپ كەلە جاتقان.

«قاتە بولايىن دەسە بىلامىققا ءتىس سىنادى» دەگەن راس بولىپ شىقتى. سورىنا قاراي تاۋەلسىزدىككە جاسالعان «قياناتقا» جانى توزبەيتىن دەپۋتات بەكبولات تىلەۋحان ادەپسىز «بالانى» اياقتان شالىپ جىقتى. «ەنەسى تەپكەن قۇلىننىڭ ەتى اۋىرماس» دەدى مە اياعان جوق. ساقالىن سالالاپ ءوزى دە تەرىسىنە ارەڭ سيىپ وتىر ەكەن، ءسوز كەزەگى تيسىمەن بەردىوڭعاروۆتىڭ الگى ورەسكەل «قاتەلىگىن» شىشعىرىپ بەتىنە باستى. «ءبىز قازاقستان رەسپۋبليكاسىنداعى بيلىكتىڭ ءبىر بۇتاعىمىز. ءبىز حالىقتىڭ ءۇنىمىز. ءبىز ءوز اتىمىزدان ەمەس حالىقتىڭ اتىنان سويلەيمىز. بۇل بىلگەنگە ۇلكەن جاۋاپكەرشىلىك. تاۋەلسىزدىك العانىنا جيىرما جىل بولعان قازاقستاننىڭ ءوز گيمنى، ءوز تۋى، ءوز كونستيتۋتسياسى، ءوز تەرريتورياسى، ءوز مەرەكەسى بار. مىسالى وسى جەردە وتىرىپ 24 اقپان «دەن فلاگي مەكسيكي» دەپ قۇتتىقتاسام اقىلعا سيا ما؟ اقپاننىڭ تاعى ءبىر كۇنىندە قىتايدىڭ مەرەكەسىمەن بارشا جۇرتتى قۇتتىقتاسام مىناۋ جىندى شىعار دەپ كۇلۋلەرىڭ مۇمكىن. مەنىڭ بىلۋىمشە 23-اقپان ءبىزدىڭ ەلدىڭ كالەندارىندا قىزىل كۇن ەمەس. سوندا دەپۋتات بەردىوڭعاروۆتىڭ ايتىپ وتىرعانى قانداي مەرەكە. وعان دەپۋتات مىرزالار، ءبارىڭىزدىڭ دۋىلداتا قول شاپالاقتاعاندارىڭىزدى تۇسىنبەي قالدىم. ال تاڭىربەرگەنگە ايتارىم تاۋەلسىز قازاقستاننىڭ تۋىنىڭ استىندا قالىپتاسقان ازامات مۇنداي قادامدارعا ويلانىپ بارۋى كەرەك». قازاقتىڭ اتىنان بيلىكتىڭ شىڭىنا شىعىپ العان بازبىرەۋلەردىڭ، وتكەندى «اڭساپ» رەسمي تىلدە «سىڭسۋى» تيىلار ەمەس. ۇمىت قالعان ۇلتتىق قۇندىلىقتاردى «ساعىنىپ» جاتسا اڭگىمە باسقا. كەلەلى اڭگىمە ايتپاسا دا كەرىلىپ وتىرىپ كورىنىپ قالۋعا تىرىساتىندار باسقا وزەكتى ماسەلە تاپپاعانداي «ۇلىق» مەرەكەلەردى پاراقتاۋعا كوشىپتى. بۇدان دا «جاعىمدى» جاڭالىق تىڭداعىڭىز كەلسە پارلامەنتكە ءجيى-ءجيى كوز سالىپ تۇرىڭىز. ارتىستىك ونەردى تولىق مەڭگەرگەن كەي دەپۋتاتتاردىڭ بۇل سوڭعى قويىلىمى ەمەسىن جانە ەستەرىڭىزگە سالعىمىز كەلەدى.

www.masa.kz ينتەرنەت گازەتى