ءبىزدىڭ قوستاناي وبلىسى كەيىنگى كەزدەرى جۇمىسشىلاردىڭ وندىرىستەن جاراقات الۋى كەرسەتكىشتەرى بويىنشا وزگەلەردەن وق بويى الدا كەلەدى. مۇندايدا ولاردىڭ جايىن كىم ويلايدى؟ ارينە قالىڭ كوپشىلىكتى قامتيتىن كاسىپوداق ۇيىمدارى الدىمەن دابىل كوتەرىپ، الگىندەي كاسىپورىنداردىڭ باسشىلىعىنىڭ ەكى اياعىن ءبىر ەتىككە تىعىپ، قاۋىپسىزدىك شارالارىنىڭ قاتاڭ ساقتالۋىن قاداعالاۋعا ءتيىستى. الايدا ولار وزدەرىنە جۇكتەلگەن مىندەتتەردى جيناپ قويىپ، جۇرتتان جينالاتىن جارنا ءۇشىن ءوزارا قىرىقپىشاق بولىپ جاتقان جايى بار.

القيسا، اڭگىمە باسىنان باستالىق. ەلىمىزدەگى باياعى كەڭەستىك كەزدەگى قۇرىلعان رەسپۋبليكالىق كاسىپوداقتار فەدەراتسياسىنان ابدەن كوڭىلى قالعان مەديتسينا قىزمەتكەرلەرى ءوزارا اقىلداسا كەلە وزدەرىنىڭ جەكە كاسىپوداعىن قۇرۋعا بەل بايلاعان. سونىڭ ناتيجەسىندە «امانات» اتتى كاسىپوداقتار ىنتىماقتاستىعى دۇنيەگە كەلگەن. الايدا ولاردىڭ ءوز بەتىنشە ءوز قۇقىقتارىن قورعاۋعا باعىتتالعان نيەتتەرى جاقىن ارادا جۇزەگە اساتىن ءتۇرى بايقالمايدى. ولاردى قايتكەندە دە بۇرىنعى جىلى ورنىنا قايتا قوندىرۋعا دەگەن ارەكەت ءاۋ دەگەننەن-اق باستالىپ كەتكەن. ول ءبىزدىڭ وبلىستا ەرەكشە سيپات الىپ، تازا تارتىسقا ۇلاسىپ، قىپ-قىزىل داۋعا اينالعان. وسىنداعى قازىر پەريناتالدىق ورتالىق دەپ اتالاتىن بۇرىنعى پەرزەنتاحانىڭ باس دارىگەرى، وبلىستىق ءماسليحاتتىڭ دەپۋتاتى تاتيانا بۋلگاتسەۆيچ باستاپ، ونىڭ رەسپۋبليكالىق كاسىپوداقتاردىڭ وبلىستىق فيليالىن باسقاراتىن ەكاتەرينا سمىشلياەۆا قوستاپ، «سەنىم» اتتى كاسىپوداق ۇيىمىن قۇرىپ، الگى «قاشقىندارى» وزدەرى تارتۋ جولىندا نەشەتۇرلى ارەكەتكە بارۋدا. ءبىر قىزىعى بۇل «سەنىم» دەگەن ۇيىم ەش جەردە تىركەلمەگەن. زاڭدى تۇردە تىركەلۋگە ەندى عانا ارەكەت ەتىپ جاتىر. دەمەك، ولاردىڭ قازىرگى ارەكەتى زاڭعا تومپاق كەلەدى. سولاي بولا تۇرسا دا، ونى، ولاردى قولداۋ ءۇشىن ءماجىلىستىڭ بۇرىنعى دەپۋتاتى، سيىقسىز ارەكەتى بايقالىپ قالىپ، جىلى ورنىن بوساتقان مۇحتار تىنىكەەۆتىڭ ءوزى وبلىسىمىزعا كەلىپ، ءدال جۇمىس كۇنى وبلىسىمىزداعى بارلىق اۋرۋحانالاردىڭ باس دارىگەرلەرىن جيناپ الىپ، «اسا قۇپيا» جينالىس وتكىزگەن. ولاي دەيتىنىمىز بۇل باسقوسۋعا بۇقارالىق اقپارات قۇرالدارىنىڭ وكىلدەرىن كىرگىزبەي، وزدەرى عانا ءوزارا سىبىرلاسقان سىڭايلى. سونداعى ماقساتى باس دارىگەرلەردى ءھام ونىڭ قاراماعىندىلاردى قايتكەندە دە وسى «سەنىمگە» كىرگىزۋدى قاتتى «وتىنسە» كەرەك.

ال «اماناتتىڭ» وسىنداعى وكىلى سەرىك ساتمۇقانبەتوۆتىڭ  ايتۋىنا قاراعاندا داۋدىڭ باسى «دايرابايدىڭ كوك سيىرى» ەمەس، ولاردىڭ كوكەيىن تەسكەن سول مەديكتەردەن تۇسەتىن جارنا بولسا كەرەك. ال ول از اقشا ەمەس. ماسەلەن، «اماناتتا» بارلىعى 300 مىڭ مەديتسينالىق مەكەمەنىڭ وكىلدەرى بار. بۇلاردىڭ ارقايسىسىنان ايىنا ايلىعىنىڭ 1 پايىزى دەڭگەيىندە جارنا ۇستالادى دەلىك. ولاردىڭ ورتاشا جالاقىسى ورتا ەسەپپەن 100 مىڭ تەڭگە دەپ ەسەپتەسەك، ايىنا ول اناۋ-مىناۋ ەمەس، قولاقپانداي 300 ميلليون تەڭگەنى قۇرايدى ەكەن. ارينە، كىم-كىم دە مۇنشالىقتى كولەمدى اقشادان وپ-وڭاي ايىرىلعىسى كەلەدى دەرسىڭ. مىنە بۇرىنعى كاسىپوداقتار باستاپ، ولاردى جەرگىلىكتى بيلىك ءۇنسىز قوستاپ، بارشا امال-ايلانى قولدانىپ جاتقاندىعى ايقىن بايقالادى. ايتپەسە ءدال جۇمىس كۇنى، اۋرۋ-سىرقاتتاردى ەمدەۋدى باقىلاۋدىڭ ورنىنا ولاردى وبلىسقا جيناپ الۋ كىمنىڭ قولىنان كەلەدى؟

وسىناۋ اشىقتان-اشىق زاڭسىزدىقتى كورگەن، مەديكتەرگە قاتتى قىسىم جاسالىپ جاتقانىن بىلگەن سەرىك ومىرزاقۇلى زاڭدىلىقتى باقىلاۋعا ءتيىستى پروكۋراتۋرا ورگاندارىنا شاعىمدانعان. الايدا ولار بۇل شاعىمدى وسىنداعى وبلىستىق دەنساۋلىق ساقتاۋ دەپارتامەنتىنىڭ باسشىسى ەركىن داۋىتباەۆقا جىبەرگەن كورىنەدى. ال وسى داۋىتباەۆ مىرزا جوعارىدا ايتىلعان جاسىرىن جينالىستى  ۇيىمداستىرۋعا تۇرتكى بولىپ، مەديكتەرگە اشىقتان-اشىق قىسىم جاساپ جاتقان باسشىنىڭ ءداپ ءوزى بولسا، ول شاعىمعا قالاي قارايتىنى تۇسىنىكتى ەمەس پە؟

- بۇگىندە جۇمىسشىلاردىڭ مۇددەسىن قورعاۋ، ەڭبەك زاڭىدىلىعىن قاتاڭ ساقتاۋ، الەۋمەتتىك پاكەتكە ەرەكشە كوڭىل ءبولۋ ماسەلەسى وتكىر كۇيىندە قالىپ وتىر، - دەيدى «اماناناتتىڭ وكىلى. - كاسىپوداق فەدەرتسياسىنىڭ مۇشەلەرى ولاردىڭ جۇمىسىنا كوڭىلى تولمايدى. اتالمىش كاسىپوداقتان قازىرگى تاڭدا ەشبىر پايدا جوق. كاسىپوداق مۇشەلەرىن بەرىلەتىن بۇرىنعى جەڭىلدىكتەر قازىر مۇلدەم الىنىپ تاستالعان.

شىندىعىندا دا بۇل ءسوزدىڭ جانى بار. ءبىر كەزدەرى كاسىپوداققا باسىبايلى تيەسىلى قالا ورتالىعىنداعى ساۋلەتتى كاسىپوداق ءۇيىنىڭ قازىر كىمنىڭ يەلىگىندە ەكەنى بەلگىسىز. سونداي-اق بۇگىندە بۇكىل رەسپۋبليكامىزعا بەلگىلى، اتاقتى «سوسنوۆىي بور» شيپاجايى دا وسىنىڭ كۇيىن كەشىپ وتىر. بۇرىن كاسىپوداق مۇشەلەرى وسىندا كەلىپ، تەگىن ەمدەلەتىن. قازىر ول دا كوزدەن بۇل-بۇل ۇشقان. ونداي  جەڭىلدىك مۇلدەم الىنىپ تاستالعان. «تۋريست» دەمالىس ءۇيىنىڭ ءبىر كەزدەرى كاسىپوداقتىكى ەكەنىن قازىر جۇرت مۇلدەم ۇمىتقان. ال بالالار ساۋىقتىرۋ ۇيلەرىنىڭ جاي-كۇيى اركىمگە ءبىر جالتاقتاعان جەتىم بالانىڭ كۇيىن كەشىپ وتىر.

قىسقارتىپ ايتقاندا، قازىرگى كاسىپوداق مۇشەلەرى ونىڭ باسشىلىعىنا تەك جارنا تولەيتىن ادامدار ەسەبىندە عانا قاجەت سەكىلدى. قالعان ۋاقىتتا بۇلاردىڭ بار-جوعىن دا بىلمەيدى. قاراپايىم قىزمەتكەرلەر كاسىپوداقتىڭ قازىر نە نارسە اتقارىپ وتىرعانىنان مۇلدەم حابارسىز.

جايبەرگەن بولاتوۆ، قوستاناي

Abai.kz