قارابالىق اۋدانىندا تاياۋدا عانا عالامتور تۇتىنۋشىلارى اراسىندا قىزۋ تالقىعا تۇسكەن قۇلاتىلعان ەسكەرتكىشتىڭ ورنىنا جاڭا ءمۇسىن ورناتىلدى. قارابالىق باتىردىڭ ەسكەرتكىشى 25 قازاندا رەسمي تۇردە اشىلادى.

2015 جىلى قازاق حاندىعىنىڭ 550 جىلدىعىنا وراي ورناتىلعان ەسكەرتكىش جارامسىز بولىپ قالعان بولاتىن. قارابالىق اۋىلى اكىمدىگىنىڭ وكىلدەرى وسىعان وراي باسقا شەشىم قابىلدادى. "جاڭا نىسان تازا قولادان جاسالدى جانە بۇرىنعى ەسكەرتكىشتەن 50-70 سانتيمەترگە بيىك بولدى. ول ءۇشىن الماتى قالاسىنا تاپسىرىس بەرىلدى. بۇل ءمۇسىن "قارابالىق باتىر" قورى قارجىسىنا ازىرلەنىپ جاتىر", — دەپ اقپارات بەرگەن ەدى سەلولىق وكرۋگ اكىمى اسان شەكتىباەۆ.

جاڭا ەسكەرتكىشتىڭ سۋرەتتەرىن سول اۋدانداعى جاڭبىرباي كولباەۆ ەسىمدى وقىرمان وبلىستىق «قوستاناي تاڭى» گازەتىنىڭ  رەداكتسياسىنا جولداپتى.

«اباي» پورتالىندا دا قارابالىق باتىر تۋرالى ماتەريالدار بەرىلگەن بولاتىن. قاراڭىز. "قۇلاتىلعان ەسكەرتكىش ورنىنا ەشكىمگە بەلگىسىز قارابالىق باتىردىڭ ءمۇسىنى قويىلادى", "قارابالىق باتىر ومىردە بولعان ادام", "اڭىزدىق دەرەكتەرگە اباي بولايىق!"

ەندى وقىرمانداردان ءسۇيىنشى سۇراۋعا بولاتىن سەكىلدى. باتىر ەسكەرتكىشى تۇعىرعا قوندى. ول توعىزاق وزەنىنىڭ جاعاسىنا، اۋدان ورتالىعىنا كىرەبەرىستە ورنالاسقان. اۋدان ورتالىعى دا وسى باتىردىڭ ەسىمىمەن اتالادى.

اسىلبەك شاياحمەت

Abai.kz