ەلدى ايامايدى، ءبىر-بىرىنەن شالعاي جاتقان قالالارعا شاقىرادى، باقىتىن ىزدەگەن بايعۇستار ساندالىپ اندا دا بارادى، مىندا دا بارادى، بارعان جەرىنەن سۇلدەرىن سۇيرەتىپ كەرى قايتادى، سونداعى ەستيتىندەرى – اقىل-ەسى دۇرىس ءار قازاق وتباسىندا ايتىلاتىن ادەپكى قادىر-قاسيەت، مىنەز-قۇلىق، سوسىن، جاۋاپكەرشىلىك، سودان سوڭ – پارىز/قارىزدار.

جۇرت سەميا كورمەگەندەي، مەكتەپتە وقىماعانداي، ۋنيۆەرسيتەت/ينستيتۋت قابىرعاسىندا ءدارىس تىڭداپ، كاسىپ يگەرىپ، جوعارى نە ارنايى ءبىلىم الماعانداي، ءتىپتى، كوزى اشىلىپ، وڭ-سولىن تانىماعانداي، جەر موينى قاشىق ەلدى مەكەندەرگە شۇبىرادى. قۇجىناعان قارا حالقى اياقجولدا تەلەگەي تەڭىزدەي ساپىرىلىسقان شاھارلارعا اعىلادى. ەشكىم قىستاپ جاتقان جوق، اركىم ءوز ەركىمەن، ءوز اياعىمەن كەلەدى.

ۇيرەنەتىنى نە، ەر ادام ەلىن اسىراۋى كەرەك، ايەل ادام ۇرپاق ءوربىتۋى ءتيىس.

بۇل دا از، جانى قىسىلعاندا، كوزى اشىقتارى يسلامعا سۇيەنەدى، حابارى جوقتارى اتا جولىن تاڭدايدى.

سوندا ويلايمىن: نەگە كىتاپتى اشىپ وزدەرى وقىپ، قارا تانىمايدى، ۇياتقا دا ۇستاز كەرەك پە، كىسىلىكتىڭ قادىرىن مىندەتتى تۇردە باسقادان ەستۋى قاجەت پە؟ ءاسىلى، انادان ارتىق، اكەدەن اسقان قانداي ۇستاز بار؟ ماماندىق ەمەس، سىرتتان ۇيرەنەتىن كاسىپ ەمەس، قۇداي-اۋ، ءتالىم-تاربيەنى دە كوشەدەن ەستىپ كەلەتىن بولدىق پا؟

تۇسىنبەيمىن. مەن كەزىندە بەكبولات تىلەۋحانمەن، قاتار بولماسا دا، جەدەقابىل، پوليتەحنيكالىق ينستيتۋتتا وقىدىم، ءتۇستى مەتالدار مەتاللۋرگياسى ماماندىعى بويىنشا ينجەنەرلىك كاسىپتى مەڭگەردىك، دۇرىس، مۇنى ۇيدە ۇيرەنە المايسىڭ، ارنايى وقۋ قاجەت، ال موتيۆاتورلارعا نە جورىق... قوسىمشا ساباقتى قاجەت ەتەتىن كۇردەلى پاندەر – ماتەماتيكا، گەومەتريا، فيزيكا، حيميا، بيولوگيا ەمەس.

مەنىڭشە، ءار ادام وقشاۋ، ەلدەن بولەك، رۋحاني جولىندا، بەينەتىن دە، زەينەتىن دە، قاسيەت-قۇندىلىعىن دا ءوزى قالىپتاستىرىپ، ءوزى كەشۋى قاجەت.

ەشكىم ءسىز ءۇشىن ءومىر سۇرمەيدى، ءسىز ءۇشىن ولمەيدى. اركىم ءوز ءومىرىن ءوزى سۇرەدى، ءوز ءولىمىن ءوزى كورەدى.

بىرەۋدىڭ عۇمىرىن باسقا بىرەۋ ءسۇرىپ بەرە المايدى. ءاربىر ادام ءوز ومىرىنە ءوزى جاۋاپتى. ءتىپتى، قالا بەردى، ەش ادامدا ءولىم تاجىريبەسى جوق. پەندە – قاراڭعى، ىزدەنىس –جارىق. بۇكىل الەمدىك قاراڭعىلىق الدىندا بار ادام – تەڭ، قاتار، دالىرەك ايتقاندا، بىردەي سوقىر.

كىم بولسا دا، تاعدىر دەگەن تاۋقىمەتتەن قۇتىلمايدى. ءومىردىڭ ءمانى ءومىر سۇرگەندە قالىپتاسادى، ءالى كۇنگە شەيىن ەشكىم دە دارىستەردەن باقىتتى بولىپ كەتكەن جوق.

موتيۆاتور سيقىرشى ەمەس، اباي ايتقانداي: “سەنبە جۇرتقا، تۇرسا دا قانشا ماقتاپ، اۋرە ەتەدى ىشىنە قۋلىق ساقتاپ. وزىڭە سەن، ءوزىڭدى الىپ شىعار، ەڭبەگىڭ مەن اقىلىڭ ەكى جاقتاپ”.

كىتاپ وقىڭدار، اعايىن، مەن بىلەتىن موتيۆاتور – كىتاپ، ءبىلىم، ىزدەنىس.

باقىت – ىزدەگەن ادامنىڭ قولىندا. باقىت دەگەن – باقىت تۋرالى ويدا. سوندىقتان، باقىتتىڭ بار/جوق ەكەنىن وزىڭنەن باسقا ەشكىم بىلمەيدى.

ديدار امانتايدىڭ facebook پاراقشاسىنان

Abai.kz