ەلىمىزدىڭ وڭتۇستىك استاناسىندا الماتى الپينيزم فەدەراتسياسىنىڭ ۇيىمداستىرۋىمەن «قازاقستان ءالپينيزمىنىڭ تاريحى» تاقىرىبىندا ءدارىس وقىلدى.

قازاقتىڭ سپورت جانە تۋريزم اكادەمياسىندا وتكەن كەزدەسۋدە كسرو-عا ەڭبەك سىڭىرگەن جاتتىقتىرۋشى، قىرىق جىلدان اسا ۋاقىت بويى اسكەريلەردىڭ سپورت كلۋبى مەن قازاقستان قۇراماسىنا جەتەكشىلىك ەتكەن بىلىكتى باپكەر ەرۆاند يلينسكي ستۋدەنتتەرگە ءوز ومىرىنەن ونەگەلى سىر شەرتىپ، الەمنىڭ ەڭ بيىك شىڭدارىنا شىققان قازاقستاندىقتار جايىندا اڭگىمە قوزعادى.

«قازاقستان ءالپينيزمىنىڭ تاريحى تولايىم تابىستارعا تولى. العاش رەت 1936 جىلى حان ءتاڭىرى شىڭىن ەۆگەنيا كولوكولنيكوۆانىڭ جەتەكشىلىگىمەن «دينامو» كومانداسى باعىندىردى. بۇل ۇلكەن جەتىستىك بولىپ قانا قويماي، كوپشىلىككە شابىت سىيلادى. سول ارقىلى گيمالاي ساپارى، ەۆەرەست شىڭىن باعىندىرۋ جونىندە وي تۋدى. ول ەكسپەديتسيانى ۇيىمداستىرۋ ءۇشىن از قادام جاسالعان جوق، -  دەيدى ەرۆاند يلينسكي.

ونىڭ ايتۋىنشا، 1989 جىلى كەڭەس وداعىنىڭ ەكىنشى ەكسپەديتسياسى كانچەندجانگاعا ساپار شەگەدى.  العاشقى ەكسپەديتسياعا رەسپۋبليكادان 5 وكىل قاتىسسا، ەكىشىدە 9 ادامعا دەيىن كوبەيگەن. ناقتىراق ايتقاندا، بۇل كوماندالىق كورسەتكىشتىڭ 30 پايىزىن قۇراعان.

سونىمەن قاتار، ءدارىس بارىسىندا قازاق ءالپينيزمىنىڭ تاريحىنداعى ەكسپەديتسيالار حرونولوگياسى تۋراسىندا ءسوز بولدى. ماسەلەن، 1991 جىلى العاشقى تاۋەلسىز قازاقستاندىق ەكسپەديتسيا قازبەك ۆاليەۆ پەن اعا جاتتىقتىرۋشى ەرۆاند يلينسكي باسشىلىعىمەن دحاۋلاگيريگە ساپارلاعان.  ول ساياحاتتا ون الپينيست باتىس قابىرعا بويىمەن ءبىرىنشى رەت وتتەگىنى پايدالانباي جوعارى كوتەرىلگەن.

1995 جىلدارى قىس مەزگىلىندە ۆاليەۆ ماناسلۋ ەكسپەديتسياسىن باستاپ، سەگىز اداممەن وتتەگىسىز سەكسەن مىڭ كم بيىكتىكتى باعىندىرعان. سودان سوڭ 96-شى جىلى بىرلەسكەن قازاقستان-جاپون ەكسپەديتسياسى چو-ويۋعا وتسە، 97-ءشى جىلى يلينسكيدىڭ باسشىلىعىمەن ون الپينيست سولتۇستىكتەن ەۆەرەستكە ەكسپەديتسيا جاساعان. ولاردىڭ قاتارىندا قازاقستاننان شىققان العاشقى  ايەل الپينيست ليۋدميلا ساۆينا دا بولعان.

Abai.kz