قاسىم-جومارت توقاەۆ قاراعاندىدا ەلىمىزدىڭ يندۋستريالىق-يننوۆاتسيالىق دامۋى جونىندە كەڭەس وتكىزدى.

جيىندى اشقان مەملەكەت باسشىسى قازاقستانعا جاھاندىق، اسىرەسە وڭىرلىك نارىقتا تابىستى باسەكەگە قابىلەتتى، قۋاتتى ءارى تەحنولوگيالىق تۇرعىدان پروگرەسسيۆتى ونەركاسىپ قاجەت ەكەنىن اتاپ ءوتتى.

«ءبىز الەمدىك كونيۋنكتۋرانىڭ ناشارلاعان جاعدايىندا باسەكەنىڭ ارتقانىن، ساۋدا قاقتىعىستارىنىڭ شيەلەنىسكەنىن، جالپى جاھاندىق قاراما-قايشىلىقتاردى باقىلاپ وتىرمىز. ءبىز كورىپ وتىرعانداي، الەم ءبىر ورنىندا تۇرمايدى. سوندىقتان، ءبىز ۋاقىتتان قالىپ قويماۋىمىز قاجەت»، – دەدى قاسىم-جومارت توقاەۆ.

پرەزيدەنت مەملەكەتتىك ورگاندار مەن بيزنەس وكىلدەرى كەزدەسۋىنىڭ ماقساتى ەكونوميكاداعى قۇرىلىمدىق وزگەرىستەردى تابىستى ىسكە اسىرۋ ءۇشىن شەشۋگە ءتيىستى ماسەلەلەردى تالقىلاۋ ەكەنىن ايتتى.

«يندۋستريالاندىرۋ جىلدارى تارتىلعان ينۆەستيتسيا كولەمى 8 تريلليون تەڭگە بولاتىن 1 250 جاڭا ونەركاسىپ ورىندارى پايدا بولدى. 120 مىڭ جاڭا جۇمىس ورىندارى اشىلعان. قازاقستاندا بۇرىن وندىرىلمەگەن 500-دەن استام جاڭا ءونىم تۇرلەرىن شىعارۋ جولعا قويىلدى» دەپ، مەملەكەت باسشىسى اتقارىلعان جۇمىستاردىڭ قورىتىندىسىن شىعاردى.

سونىمەن قاتار، قاسىم-جومارت توقاەۆتىڭ باعالاۋى بويىنشا ەكونوميكا قۇرىلىمىندا تۇبەگەيلى وزگەرىس بايقالمايدى. 10 جىلدان استام ۋاقىت بويى جالپى ىشكى ونىمدەگى وڭدەۋ ونەركاسىبىنىڭ ۇلەسى 11 پايىزدىڭ اينالاسىندا. 2015-2018 جىلدار ارالىعىندا ەڭبەك ونىمدىلىگىنىڭ ءوسىمى جوسپارلانعان 12 پايىزدىڭ ورنىنا 4 پايىزعا عانا جەتتى.

وسىعان بايلانىستى پرەزيدەنت ۇكىمەت پەن اكىمدىكتەردىڭ شەشۋى ءتيىس بىرقاتار مىندەتتەردى اتاپ ءوتتى.

ءبىرىنشى باعىت – دايىن ءونىم ەكسپورتىن بەلسەندى دامىتۋ. باياندامادا اتاپ وتىلگەندەي، سوڭعى 3 جىل ىشىندە ەكسپورتتىڭ جالپى قۇرىلىمىندا وڭدەۋ سەكتورىنىڭ ۇلەسى 34 پايىزدان 8 پايىزعا، ياعني 2016-2018 جىلدارى 26 پايىزعا دەيىن تومەندەگەن. قازاقستان وڭدەۋ ونەركاسىبىنىڭ 180-گە جۋىق تاۋار تۇرلەرىن ەكسپورتتايدى. بۇل كورسەتكىش رەسەيدە – 358, بەلارۋستە – 690, قىتايدا – 1400, ەكونوميكالىق ىنتىماقتاستىق جانە دامۋ ۇيىمى ەلدەرى بويىنشا ورتاشا كورسەتكىش – 1950.

مەملەكەت باسشىسى وتاندىق وندىرۋشىلەردىڭ سىرتقى نارىققا شىعۋىنا سەرپىن بەرەتىن بىرقاتار ناقتى شارالاردى ۇسىندى. ونىڭ ايتۋىنشا، پەرسپەكتيۆتى ەكسپورت نارىقتارىنا تالداۋ جاساۋ، وسى نارىقتارعا شىعۋ ءۇشىن كەدەندىك سالىقتاردى، تاريفتىك جانە باسقا دا تالاپتاردى زەرتتەۋ، ءتيىمدى كولىك-لوگيستيكالىق شەشىمدەردى انىقتاۋ قاجەت.

نازار اۋداراتىن تاعى ءبىر ماڭىزدى سالا – ساپالى ماركەتينگ. قاسىم-جومارت توقاەۆ اتاپ وتكەندەي، جالپىمەملەكەتتىك برەند، ال ونىڭ بازاسىندا ينۆەستيتسيالىق، تۋريستىك جانە سالالىق برەندتەر قالىپتاستىرۋ جونىندەگى تاپسىرما ءالى ورىندالماعان. پرەزيدەنتتىڭ ايتۋىنشا، مۇنداي احۋال وتاندىق ءونىم ءۇشىن شاتىرلى برەندتەردى قالىپتاستىرۋدا دا بايقالادى.

مەملەكەت باسشىسى ۇكىمەتكە برەند قالىپتاستىرۋ جونىندەگى جۇمىستاردى اياقتاۋعا ەكى اي ۋاقىت بەردى.

ەكىنشى باعىت – «قاراپايىم زاتتار ەكونوميكاسىن» دامىتۋ. «ەلىمىزدە ءبىز ماقتان تۇتاتىن كوپتەگەن تاۋار وندىرىستەرى بار»، – دەپ سانايدى قاسىم-جومارت توقاەۆ.

وتاندىق وندىرۋشىلەردى قولداۋعا بولىنگەن ماقساتتى 600 ميلليارد تەڭگە بيۋروكراتيالىق پروبلەمالارعا بايلانىستى ءتيىستى ادرەساتىنا جەتپەگەن.

«ماعان باياندالعانداي، 16 تامىزداعى جاعداي بويىنشا جالپى قۇنى 62,3 ميلليارد تەڭگەنى قۇرايتىن 148 جوبا عانا ماقۇلدانعان»، – دەدى پرەزيدەنت.

قازاقستان پرەزيدەنتى مەملەكەت رەتتەيتىن ساتىپ الۋلاردىڭ جاعدايىن سىنعا الىپ، جىل سايىن مۇنىڭ كولەمى 10 تريلليون تەڭگەدەن اساتىنىن اتاپ ءوتتى. «بۇل رەتتە، قازاقستاننىڭ ۇلەسى 34 پايىزدى قۇراپ وتىر. بۇل دۇرىس ەمەس. ءبىز ونىڭ ۇلەسىن الدەقايدا ارتتىرا الامىز»، – دەدى قاسىم-جومارت توقاەۆ.

مەملەكەت باسشىسى سويلەگەن سوزىندە ينۆەستيتسيا سالاسىنداعى احۋالعا جان-جاقتى تالداۋ جاسادى. اتاپ ايتقاندا، قازاقستان پرەزيدەنتى ەركىن ەكونوميكالىق جانە يندۋستريالىق ايماقتار «ينۆەستيتسيا تارتۋ ورىندارىنا» تولىقتاي اينالا الماعانىن اتاپ ءوتتى.

سونىمەن قاتار پرەزيدەنت جوعارى قايتا جاساۋ ءوندىرىسىنىڭ، يندۋستريا 4.0 ەلەمەنتتەرى مەن يننوۆاتسيانى دامىتۋدىڭ، يندۋستريالاندىرۋعا قولداۋ كورسەتۋ قۇرالدارىنىڭ تيىمدىلىگىن ارتتىرۋدىڭ پەرسپەكتيۆالارىنا توقتالدى.

«جاڭا ەكونوميكانى قۇرۋ بازالىق سالالاردى يننوۆاتسيالىق جانە عىلىمي-تەحنيكالىق تۇرعىدان ىلگەرىلەتۋگە، سونداي-اق «بولاشاق ەكونوميكاسىنىڭ» سالالارىن دامىتۋعا نەگىزدەلۋگە ءتيىس»، – دەدى مەملەكەت باسشىسى.

جيىن بارىسىندا يندۋستريا جانە ينفراقۇرىلىمدىق دامۋ ءمينيسترى رومان سكليار، «سامۇرىق-قازىنا» ۇاق» اق باسقارماسىنىڭ توراعاسى احمەتجان ەسىموۆ، «ەۆرازيان فۋدس» اق باسقارماسىنىڭ توراعاسى ولەگ ۆينوكۋروۆ، قاراعاندى وبلىسى كاسىپكەرلەر پالاتاسىنىڭ وڭىرلىك كەڭەسى جانىنداعى جەڭىل ونەركاسىپ كوميتەتىنىڭ توراعاسى اندرەي شمارين، «Azala cotton» جشس باس ديرەكتورى باۋىرجان جامالوۆ، «زەردە» جشس باس ديرەكتورى مۇحتار بيتەمىروۆ، «الماتى ۆەنتيليات زاۋىتى» جشس باس ديرەكتورى مارات باققۇلوۆ، «قازەنەرگوكابەل» اق باس ديرەكتورى ۆلاديمير بوبروۆ ءسوز سويلەدى. باسقوسۋعا پرەمەر-ءمينيستردىڭ ورىنباسارى جەڭىس قاسىمبەك، ساۋدا جانە ينتەگراتسيا ءمينيسترى باقىت سۇلتانوۆ تا قاتىستى.

قاسىم-جومارت توقاەۆتىڭ ەسكەرتپەلەرى مەن جيىنعا قاتىسۋشىلاردىڭ ۇسىنىستارى يندۋستريالاندىرۋدىڭ ءۇشىنشى بەسجىلدىعىنىڭ جوباسىن جەتىلدىرۋ بارىسىندا ەسكەرىلەتىن بولادى.

Abai.kz