Seysenbi, 25 Mausım 2019
Sañlaq 11944 78 pikir 21 Mamır, 2019 sağat 03:53

Golovkin qazaqtıñ maqtanışı emes

Gennadiy Golovkin köp qazaqtıñ köñilinde «suğa salsañ batpaytın, otqa salsañ janbaytın» super qaharman. Tipti qazaqstandıq tüsinik boyınşa ol «kök tuımızdı köterip, bükil qazaqstandı älemge tanıtu» üşin eñbek etip jür. Bizdiñ elde bir Golovkin emes, özge de sportşılardıñ jeke jeñisin bükil eldiñ jetistigi dep sanaytın tüsinik qalıptasqan. Bwl tüsiniktiñ negizin qalauşı - qazaq biligi. Şının aytqanda, qazirgi qazaq biligi üşin halıqtıñ köñilin aulaudıñ jalğız jolı osı ğana.

Alayda bilik äspettep, halıq kötermelegen köp änşi men sportşınıñ elim dep eñirep jürgenderi şamalı. «Elimizdiñ atın şığarıp, tuımızdı jelbiretti» degen sol sportşılardıñ birde änwrandı bilmey, birde memlekettik tildi bilmey qalatınına etimiz üyrenip ketti. Sonda da jeke adamnıñ kişigirim jeñisterimen eldiñ atağı aspandap ketpeytinin tüsine almay özimizdi aldap jürmiz.

Sözdiñ basın Golovkinnen bastağan edik. Endi sol jaylı jazayıq. Orta salmaqta WBC, WBA (Super), IBF jäne IBO twjırımdarı boyınşa bwrınğı älem çempionı Gennadiy Golovkin käsipqoy arenada naşar boksşı bolğan joq. Jalpı 40 jekpe-jek ötkizip, 38 märte jeñiske jetti. Onıñ 34-in nokautpen wttı. Bwl elimizden şıqqan käsipqoy boksşılar arasında qazirşe eñ üzdik körsetkiş. Biraq biz Golovkinniñ birinşi kezekte "käsipker" ekenin, oğan qosa minsiz perişte emes ekenin biluimiz kerek. Odan twlğa jasap töbemizge köterudiñ nemese Qazaqstandı älemge tanıtu üşin jür dep ümittenudiñ qajeti joq. Sportqa sport retinde qarağanımız jön.

Ötken jılı 16 qırküyek meksikalıq Saul' Al'varesten jeñilgen otandasımız arağa toğız ay salıp, 8 mausımda N'yu-Yorktegi Madison Square Garden arenasında ötetin boks keşinde käsipqoy bokstağı 41-şi jekpe-jegin ötkizgeli otır. Qarsılası kanadalıq boksşı Stiv Rolls (19-0, 10 KO).

Bwğan deyin Golovkin — Rolls jekpe-jeginiñ anderkartında tağı eki boksşımız - Ali Ahmedov (14-0, 10 KO) pen Daniyar Eleusinovtiñ (6-0, 3 KO) şarşı alañğa şığatını belgili bolğan. Tipti Eleusinov pen Ahmetovtıñ tanımal otandasınıñ anderkartında jwdırıqtasuı jarasımdı köringen. Osığan bola Daniyar Eleusinov 25 mamırğa josparlap otırğan kezekti jekpe-jegin keyinge şegergen de edi. Bwl turalı Eleusinovtiñ menedjeri Ziya Äliev mälimdegen bolatın.

Daniyar Eleusinov (6-0, 3 KO)

Alayda, Golovkin öziniñ qatısumen ötetin boks keşinde Eleusinovti "körgisi kelmeytinin" aytqan. Söytip, otandası keudesinen itergen Daniyar jekpe-jegin qaytadan 25 mamırda ötkizetin boldı. Bwl turalı da Ziya Äliev ayttı.

«8 mausım küni bolatın boks keşinde jekpe-jek ötkizuine Gennadiy Golovkin rwqsat etpedi. Mäsele promouterlerde emes. Tom Leffler bizge Golovkin öziniñ jekpe-jek keşinde Daniyar Eleusinovti körgisi kelmeytinin ayttı», - dedi Eleusinovtiñ menedjeri

Bwl iske baylanıstı qazaqstandıq käsipqoy boksşı Firuza Şaripova da öz pikirin bildirdi. Ol öz sözinde Golovkinniñ jerlesterine nege qırın qaraytının tüsinbeytinin ayttı.

«Daniyar Eleusinovpen bolğan jağdayğa qattı tañğalıp otırmın. Men mansabımdı bastağan kezde de osığan wqsas oqiğa orın alğan bolatın. Gennadiy Golovkinniñ andekartında öner körsetkimiz kelgen. Onıñ promouteri Tom Lefflermen de kelisip qoyğan bolatınbız. Alayda Gennadiydiñ menedjeri Oleg Germannan: «eşqaşan Firuza Golovkinmen bir kardta öner körsetpeydi» degen jauap aldıq. Bwl körsetken qılığı - dörekilik, sol kezde öte qapalı boldım. Gennadiy Golovkinnen birauız qoldau alsaq pa dedik. Tanıstarımız arqılı men turalı baspasözge jılı söz aytuın ötindik. Ol bwğan pısqırıp ta qaramadı. Golovkinniñ sözi kimge bolsın motivaciya beretin deñgeyde. Alayda, ol bwlay jasağan emes», – dep jazdı Şäripova öziniñ Instagram paraqşasında.

Firuza Şaripova

Keyin Gennadiy Golovkinniñ özi de pikir bildirdi. Onıñ sözinen Eleusinovqa ökpeli ekenin añğaruğa bolatın sekildi. Daniyar özi jaylı jağımsız pikir ayttı degen oyda jürgen körinedi.

«Daniyar ötken jılı mağan qatıstı qanday oyda ekenin bayqattı. Bwl meniñ oğan degen qarım-qatınasımnıñ özgergenin bildirmeydi. Men, şın mäninde, oğan käsibi ringte tabıs tileymin. Ol özi aytqanday «bizdiñ jolımız eki basqa». Bwl onıñ sözderi. Onıñ menedjeri käsibilikke jat qılıq körsetti», - dey kelip, osı arqılı wltşıldıq taqırıbın köterudiñ qajeti joq ekenin aytıptı Golovkin.

Daniyar Eleusinov 2018 jılı Golovkin jaylı «biraz uaqıttan beri GGG özgerdi. Ol qoljetimsiz bolıp ketti» degen oyın aytqan eken. Biraq keyin öz pikiriniñ dwrıs audarılmağanın negizgi aytpağı basqa ekenin jetkizdi.

«Men Golovkin qazir köpşilik üşin jwldız siyaqtı – qoljetimsiz dedim. Köptegen qazaqstandıqtan qaşıqta. Öytkeni ol ünemi şetelde. Meniñ aytqım kelgen söz osı bolatın», – degen edi ol.

Qısqası, Daniyar Eleusinov Gennadiy Golovkinmen bir keşte öner körsete almaytın boldı. Esesine Golovkin — Rolls jekpe-jeginiñ anderkartında biıl säuirde ötken Aziya çempionatında qızılordalıq Twrsınbay Qwlahmetten jeñilgen özbek boksşısı Israil Madrimov jwdırıqtasadı.

Eleusinov pen Şaripovadan bölek, Gennadiy Golovkinge ökpe artıp jürgen qazaqstandıq tağı bir boksşı - Ruslan Madiev (12-1, 5KO). Golovkinniñ anıq jerlesi, Qarağandı öñirinde tuıp ösken Madiev bir kezderi jerles ağasınıñ «GGG Promotions» promouterlik kompaniyasınıñ qaramağında jekpe-jek ötkizip jürdi.

Sol boksşı jaqında Rrosports.kz saytına bergen swhbatında «GGG Promotions» kompaniyasınıñ kesirinen kar'erası qwrdımğa ketu aldında twrğanın ayttı. Onıñ sözinşe, bes jıl boyı Golovkinniñ qaramağında jıttığıp jürgen. Alayda ekijaqtı eşqanday kelisimşart bolmağan. «GGG Promotions» özine çempiondıq jekpe-jek ötkizip bermeytinine közi jetken Madiev komandadan ketuge bel buğan. Biraq basqa promouterler bwrınğı komandasınan şıqqanı jaylı anıqtama swrağan. Al Golovikin ol qağazdı 100 mıñ dollarğa satqısı keledi. Söytip, talanttı boksşı AQŞ-ta jekpe-jek ötkizu qwqığınan qağılğan.

«Amerikada barlıq promouterler sottardan qorqadı. Sondıqtan olar täuekelge barğısı kelmeydi. Olarğa meniñ GGG Promotions-pen kelisimşartım joq degen qağaz kerek. Biraq Gennadiy mağan bwl qağazdı tek 100 mıñ dollar tölesem ğana beretinin ayttı. Bwl men üşin tüsiniksiz jağday. Sebebi men bes jıl tegin jwmıs atqardım dese de boladı. Qazir bir tiın da bermeymin. Golovkinnen mwndaydı kütpedim», - deydi Ruslan Madiev.

Golovkin bwl 100 mıñdı Ruslanğa jattığu lagerin wsınıp, biletter men däri-därmekter satıp alıp bergeni üşin swrap otırğan körinedi. Alayda olar Madiev qatısqan jekpe-jekterden tüsken tabıstı eskermegen. Mäselen, Golden Boy Promotions wyımdastırğan boks keşinde Ruslandı GGG Promotions-ten satıp alğan. Biraq bwl aqşadan boksşınıñ özine eşteñe timegen.

Ruslan Madiev (12-1, 5KO)

Sonımen qatar, Ruslan Madiev däl qazir «GGG Promotions» sapında jürgen Ali Ahmetovtıñ jaqın arada çempiondıq ataq üşin jekpe-jek ötkizetinine kümänmen qaraydı. Golovkinniñ komandası aqşa jwmsap Ahmetovqa ülken jekpe-jek ötkizip beretinine senimsiz körinedi.

«Ali – öte mıqtı boksşı. Alğaş Big Bear-ge kelgende, onıñ enşisinde käsipqoy boksta 12 jekpe-jek boldı. Biraq Amerikadağı birinşi qarsılası 12 ret jeñilgen öte älsiz boksşı boldı. Artınşa, 14 ret wtılğan boksşımen jwdırıqtastı. Endigi qarsılası 37 jastağı boksşı bolmaq. Bwl dwrıs pa? Eger de Alidi kötergisi kelmese, ne üşin onı qinap jür? Mıqtı qarsılas tabu üşin aqşa töleu kerek, al olar qarajat jwmsağısı kelmeydi», - deydi Madiev.

«Maks pen Genanı ülken ağalarım retinde kördim, olardıñ istep jatqanı mınau... Meniñ kar'eramdı qwrtıp jatır desem de boladı», - dep küyingen Ruslan Maksim Golovkinniñ "barlıq swraqtar boyınşa Gennadiyge habarlas" degenin, al Gennadiyge habarlassa telefonın almaytının, tipti boksşını bılay qoyıp zañgerlerge de jauap bermeytinin aytadı.

Biıl säuir ayınıñ soñında otandasımız özin toğız jıl jattıqtırğan bapkeri Abel' Sançespen qoştasıp, Djonatan Benks esimdi jattıqtıruşımen kelisimge kelgen edi. Qazaqstandıq janküyerler üşin ökiniştisi, Golovkin wzaq uaqıt seriktes bolğan bapkerimen de jılı qoştasa almadı.

Gennadiy Golovkinmen kelisimşarttı üzgennen keyin meksikalıq maman bwrınğı şäkirtiniñ qızğanşaq ekenin jäne aqşa onı özgertkenin ayttı.

«Men Golovkinnen mwndaydı kütken joqpın. Ol DAZN-men kelisim jasağannan keyin, aylığımdı qısqartatının ayttı. Ärine, men oğan könbedim. Jäne ekeumiz jwmıstı toqtatudı jön dep şeştik. Gennadiyge senip jürgen men aqımaq ekenmin, aqşa onı sonşalıqtı özgertedi dep oylamadım, qızğanşaq adam eken. Ömir mwnımen toqtamaydı, arı qaray qoldağı şäkirtterimmen jwmısımdı jalğastıramın», - dedi Abel' Sançes.

Abel' Sançes pen GGG

Dañqtı boksşımızdıñ bıltır da bası dauğa qalğan edi. Käsipqoy boksta jekpe-jek bastalar aldında qarsılas qos boksşınıñ jäne AQŞ eliniñ änwranı orındaladı. Alayda, 16 qırküyek meksikalıq Saul' Al'varespen jwdırıqtasatın bizdiñ Gena osı räsimnen bas tarttı. Basqaşa aytqanda, özi «aspanğa köterip, älemge äygilep» jürgen kök tuımızdı aspanğa kötergisi kelmey qalğan.

Söytip, Gennadiy milliondağan otandasın «kök tudıñ jelbirep, änwrannıñ şırqalğan» sätin köru mümkindiginen "ayırdı". Mümkin olar üşin änwran orındalu-orındalmauı qattı mañızdı emes şığar. Alayda, qazaqstandıq tüsinikte Gennadiy jekpe-jeginiñ aldında şırqalğan änwran «bükil Qazaqstandı älemge tanıtadı». Äri osı bir sättik "baqıt" bükil qazaq janküyerlerine kündelikti küybiñ tirşiligin wmıttırar edi...

Osılayşa, bar qazaqtıñ mahabbatına bölengen Gennadiy Golovkin de kez-kelgen sportşı üşin eñ mañızdı maqsat biz oylağanday eldiñ tuın jelbiretu emes ekenin körsetip bergen edi. Sol üşin bizdiñ halıq änşiler men sportşılardıñ jetistigine marqayıp, öz-özin aldağandı qoyğanı jön.

Quanış Qappas

Abai.kz

78 pikir