گەننادي گولوۆكين كوپ قازاقتىڭ كوڭىلىندە «سۋعا سالساڭ باتپايتىن، وتقا سالساڭ جانبايتىن» سۋپەر قاھارمان. ءتىپتى قازاقستاندىق تۇسىنىك بويىنشا ول «كوك تۋىمىزدى كوتەرىپ، بۇكىل قازاقستاندى الەمگە تانىتۋ» ءۇشىن ەڭبەك ەتىپ ءجۇر. ءبىزدىڭ ەلدە ءبىر گولوۆكين ەمەس، وزگە دە سپورتشىلاردىڭ جەكە جەڭىسىن بۇكىل ەلدىڭ جەتىستىگى دەپ سانايتىن تۇسىنىك قالىپتاسقان. بۇل تۇسىنىكتىڭ نەگىزىن قالاۋشى - قازاق بيلىگى. شىنىن ايتقاندا، قازىرگى قازاق بيلىگى ءۇشىن حالىقتىڭ كوڭىلىن اۋلاۋدىڭ جالعىز جولى وسى عانا.

الايدا بيلىك اسپەتتەپ، حالىق كوتەرمەلەگەن كوپ ءانشى مەن سپورتشىنىڭ ەلىم دەپ ەڭىرەپ جۇرگەندەرى شامالى. «ەلىمىزدىڭ اتىن شىعارىپ، تۋىمىزدى جەلبىرەتتى» دەگەن سول سپورتشىلاردىڭ بىردە ءانۇراندى بىلمەي، بىردە مەملەكەتتىك ءتىلدى بىلمەي قالاتىنىنا ەتىمىز ۇيرەنىپ كەتتى. سوندا دا جەكە ادامنىڭ كىشىگىرىم جەڭىستەرىمەن ەلدىڭ اتاعى اسپانداپ كەتپەيتىنىن تۇسىنە الماي ءوزىمىزدى الداپ ءجۇرمىز.

ءسوزدىڭ باسىن گولوۆكيننەن باستاعان ەدىك. ەندى سول جايلى جازايىق. ورتا سالماقتا WBC, WBA (Super), IBF جانە IBO تۇجىرىمدارى بويىنشا بۇرىنعى الەم چەمپيونى گەننادي گولوۆكين كاسىپقوي ارەنادا ناشار بوكسشى بولعان جوق. جالپى 40 جەكپە-جەك وتكىزىپ، 38 مارتە جەڭىسكە جەتتى. ونىڭ 34-ءىن نوكاۋتپەن ۇتتى. بۇل ەلىمىزدەن شىققان كاسىپقوي بوكسشىلار اراسىندا قازىرشە ەڭ ۇزدىك كورسەتكىش. بىراق ءبىز گولوۆكيننىڭ ءبىرىنشى كەزەكتە "كاسىپكەر" ەكەنىن، وعان قوسا ءمىنسىز پەرىشتە ەمەس ەكەنىن ءبىلۋىمىز كەرەك. ودان تۇلعا جاساپ توبەمىزگە كوتەرۋدىڭ نەمەسە قازاقستاندى الەمگە تانىتۋ ءۇشىن ءجۇر دەپ ۇمىتتەنۋدىڭ قاجەتى جوق. سپورتقا سپورت رەتىندە قاراعانىمىز ءجون.

وتكەن جىلى 16 قىركۇيەك مەكسيكالىق ساۋل الۆارەستەن جەڭىلگەن وتانداسىمىز اراعا توعىز اي سالىپ، 8 ماۋسىمدا نيۋ-يوركتەگى Madison Square Garden ارەناسىندا وتەتىن بوكس كەشىندە كاسىپقوي بوكستاعى 41-ءشى جەكپە-جەگىن وتكىزگەلى وتىر. قارسىلاسى كانادالىق بوكسشى ستيۆ روللس (19-0, 10 كو).

بۇعان دەيىن گولوۆكين — روللس جەكپە-جەگىنىڭ اندەركارتىندا تاعى ەكى بوكسشىمىز - الي احمەدوۆ (14-0, 10 كو) پەن دانيار ەلەۋسىنوۆتىڭ (6-0, 3 كو) شارشى الاڭعا شىعاتىنى بەلگىلى بولعان. ءتىپتى ەلەۋسىنوۆ پەن احمەتوۆتىڭ تانىمال وتانداسىنىڭ اندەركارتىندا جۇدىرىقتاسۋى جاراسىمدى كورىنگەن. وسىعان بولا دانيار ەلەۋسىنوۆ 25 مامىرعا جوسپارلاپ وتىرعان كەزەكتى جەكپە-جەگىن كەيىنگە شەگەرگەن دە ەدى. بۇل تۋرالى ەلەۋسىنوۆتىڭ مەنەدجەرى زيا اليەۆ مالىمدەگەن بولاتىن.

دانيار ەلەۋسىنوۆ (6-0, 3 كو)

الايدا، گولوۆكين ءوزىنىڭ قاتىسۋمەن وتەتىن بوكس كەشىندە ەلەۋسىنوۆتى "كورگىسى كەلمەيتىنىن" ايتقان. ءسويتىپ، وتانداسى كەۋدەسىنەن يتەرگەن دانيار جەكپە-جەگىن قايتادان 25 مامىردا وتكىزەتىن بولدى. بۇل تۋرالى دا زيا اليەۆ ايتتى.

«8 ماۋسىم كۇنى بولاتىن بوكس كەشىندە جەكپە-جەك وتكىزۋىنە گەننادي گولوۆكين رۇقسات ەتپەدى. ماسەلە پروموۋتەرلەردە ەمەس. توم لەففلەر بىزگە گولوۆكين ءوزىنىڭ جەكپە-جەك كەشىندە دانيار ەلەۋسىنوۆتى كورگىسى كەلمەيتىنىن ايتتى»، - دەدى ەلەۋسىنوۆتىڭ مەنەدجەرى

بۇل ىسكە بايلانىستى قازاقستاندىق كاسىپقوي بوكسشى فيرۋزا شاريپوۆا دا ءوز پىكىرىن ءبىلدىردى. ول ءوز سوزىندە گولوۆكيننىڭ جەرلەستەرىنە نەگە قىرىن قارايتىنىن تۇسىنبەيتىنىن ايتتى.

«دانيار ەلەۋسىنوۆپەن بولعان جاعدايعا قاتتى تاڭعالىپ وتىرمىن. مەن مانسابىمدى باستاعان كەزدە دە وسىعان ۇقساس وقيعا ورىن العان بولاتىن. گەننادي گولوۆكيننىڭ اندەكارتىندا ونەر كورسەتكىمىز كەلگەن. ونىڭ پروموۋتەرى توم لەففلەرمەن دە كەلىسىپ قويعان بولاتىنبىز. الايدا گەنناديدىڭ مەنەدجەرى ولەگ گەرماننان: «ەشقاشان فيرۋزا گولوۆكينمەن ءبىر كاردتا ونەر كورسەتپەيدى» دەگەن جاۋاپ الدىق. بۇل كورسەتكەن قىلىعى - دورەكىلىك، سول كەزدە وتە قاپالى بولدىم. گەننادي گولوۆكيننەن ءبىراۋىز قولداۋ الساق پا دەدىك. تانىستارىمىز ارقىلى مەن تۋرالى باسپاسوزگە جىلى ءسوز ايتۋىن وتىندىك. ول بۇعان پىسقىرىپ تا قارامادى. گولوۆكيننىڭ ءسوزى كىمگە بولسىن موتيۆاتسيا بەرەتىن دەڭگەيدە. الايدا، ول بۇلاي جاساعان ەمەس»، – دەپ جازدى ءشارىپوۆا ءوزىنىڭ Instagram پاراقشاسىندا.

فيرۋزا شاريپوۆا

كەيىن گەننادي گولوۆكيننىڭ ءوزى دە پىكىر ءبىلدىردى. ونىڭ سوزىنەن ەلەۋسىنوۆقا وكپەلى ەكەنىن اڭعارۋعا بولاتىن سەكىلدى. دانيار ءوزى جايلى جاعىمسىز پىكىر ايتتى دەگەن ويدا جۇرگەن كورىنەدى.

«دانيار وتكەن جىلى ماعان قاتىستى قانداي ويدا ەكەنىن بايقاتتى. بۇل مەنىڭ وعان دەگەن قارىم-قاتىناسىمنىڭ وزگەرگەنىن بىلدىرمەيدى. مەن، شىن مانىندە، وعان كاسىبي رينگتە تابىس تىلەيمىن. ول ءوزى ايتقانداي «ءبىزدىڭ جولىمىز ەكى باسقا». بۇل ونىڭ سوزدەرى. ونىڭ مەنەدجەرى كاسىبيلىككە جات قىلىق كورسەتتى»، - دەي كەلىپ، وسى ارقىلى ۇلتشىلدىق تاقىرىبىن كوتەرۋدىڭ قاجەتى جوق ەكەنىن ايتىپتى گولوۆكين.

دانيار ەلەۋسىنوۆ 2018 جىلى گولوۆكين جايلى «ءبىراز ۋاقىتتان بەرى GGG وزگەردى. ول قولجەتىمسىز بولىپ كەتتى» دەگەن ويىن ايتقان ەكەن. بىراق كەيىن ءوز پىكىرىنىڭ دۇرىس اۋدارىلماعانىن نەگىزگى ايتپاعى باسقا ەكەنىن جەتكىزدى.

«مەن گولوۆكين قازىر كوپشىلىك ءۇشىن جۇلدىز سياقتى – قولجەتىمسىز دەدىم. كوپتەگەن قازاقستاندىقتان قاشىقتا. ويتكەنى ول ۇنەمى شەتەلدە. مەنىڭ ايتقىم كەلگەن ءسوز وسى بولاتىن»، – دەگەن ەدى ول.

قىسقاسى، دانيار ەلەۋسىنوۆ گەننادي گولوۆكينمەن ءبىر كەشتە ونەر كورسەتە المايتىن بولدى. ەسەسىنە گولوۆكين — روللس جەكپە-جەگىنىڭ اندەركارتىندا بيىل ساۋىردە وتكەن ازيا چەمپيوناتىندا قىزىلوردالىق تۇرسىنباي قۇلاحمەتتەن جەڭىلگەن وزبەك بوكسشىسى يسرايل مادريموۆ جۇدىرىقتاسادى.

ەلەۋسىنوۆ پەن شاريپوۆادان بولەك، گەننادي گولوۆكينگە وكپە ارتىپ جۇرگەن قازاقستاندىق تاعى ءبىر بوكسشى - رۋسلان ماديەۆ (12-1, 5كو). گولوۆكيننىڭ انىق جەرلەسى، قاراعاندى وڭىرىندە تۋىپ وسكەن ماديەۆ ءبىر كەزدەرى جەرلەس اعاسىنىڭ «GGG Promotions» پروموۋتەرلىك كومپانياسىنىڭ قاراماعىندا جەكپە-جەك وتكىزىپ ءجۇردى.

سول بوكسشى جاقىندا رrosports.kz سايتىنا بەرگەن سۇحباتىندا «GGG Promotions» كومپانياسىنىڭ كەسىرىنەن كارەراسى قۇردىمعا كەتۋ الدىندا تۇرعانىن ايتتى. ونىڭ سوزىنشە، بەس جىل بويى گولوۆكيننىڭ قاراماعىندا جىتتىعىپ جۇرگەن. الايدا ەكىجاقتى ەشقانداي كەلىسىمشارت بولماعان. «GGG Promotions» وزىنە چەمپيوندىق جەكپە-جەك وتكىزىپ بەرمەيتىنىنە كوزى جەتكەن ماديەۆ كوماندادان كەتۋگە بەل بۋعان. بىراق باسقا پروموۋتەرلەر بۇرىنعى كومانداسىنان شىققانى جايلى انىقتاما سۇراعان. ال گولوۆيكين ول قاعازدى 100 مىڭ دوللارعا ساتقىسى كەلەدى. ءسويتىپ، تالانتتى بوكسشى اقش-تا جەكپە-جەك وتكىزۋ قۇقىعىنان قاعىلعان.

«امەريكادا بارلىق پروموۋتەرلەر سوتتاردان قورقادى. سوندىقتان ولار تاۋەكەلگە بارعىسى كەلمەيدى. ولارعا مەنىڭ GGG Promotions-پەن كەلىسىمشارتىم جوق دەگەن قاعاز كەرەك. بىراق گەننادي ماعان بۇل قاعازدى تەك 100 مىڭ دوللار تولەسەم عانا بەرەتىنىن ايتتى. بۇل مەن ءۇشىن تۇسىنىكسىز جاعداي. سەبەبى مەن بەس جىل تەگىن جۇمىس اتقاردىم دەسە دە بولادى. قازىر ءبىر تيىن دا بەرمەيمىن. گولوۆكيننەن مۇندايدى كۇتپەدىم»، - دەيدى رۋسلان ماديەۆ.

گولوۆكين بۇل 100 مىڭدى رۋسلانعا جاتتىعۋ لاگەرىن ۇسىنىپ، بيلەتتەر مەن ءدارى-دارمەكتەر ساتىپ الىپ بەرگەنى ءۇشىن سۇراپ وتىرعان كورىنەدى. الايدا ولار ماديەۆ قاتىسقان جەكپە-جەكتەردەن تۇسكەن تابىستى ەسكەرمەگەن. ماسەلەن، Golden Boy Promotions ۇيىمداستىرعان بوكس كەشىندە رۋسلاندى GGG Promotions-تەن ساتىپ العان. بىراق بۇل اقشادان بوكسشىنىڭ وزىنە ەشتەڭە تيمەگەن.

رۋسلان ماديەۆ (12-1, 5كو)

سونىمەن قاتار، رۋسلان ماديەۆ ءدال قازىر «GGG Promotions» ساپىندا جۇرگەن الي احمەتوۆتىڭ جاقىن ارادا چەمپيوندىق اتاق ءۇشىن جەكپە-جەك وتكىزەتىنىنە كۇمانمەن قارايدى. گولوۆكيننىڭ كومانداسى اقشا جۇمساپ احمەتوۆقا ۇلكەن جەكپە-جەك وتكىزىپ بەرەتىنىنە سەنىمسىز كورىنەدى.

«الي – وتە مىقتى بوكسشى. العاش Big Bear-گە كەلگەندە، ونىڭ ەنشىسىندە كاسىپقوي بوكستا 12 جەكپە-جەك بولدى. بىراق امەريكاداعى ءبىرىنشى قارسىلاسى 12 رەت جەڭىلگەن وتە ءالسىز بوكسشى بولدى. ارتىنشا، 14 رەت ۇتىلعان بوكسشىمەن جۇدىرىقتاستى. ەندىگى قارسىلاسى 37 جاستاعى بوكسشى بولماق. بۇل دۇرىس پا؟ ەگەر دە ءاليدى كوتەرگىسى كەلمەسە، نە ءۇشىن ونى قيناپ ءجۇر؟ مىقتى قارسىلاس تابۋ ءۇشىن اقشا تولەۋ كەرەك، ال ولار قاراجات جۇمساعىسى كەلمەيدى»، - دەيدى ماديەۆ.

«ماكس پەن گەنانى ۇلكەن اعالارىم رەتىندە كوردىم، ولاردىڭ ىستەپ جاتقانى مىناۋ... مەنىڭ كارەرامدى قۇرتىپ جاتىر دەسەم دە بولادى»، - دەپ كۇيىنگەن رۋسلان ماكسيم گولوۆكيننىڭ "بارلىق سۇراقتار بويىنشا گەنناديگە حابارلاس" دەگەنىن، ال گەنناديگە حابارلاسسا تەلەفونىن المايتىنىن، ءتىپتى بوكسشىنى بىلاي قويىپ زاڭگەرلەرگە دە جاۋاپ بەرمەيتىنىن ايتادى.

بيىل ءساۋىر ايىنىڭ سوڭىندا وتانداسىمىز ءوزىن توعىز جىل جاتتىقتىرعان باپكەرى ابەل سانچەسپەن قوشتاسىپ، دجوناتان بەنكس ەسىمدى جاتتىقتىرۋشىمەن كەلىسىمگە كەلگەن ەدى. قازاقستاندىق جانكۇيەرلەر ءۇشىن وكىنىشتىسى، گولوۆكين ۇزاق ۋاقىت سەرىكتەس بولعان باپكەرىمەن دە جىلى قوشتاسا المادى.

گەننادي گولوۆكينمەن كەلىسىمشارتتى ۇزگەننەن كەيىن مەكسيكالىق مامان بۇرىنعى شاكىرتىنىڭ قىزعانشاق ەكەنىن جانە اقشا ونى وزگەرتكەنىن ايتتى.

«مەن گولوۆكيننەن مۇندايدى كۇتكەن جوقپىن. ول DAZN-مەن كەلىسىم جاساعاننان كەيىن، ايلىعىمدى قىسقارتاتىنىن ايتتى. ارينە، مەن وعان كونبەدىم. جانە ەكەۋمىز جۇمىستى توقتاتۋدى ءجون دەپ شەشتىك. گەنناديگە سەنىپ جۇرگەن مەن اقىماق ەكەنمىن، اقشا ونى سونشالىقتى وزگەرتەدى دەپ ويلامادىم، قىزعانشاق ادام ەكەن. ءومىر مۇنىمەن توقتامايدى، ارى قاراي قولداعى شاكىرتتەرىممەن جۇمىسىمدى جالعاستىرامىن»، - دەدى ابەل سانچەس.

ابەل سانچەس پەن GGG

داڭقتى بوكسشىمىزدىڭ بىلتىر دا باسى داۋعا قالعان ەدى. كاسىپقوي بوكستا جەكپە-جەك باستالار الدىندا قارسىلاس قوس بوكسشىنىڭ جانە اقش ەلىنىڭ ءانۇرانى ورىندالادى. الايدا، 16 قىركۇيەك مەكسيكالىق ساۋل الۆارەسپەن جۇدىرىقتاساتىن ءبىزدىڭ گەنا وسى راسىمنەن باس تارتتى. باسقاشا ايتقاندا، ءوزى «اسپانعا كوتەرىپ، الەمگە ايگىلەپ» جۇرگەن كوك تۋىمىزدى اسپانعا كوتەرگىسى كەلمەي قالعان.

ءسويتىپ، گەننادي ميلليونداعان وتانداسىن «كوك تۋدىڭ جەلبىرەپ، ءانۇراننىڭ شىرقالعان» ءساتىن كورۋ مۇمكىندىگىنەن "ايىردى". مۇمكىن ولار ءۇشىن ءانۇران ورىندالۋ-ورىندالماۋى قاتتى ماڭىزدى ەمەس شىعار. الايدا، قازاقستاندىق تۇسىنىكتە گەننادي جەكپە-جەگىنىڭ الدىندا شىرقالعان ءانۇران «بۇكىل قازاقستاندى الەمگە تانىتادى». ءارى وسى ءبىر ساتتىك "باقىت" بۇكىل قازاق جانكۇيەرلەرىنە كۇندەلىكتى كۇيبىڭ تىرشىلىگىن ۇمىتتىرار ەدى...

وسىلايشا، بار قازاقتىڭ ماحابباتىنا بولەنگەن گەننادي گولوۆكين دە كەز-كەلگەن سپورتشى ءۇشىن ەڭ ماڭىزدى ماقسات ءبىز ويلاعانداي ەلدىڭ تۋىن جەلبىرەتۋ ەمەس ەكەنىن كورسەتىپ بەرگەن ەدى. سول ءۇشىن ءبىزدىڭ حالىق انشىلەر مەن سپورتشىلاردىڭ جەتىستىگىنە مارقايىپ، ءوز-ءوزىن الداعاندى قويعانى ءجون.

قۋانىش قاپپاس

Abai.kz