Қазіргі таңда сапалы білім беру – кез келген жоғары оқу орнының басты мақсаты. Әл-Фараби атындағы Қазақ ұлттық университеті – еліміздегі жетекші жоғары оқу орындарының бірі ретінде сапалы білім беруді басты мақсат етіп қойып отыр.

БҰҰ-ның бастауымен алғаш рет «тұрақты даму» концепциясы ұсынылды. «Тұрақты даму мақсаттары» – қазіргі уақыттың қажеттілігін қамтамасыз ете отырып, болашақ ұрпақтардың өзінің қажеттіліктерін қамтамасыз етуіне қауіп туғызбайтын даму. Тұрақты даму мақсаттары  концепциясының 4 бөлімі –«сапалы  білім» екенін ескере отырып,оқу ордамыз білім беру бағдарламаларын әлемдік стандарттарға сәйкестендіріп, шетелдік университеттермен серіктестік орнатып келеді.

ҚазҰУ халықаралық стандарттарға сай білім беру моделін ұстанады. Заманауи технологиялар мен цифрлық білім беру платформалары оқу процесін тиімді әрі қолжетімді етеді. Университет қабырғасында теория мен практиканы ұштастыруға үлкен мән беріледі. Студенттер ғылыми жобаларға қатысып, кәсіби тәжірибеден өтіп, өз саласының маманы ретінде қалыптасуға мүмкіндік алады. ҚазҰУ әлемнің алдыңғы қатарлы университеттерімен әріптестік орнатып, шетелдік оқытушылар мен сарапшыларды тарту арқылы білім сапасын арттыруда. Бұл өз кезегінде студенттер мен түлектердің әлемдік еңбек нарығында бәсекеге қабілетті болуына жол ашады. Сапалы білім – жеке тұлғаның интеллектуалды және рухани дамуының, қоғамның өркендеуі мен прогресінің басты қозғаушы күші. Ол тек  студенттерге қажетті білім мен дағдыларды беріп қана қоймай, олардың сыни ойлау қабілетін, шығармашылық әлеуетін және адамгершілік қасиеттерін қалыптастыруға бағытталған.

Қазіргі уақытта білім саласы бәсекеге қабілеттіліктің өлшеміне айналып отыр. Әлемдегі көшбасшы елдер ең алдымен білім мен ғылымды дамытуға күш салып, зор жетістіктерге жетуде.

Осы орайда университеттің өркендеуіне география және табиғатты пайдалану факультеті Картография және геоинформатика кафедрасы өз үлесін қосуда.

Кафедрамыз сапалы білім беріп,сапалы мамандар дайындауды басты назарға алды.Сапалы білім тек теорияны үйретіп қана қоймай, оны нақты өмірде қолдануға бағытталған практикалық дағдыларды да қалыптастырады. Кафедрамыздың профессорлық-оқытушылар құрамы студенттерге білімді тәжірибеде қалай қолдануға болатынын көрсетіп,мықты маман болуға күш салуда.

Сапалы білім – ұлт болашағының кепілі. ҚазҰУ бұл ұстанымды басшылыққа алып, білім беру мазмұнын үздіксіз жетілдіру арқылы ел дамуына өз үлесін қосып келеді. Университет ұжымы үшін басты мақсат – жас ұрпаққа терең білім, биік рух пен болашаққа сенімді қадам сыйлау.

Үміт Қожахметова,

Әл-Фараби атындағы ҚазҰУ География және табиғатты пайдалану факультеті Картография және геоинформатика кафедрасының  аға оқытушысы

Abai.kz