Бүгінде балалар әдебиеті десе, есімізге ең алдымен «Менің атым Қожа» шығармасы түседі. Талантты жазушы Бердібек Соқпақбаевтың бұл шығармасы бір емес, бірнеше ұрпақтың сүйіп оқитын кітабына айналды. Былайша айтқанда, аталған шығарма өз міндетін өтеді.

Ал жаңа дәуірде балалар санасын оятатын, рухын шыңдап, жанына қуат  сыйлайтын шығармалар керек екені анық. Жас авторлардың ізденісімен осыған дейін балаларға арналған туындылар жазылып келеді.

Сурет: Википедиядан алынды.

Бұған мысал Рүстем Сауытбайдың «Шоко әлем» сериалық кітаптары. Автор тың ізденістері арқылы балаларға арналған жеті кітап жазды. Яғни бұны біз шығармашыл жастың қазақ балаларының білім-ғылым көкжиегін кеңейтіп, оқуға ынтызар болуына қосқан үлесі деп білеміз. Элия мен Райл сияқты жаңа кейіпкер арқылы тылсым оқиғаларға жас оқырмандарды еліткен бұл шығарма қазір кішкентай оқырмандардың қолынан түспей келеді.

Кезінде осы жанрда Қадыр Мырзалиев, Мұзафал Әлімбаев, Қастек Баянбаев сияқты ұлы қаламгерлер қалам тербеді. Олардың артына қалдырған мол қазыналары қазірге дейін балалар әдебиеті саласына азық болып келеді. Олардың соңынан ілесе Молдахмет Қаназ сияқты жазушылар аталған жанрға аянбай тер төгуде. Оның «Чика - Дабылдың баласы», «Жер кіндігі»  сияқты повестері бала оқырмандар үшін таптырмас қазыналар екені шындық.

Сурет: Википедиядан алынды.

«Чика-Дабылдың баласы» шығармасында майдангер Дабылдың әйелі Тәнзила ауылға әкеліп үлестірілген балалардың ішінен Чика атты неміс баласын асырап алады. Жазушы өз кейіпкері арқылы Чиканың жаңа ортаға үйлесуін керемет жазушылық шеберлікпен жеткізе білген. Ал автордың  «Ақтайлағым-ай» повесі де қазіргі балалар әдебиетіндегі соны туындының бірі. Бұл шығармада жазушы бала Біләлдің жан-дүниесіне терең үңіледі.

Қалай десек те, қазір қазақ балалар әдебиетіне бір серпіліс керек екені анық. Телефонға телмірген ұрпақты қағаз кітапқа қарату үшін де үлкен күрес керектігі тағы рас. Сол үшін бұл күресте балаларға арналған шығармалар жазатын жазушы қауымның жүгі ауыр болмақ.

Abai.kz