بۇگىندە بالالار ادەبيەتى دەسە، ەسىمىزگە ەڭ الدىمەن «مەنىڭ اتىم قوجا» شىعارماسى تۇسەدى. تالانتتى جازۋشى بەردىبەك سوقپاقباەۆتىڭ بۇل شىعارماسى ءبىر ەمەس، بىرنەشە ۇرپاقتىڭ ءسۇيىپ وقيتىن كىتابىنا اينالدى. بىلايشا ايتقاندا، اتالعان شىعارما ءوز مىندەتىن وتەدى.

ال جاڭا داۋىردە بالالار ساناسىن وياتاتىن، رۋحىن شىڭداپ، جانىنا قۋات  سىيلايتىن شىعارمالار كەرەك ەكەنى انىق. جاس اۆتورلاردىڭ ىزدەنىسىمەن وسىعان دەيىن بالالارعا ارنالعان تۋىندىلار جازىلىپ كەلەدى.

سۋرەت: ۆيكيپەديادان الىندى.

بۇعان مىسال رۇستەم ساۋىتبايدىڭ «شوكو الەم» سەريالىق كىتاپتارى. اۆتور تىڭ ىزدەنىستەرى ارقىلى بالالارعا ارنالعان جەتى كىتاپ جازدى. ياعني بۇنى ءبىز شىعارماشىل جاستىڭ قازاق بالالارىنىڭ ءبىلىم-عىلىم كوكجيەگىن كەڭەيتىپ، وقۋعا ىنتىزار بولۋىنا قوسقان ۇلەسى دەپ بىلەمىز. ەليا مەن رايل سياقتى جاڭا كەيىپكەر ارقىلى تىلسىم وقيعالارعا جاس وقىرمانداردى ەلىتكەن بۇل شىعارما قازىر كىشكەنتاي وقىرمانداردىڭ قولىنان تۇسپەي كەلەدى.

كەزىندە وسى جانردا قادىر مىرزاليەۆ، مۇزافال الىمباەۆ، قاستەك بايانباەۆ سياقتى ۇلى قالامگەرلەر قالام تەربەدى. ولاردىڭ ارتىنا قالدىرعان مول قازىنالارى قازىرگە دەيىن بالالار ادەبيەتى سالاسىنا ازىق بولىپ كەلەدى. ولاردىڭ سوڭىنان ىلەسە مولداحمەت قاناز سياقتى جازۋشىلار اتالعان جانرعا ايانباي تەر توگۋدە. ونىڭ «چيكا - دابىلدىڭ بالاسى»، «جەر كىندىگى»  سياقتى پوۆەستەرى بالا وقىرماندار ءۇشىن تاپتىرماس قازىنالار ەكەنى شىندىق.

سۋرەت: ۆيكيپەديادان الىندى.

«چيكا-دابىلدىڭ بالاسى» شىعارماسىندا مايدانگەر دابىلدىڭ ايەلى ءتانزيلا اۋىلعا اكەلىپ ۇلەستىرىلگەن بالالاردىڭ ىشىنەن چيكا اتتى نەمىس بالاسىن اسىراپ الادى. جازۋشى ءوز كەيىپكەرى ارقىلى چيكانىڭ جاڭا ورتاعا ۇيلەسۋىن كەرەمەت جازۋشىلىق شەبەرلىكپەن جەتكىزە بىلگەن. ال اۆتوردىڭ  «اقتايلاعىم-اي» پوۆەسى دە قازىرگى بالالار ادەبيەتىندەگى سونى تۋىندىنىڭ ءبىرى. بۇل شىعارمادا جازۋشى بالا ءبىلالدىڭ جان-دۇنيەسىنە تەرەڭ ۇڭىلەدى.

قالاي دەسەك تە، قازىر قازاق بالالار ادەبيەتىنە ءبىر سەرپىلىس كەرەك ەكەنى انىق. تەلەفونعا تەلمىرگەن ۇرپاقتى قاعاز كىتاپقا قاراتۋ ءۇشىن دە ۇلكەن كۇرەس كەرەكتىگى تاعى راس. سول ءۇشىن بۇل كۇرەستە بالالارعا ارنالعان شىعارمالار جازاتىن جازۋشى قاۋىمنىڭ جۇگى اۋىر بولماق.

Abai.kz