Путин бастаған соғыстың үш демеушісі барлығы ашыққа шықты. Сонымен Солтүстік Корея-Қытай-Үндістан үштағаны әлемдік БАҚ пен саясаткерлердің әңгімелерінің өзегіне айналды десек те болады. 

Ресейге Қытай мүмкіндік беруде. 

Украина Президенті Зеленский Путиннің әрекеттері – соның ішінде 28 тамызға қараған түні Украинаны жаппай соққы астына алуы - оның соғысты аяқтауға мүдделі екендігі туралы АҚШ президенті Дональд Трампқа айтқан мәлімдемелеріне кереғар тірлік екенін атап өтті.

Жұрттың бәрінің көзі жеткен мәселе мынада: Путин тек Трампты ғана емес, өзі бірдеңені уәде еткен көшбасшыларды алдап соғудан еш тайынбайды, беттеріне күле қарап, артынша өз дегенін істеп, ойға алған дүниесін жалғастыра береді. Оның бұлай істеуіне әлі күнге дейін Путинмен жең ұшынан жалғасып, түрлі түлкібұлаңға салып, сауда жасайтын елдердің көмегі себеп болып отыр. Бұл мүмкіндікті молынан беруші ең алдымен Қытай немесе Үндістан. Жәнеде Азия мен Латын Америкасының кейбір мемлекеттері. Бұлар осы әрекеттері арқылы бір күндік пайда үшін Ресеймен бірге адам қанын мойындарына жүктетеп отырғаны Зеленский пікіріне арқау болды

Ол бірқатар елдердің көшбасшыларымен бүгінгі болған әңгімелерді де жұрт алдына жайып салды. Енді сол жайында сөз қозғалық.

"Мен сондай-ақ Біріккен Ұлттар Ұйымының бас хатшысы Гутерришпен оның Шанхай ынтымақтастық ұйымы форматындағы кездесулерге дайындығы тұрғысынан сөйлестім. Бұл Қытайдағы кездесулер болып табылады. Өкінішке қарай, Қытай Ресейге соғысуға мүмкіндік беріп, сөзі мен ісі бір жерден шықпай жатыр. Қытай тарапынан соғысты одан әрі өрістетуге болмайды және оқ атуды тоқтату керек деген мәлімдемелер айтыла-айтыла әбден жауыр болды. Бұл бағытта олар  талап емес, ниет те танытып жатқан жоқ", – деп мәлімдеді Зеленский.

Украина Президенті «жаһандық субъектілерді жұмыла жұмыс істеуге көндіру» қажет деп есептейді.

Ақ үйдің кеңесшісі Наварро Үндістанды Ресей мұнайын сатып алғаны үшін Ресейдің Украинаға қарсы соғысын қаржыландырды деп айыптап, оны «Моди соғысы» деп мәлімдеді.

Птиер Наварро Bloomberg TV эфирінде Үндістан премьер-министрі Нарендра Модиді меңзей отырып: «Мен Модидің соғысын айтып отырмын, өйткені бейбітшілікке жол жарым жартылай Нью-Дели арқылы өтеді», - деп мәлімдеді.

«Ресей мұнайын «жеңілдікпен» сатып ала отырып, Үндістан Ресейге көмектеседі және АҚШ-қа зиян келтіреді, олар өз кезегінде амалсыздан Украинаны қаржыландыруға мәжбүр», – деді ол қабағын түйе күйініп.

«Америка осы бағытта нені қолға алмасын, айналып келгенде бәрі Үндістанның әрекетінен тығырыққа тіреледі. Үнділер салынған жоғарғы баждың кесірінен тұтынушылар, бизнес, жұмысшылар қағажу көріп, оның ауыр салмағы біздегі жұмыс орындарына, зауыттарға, табысқа және жоғары жалақыға түседі. Содан кейін салық төлеушілер ауыр жағдайда қалғаннан кейін, бізге қол қусырып қарап отырмай, амалсыздан Моди соғысын қаржыландыруына тура келеді», – деп мәлімдеді кеңесші.

Осылайша Путин жеңіл ақша арқылы Ақ үйдің сағын сындырудың жолын тауып, қытай мен үнді бизнесін әлемінің көз алдында өз демеушілеріне айналдыра білді.

Abai.kz