پۋتين باستاعان سوعىستىڭ ءۇش دەمەۋشىسى بارلىعى اشىققا شىقتى. سونىمەن سولتۇستىك كورەيا-قىتاي-ءۇندىستان ۇشتاعانى الەمدىك باق پەن ساياساتكەرلەردىڭ اڭگىمەلەرىنىڭ وزەگىنە اينالدى دەسەك تە بولادى. 

رەسەيگە قىتاي مۇمكىندىك بەرۋدە. 

ۋكراينا پرەزيدەنتى زەلەنسكي ءپۋتيننىڭ ارەكەتتەرى – سونىڭ ىشىندە 28 تامىزعا قاراعان ءتۇنى ۋكراينانى جاپپاي سوققى استىنا الۋى - ونىڭ سوعىستى اياقتاۋعا مۇددەلى ەكەندىگى تۋرالى اقش پرەزيدەنتى دونالد ترامپقا ايتقان مالىمدەمەلەرىنە كەرەعار تىرلىك ەكەنىن اتاپ ءوتتى.

جۇرتتىڭ ءبارىنىڭ كوزى جەتكەن ماسەلە مىنادا: پۋتين تەك ترامپتى عانا ەمەس، ءوزى بىردەڭەنى ۋادە ەتكەن كوشباسشىلاردى الداپ سوعۋدان ەش تايىنبايدى، بەتتەرىنە كۇلە قاراپ، ارتىنشا ءوز دەگەنىن ىستەپ، ويعا العان دۇنيەسىن جالعاستىرا بەرەدى. ونىڭ بۇلاي ىستەۋىنە ءالى كۇنگە دەيىن پۋتينمەن جەڭ ۇشىنان جالعاسىپ، ءتۇرلى تۇلكىبۇلاڭعا سالىپ، ساۋدا جاسايتىن ەلدەردىڭ كومەگى سەبەپ بولىپ وتىر. بۇل مۇمكىندىكتى مولىنان بەرۋشى ەڭ الدىمەن قىتاي نەمەسە ءۇندىستان. جانەدە ازيا مەن لاتىن امەريكاسىنىڭ كەيبىر مەملەكەتتەرى. بۇلار وسى ارەكەتتەرى ارقىلى ءبىر كۇندىك پايدا ءۇشىن رەسەيمەن بىرگە ادام قانىن مويىندارىنا جۇكتەتەپ وتىرعانى زەلەنسكي پىكىرىنە ارقاۋ بولدى

ول بىرقاتار ەلدەردىڭ كوشباسشىلارىمەن بۇگىنگى بولعان اڭگىمەلەردى دە جۇرت الدىنا جايىپ سالدى. ەندى سول جايىندا ءسوز قوزعالىق.

"مەن سونداي-اق بىرىككەن ۇلتتار ۇيىمىنىڭ باس حاتشىسى گۋتەرريشپەن ونىڭ شانحاي ىنتىماقتاستىق ۇيىمى فورماتىنداعى كەزدەسۋلەرگە دايىندىعى تۇرعىسىنان سويلەستىم. بۇل قىتايداعى كەزدەسۋلەر بولىپ تابىلادى. وكىنىشكە قاراي، قىتاي رەسەيگە سوعىسۋعا مۇمكىندىك بەرىپ، ءسوزى مەن ءىسى ءبىر جەردەن شىقپاي جاتىر. قىتاي تاراپىنان سوعىستى ودان ءارى ورىستەتۋگە بولمايدى جانە وق اتۋدى توقتاتۋ كەرەك دەگەن مالىمدەمەلەر ايتىلا-ايتىلا ابدەن جاۋىر بولدى. بۇل باعىتتا ولار  تالاپ ەمەس، نيەت تە تانىتىپ جاتقان جوق", – دەپ مالىمدەدى زەلەنسكي.

ۋكراينا پرەزيدەنتى «جاھاندىق سۋبەكتىلەردى جۇمىلا جۇمىس ىستەۋگە كوندىرۋ» قاجەت دەپ ەسەپتەيدى.

اق ءۇيدىڭ كەڭەسشىسى ناۆاررو ءۇندىستاندى رەسەي مۇنايىن ساتىپ العانى ءۇشىن رەسەيدىڭ ۋكرايناعا قارسى سوعىسىن قارجىلاندىردى دەپ ايىپتاپ، ونى «مودي سوعىسى» دەپ مالىمدەدى.

پتيەر ناۆاررو Bloomberg TV ەفيرىندە ءۇندىستان پرەمەر-ءمينيسترى نارەندرا ءموديدى مەڭزەي وتىرىپ: «مەن ءموديدىڭ سوعىسىن ايتىپ وتىرمىن، ويتكەنى بەيبىتشىلىككە جول جارىم جارتىلاي نيۋ-دەلي ارقىلى وتەدى»، - دەپ مالىمدەدى.

«رەسەي مۇنايىن «جەڭىلدىكپەن» ساتىپ الا وتىرىپ، ءۇندىستان رەسەيگە كومەكتەسەدى جانە اقش-قا زيان كەلتىرەدى، ولار ءوز كەزەگىندە امالسىزدان ۋكراينانى قارجىلاندىرۋعا ءماجبۇر»، – دەدى ول قاباعىن تۇيە كۇيىنىپ.

«امەريكا وسى باعىتتا نەنى قولعا الماسىن، اينالىپ كەلگەندە ءبارى ءۇندىستاننىڭ ارەكەتىنەن تىعىرىققا تىرەلەدى. ۇندىلەر سالىنعان جوعارعى باجدىڭ كەسىرىنەن تۇتىنۋشىلار، بيزنەس، جۇمىسشىلار قاعاجۋ كورىپ، ونىڭ اۋىر سالماعى بىزدەگى جۇمىس ورىندارىنا، زاۋىتتارعا، تابىسقا جانە جوعارى جالاقىعا تۇسەدى. سودان كەيىن سالىق تولەۋشىلەر اۋىر جاعدايدا قالعاننان كەيىن، بىزگە قول قۋسىرىپ قاراپ وتىرماي، امالسىزدان مودي سوعىسىن قارجىلاندىرۋىنا تۋرا كەلەدى»، – دەپ مالىمدەدى كەڭەسشى.

وسىلايشا پۋتين جەڭىل اقشا ارقىلى اق ءۇيدىڭ ساعىن سىندىرۋدىڭ جولىن تاۋىپ، قىتاي مەن ءۇندى بيزنەسىن الەمىنىڭ كوز الدىندا ءوز دەمەۋشىلەرىنە اينالدىرا ءبىلدى.

Abai.kz