قر دەنساۋلىق ساقتاۋ مينيسترلiگiنىڭ نازارىنا!

ونسىز دا جەرگىلىكتى اق حالاتتىلارعا دەگەن سەنىمدەرى ازايىپ، ارىسى استراحان، بەرىسى اقتوبەنىڭ ەمحانالارىن جاعالاپ جۇرگەن اتىراۋلىقتار تاعى ءبىر سۇمدىق جايتتىڭ كۋاسى بولىپ وتىر.
ايدىڭ-كۇننىڭ امانىندا قۇرساعىن جارىپ شىققان شاراناسىنان ايىرىلىپ وتىرعان انا جۇرەگى ءسابيىنىڭ نە ءولى، نە ءتىرى ەكەنىنەن بەيحابار قالىپتا سەرگەلدەڭگە ءتۇسىپ ءجۇر. «ءولى تۋىلدى» دەپ قولدارىنا ۇستاتقان شارانانىڭ بيولوگيالىق اتا-اناسى وزدەرى ەمەس ەكەنىنە ءبىر جىلدان كەيىن بارىپ قانا كوزدەرى جەتكەن بەيباقتار ەندى نە ىستەۋى كەرەك؟

قر دەنساۋلىق ساقتاۋ مينيسترلiگiنىڭ نازارىنا!

ونسىز دا جەرگىلىكتى اق حالاتتىلارعا دەگەن سەنىمدەرى ازايىپ، ارىسى استراحان، بەرىسى اقتوبەنىڭ ەمحانالارىن جاعالاپ جۇرگەن اتىراۋلىقتار تاعى ءبىر سۇمدىق جايتتىڭ كۋاسى بولىپ وتىر.
ايدىڭ-كۇننىڭ امانىندا قۇرساعىن جارىپ شىققان شاراناسىنان ايىرىلىپ وتىرعان انا جۇرەگى ءسابيىنىڭ نە ءولى، نە ءتىرى ەكەنىنەن بەيحابار قالىپتا سەرگەلدەڭگە ءتۇسىپ ءجۇر. «ءولى تۋىلدى» دەپ قولدارىنا ۇستاتقان شارانانىڭ بيولوگيالىق اتا-اناسى وزدەرى ەمەس ەكەنىنە ءبىر جىلدان كەيىن بارىپ قانا كوزدەرى جەتكەن بەيباقتار ەندى نە ىستەۋى كەرەك؟

اتا-انا ءۇشىن بالانىڭ الاسى جوق. ءبارى بىردەي. بىراق ون بەس جىلدان كەيىن ەكى ۇلدىڭ سوڭىنان كورگەلى تۇرعان سابيلەرىنىڭ قىز بالا ەكەنىن بىلگەن جىلىوي اۋدانى جاڭا قاراتون اۋىلىنىڭ تۇرعىندارى اشىقباەۆتار اۋلەتى ءۇشىن بۇل قۋانىشتىڭ ورنى بولەك ەدى.
وتكەن جىلدىڭ اقپان ايىندا كەشكى ساعات 8-دەر شاماسىندا ايى-كۇنى جەتكەن انانى اۋداندىق پەرزەنتحاناعا اكەلگەن. ونداعىلار تولعاعى ۇستاپ، الدىن الا مەديتسينالىق ساراپتامالار كورسەتكەندەي، دەنى-قارنى ساۋ بالانى دۇنيەگە اكەلمەك اناعا تىنىشتاندىراتىن ءدارى ەگىپ، تولعاقتى باسۋعا تىرىسقان. ءتۇنى بويى جانى كوزىنە كورىنگەن اناعا «اق حالاتتى ابزال جانداردىڭ» قانداي «كومەك» كورسەتكەندەرىن ءبىر اللا بىلەدى. ەرتەسى كۇنى ءتۇس الەتىندە «دەنساۋلىعى جاقسى، ءسابيدىڭ دامۋى دا بىرقالىپتى، الاڭدايتىن نەگىز جوق» دەپ جۇكتىلىك كەزىندەگى مەديتسينالىق كىتاپشاعا ءمور باسقان دارىگەرلەر انانى كەسار تىلىگى ارقىلى بوساندىرىپ الادى.
ءاپ-ادەمى قىزدىڭ اكەسى بولامىن دەپ ارمانداپ جۇرگەن وتاعاسىنا سۋىت حابار جەتەدى: «بالا ءولى تۋىلدى. اناسىنىڭ جاعدايى اۋىر. گەموگلوبين 30-عا ءتۇسىپ كەتكەن. امان قالۋ-قالماسى ەكىتالاي». سارساڭعا تۇسكەن اكە تۋما-تۋىستارىن جيناپ، جۇبايىنا ءبىر كۇندە 25 ادامنىڭ قانىن تاپسىرتادى. ال ءولى تۋعان نارەستەنىڭ دەنەسىن جەر قوينىنا تاپسىرادى. اتىن قويىپ، ءدىني جورالعىسىن جاسايدى.

بىراق نەگە ەكەنىن، جۇرەگى قان جىلاپ، ءسابيىن قارا جەرگە كومگەن اكە سول ءتۇنى كوز ىلمەستەن تاڭ اتىرادى. ودان كەيىن دە كىرپىگى ايقاسا كەتسە بولدى، نارەستە قىز تۇسىنەن شىقپاي قويادى. كورەر جارىعى بولىپ، اۋرۋحانا توسەگىنەن امان-ەسەن ۇيىنە كەلگەن ساۋلە-انانىڭ دا جۇرەگى ءبىر سۇمدىقتى سەزگەندەي، جانى تىنىشتانبايدى.
اقىرى وتاعاسى «الىستاعىنى جاقىننان بولجاپ بىلەدى» دەپ ەل-جۇرت اۋزىنان تاستامايتىن دەمەۋ كورىپكەلگە جول تارتادى. دەمەۋ دە، ودان كەيىن بارعان بالشى دا جاتتاپ العانداي: «كومگەن ءسابيىڭىز ءوز بالاڭىز ەمەس»، - دەيدى.
اۋداندىق  قۇقىق قورعاۋ ورگان­­­­­-
د­ارىنىڭ رۇقساتىمەن بالانىڭ تىندىك (دنك) ساراپتاماسىن جاساتپاق نيەتپەن وبلىس ورتالىعىنا بارعانىمەن، ونداعىلار «ءمايىتتى اشۋ كەرەك» دەگەندى ايتادى. اقىرى ءبىر ويعا باس تىككەسىن، اياعىنا جەتۋدى دىتتەگەن اتا-انا ءمايىتتى اشىپ، ءتورت پاكەتكە سالىنعان مۇردەنى الماتى قالاسىنداعى قر ادىلەت مينيسترلىگىنىڭ سوت-ساراپتاما ورتالىعىنا اپارادى. الايدا ساراپتاما اتا-انانىڭ ءۇش ۇيىقتاسا تۇسىنە ەنبەيتىن جايتتى ايتادى: زەرتتەلىپ وتىرعان ءمايىتتىڭ جىنىسى ۇل بالا، ال ەرلى-زايىپتى اشىقباەۆتار ءسابيدىڭ بيولوگيالىق اتا-اناسى ەمەس!
ازىرگە بەلگىلىسى - 2008 جىلدىڭ 17 اقپانىندا ساۋلە بوسانعان نارەستەنىڭ قىز بالا بولعانى جانە نە سەبەپتەن شەتىنەگەنى جايلى انىقتاماعا قول قويعان دارىگەر مامبەتوۆا.
ال باسقا بىرەۋدىڭ ۇل بالاسىن دارىگەر «سەنىڭ بالاڭ» دەپ قولىنا ۇستاتقاسىن، ءوز قىزى دەپ ويلاپ اتىن قويىپ، جەر قوينىنا تاپسىرعان اشىقباەۆتار اۋلەتىنىڭ شاراداي باسى شاقشاداي بولىپ وتىر: كىمنىڭ بالاسىن كومدىك جانە ءبىزدىڭ بالامىز قايدا؟ - دەپ.
ال جارىق دۇنيە ديدارىن كورمەستەن پەرىشتە قالپىندا جانى كوككە ۇشقان بەيكۇنا ءسابي، ءبىر جىلدان سوڭ مۇردەسى ءتورت پاكەتكە ءبولىنىپ، ساراپتامادان ساراپتاماعا وتەردەي نە جازىپ قويىپ ەدى؟ ول دا ءبىر اتا-انانىڭ سارىلىپ كۇتكەن ءسابيى شىعار. مۇمكىن ونىڭ دا اينالاسىندا قايعى مەن قاسىرەت بۇلتى ءۇيىرىلىپ جۇرگەن شىعار...
8 ماۋسىم كۇنى جىلىوي اۋداندىق سوتى قر قك 134-بابى بويىنشا «بالا اۋىستىرۋ» دەگەن ايىپپەن قىلمىستىق ءىس قوزعادى. دەگەنمەن تاپ قازىر كۇدىكتى مىناۋ دەپ كورسەتەردەي نەگىز جوق. تەرگەۋ امالدارى ەندى باستالىپ جاتىر.

وسىدان از عانا ۋاقىت بۇرىن اتىراۋداعى وبلىستىق پەرزەنتحانانىڭ باس دارىگەرى جانىبەك كوشاليەۆتىڭ ۇستىنەن قىلمىستىق ءىس قوزعالىپ، بەيكۇنا سابيلەردى بىرنەشە مىڭ دوللارعا ساتىپ كەلگەن دارىگەر قك 133-بابى بويىنشا جەتى جىلىن تەمىر توردىڭ ار جاعىندا وتكىزۋگە كەسىلگەن.
البەتتە، بالىق باسىنان ءشىريدى. بىراق دۇنيەگە اكەلمەك ءسابيىنىڭ اماندىعىنا كەپىل بولادى دەيتىن دارىگەر وسىنداي «سىي» ۇسىنسا، ەل ەندى كىمگە سەنۋى كەرەك؟

اتىراۋ وبلىسى

«جاس قازاق» گازەتى، №24, 19.06.2009