31-شىلدە قازاقستاندا قۇربان ايت مەرەكەسى. وسىعان وراي قمبد وكىلدەرى قۇربان شالۋعا قاتىستى تۋىنداعان تۇيىتكىلدى ماسەلەلەردى ءتۇسىندىردى.

بىرىنشىدەن، بۇل – ۋاكىلدىك قۇرباندىق. شاريعات بويىنشا ادام ءوزىنىڭ اتىنان باسقا كىسىنى بەلگىلى ءبىر ىسكە ۋاكىل ەتە الادى. ويتكەنى، ادام بالاسى كەيبىر جاعدايدا ءبىر ءىستى ورىنداۋعا مۇمكىندىگى بولماي قالادى. وسى كەزدە بىرەۋدىڭ كومەگىنە جۇگىنەدى، ياعني سول ءىستى وعان تاپسىرادى، ونى ءوزىنىڭ اتىنان ۋاكىل ەتەدى. بىردە پايعامبارىمىز (وعان اللانىڭ سالاۋاتى مەن سالەمى بولسىن) حاكيم يبن حيزام (ودان اللا رازى بولسىن) ارقىلى قۇرباندىق ساتىپ الۋعا تاپسىرىس بەرەدى. ءبىز وسى وقيعادان شاريعات بويىنشا ۋاكىلگە تاپسىرىس بەرۋ ارقىلى قۇربان شالدىرۋعا بولاتىنىن انىق اڭعارامىز.

كارانتين جاعدايىندا قالادا تۇرىپ جاتقان ازاماتتار ءۇشىن قاشىقتىقتان ءوز اتىنان قۇربان شالۋعا تاپسىرىس بەرۋ – وڭتايلى شەشىم.

ەكىنشىدەن، اۋىلدىق جەردە جەكە تۇرعىن ۇيدە تۇراتىن ءار ادامنىڭ مۇسىلماندىق مىندەتىن اتقارۋىنا قمدب تاراپىنان ەشقانداي شەكتەۋ جوق ەكەنىن جەتكىزەمىز.

ۇشىنشىدەن، حانافي ءمازھابىندا قۇربان ايت كۇندەرى باي ادامعا قۇربان شالۋ – ءۋاجىپ (مىندەت). ول ءۇشىن مال-دۇنيەسى نيساپ مولشەرىنە جەتۋ قاجەت، ياعني كەمىندە 40 قويى نەمەسە 30 قارامالى نەمەسە 5 تۇيەسى نەمەسە قاجەتتىلىگىنەن ارتىق 85 گر التىنى (1 ملن 285 مىڭ تەڭگە) بولۋ كەرەك. شاريعاتىمىز مال-دۇنيەسى نيساپ مولشەرىنە جەتپەگەن، ياعني جاعدايى جوق مۇسىلمانعا قۇربان شالۋدى مىندەتتەمەيدى.

تورتىنشىدەن، بۇگىندە رەسپۋبليكا بويىنشا قۇرباندىق ەتىن الۋعا ءوتىنىش بىلدىرگەن ادام سانى قۇربان شالۋعا تاپسىرىس بەرۋشىلەردەن بىرنەشە ەسە اسىپ ءتۇستى. 2020 جىلدىڭ 29 شىلدەسىندەگى ساعات 10:00 بويىنشا ناقتى رەسمي ستاتيستيكالىق مالىمەت مىناداي: WWW.QURBAN2020.KZ سايتىنا قۇربان شالۋعا تاپسىرىس بەرگەندەر سانى 906 ادام، ال قۇرباندىق ەتىن الۋعا ءوتىنىش بىلدىرگەندەر سانى 12 929 ادام.

قمدب بۇل جاعدايعا قاراماستان تاۋەكەلدى تۇردە شەشىپ قابىلداپ، ەڭ باستىسى اللا رازىلىعى ءۇشىن ەت الۋعا ءوتىنىش بىلدىرگەن ازاماتتاردىڭ ءوتىنىش حاتىن قابىلداۋ جۇمىسىن توقتاتقان جوق. WWW.QURBAN2020.KZ سايتى قايىرىمدىلىق جاساۋ باعىتىندا اشىلدى. سوندىقتان بۇل جوبانى جوعارى دەڭگەيدە جۇزەگە اسىرۋ – ۇلكەن ساۋاپتى ءىستىڭ ءبىرى.

بەسىنشى، قمدب قارجىعا ارالاسپايدى. مال باعاسى جەرگىلىكتى نارىق باعاسىمەن كورسەتىلدى. ەلىمىزدىڭ ءار ايماعىنداعى مالدىڭ باعاسى ءارتۇرلى. نۇر-سۇلتان، الماتى، شىمكەنت قالالارى مەن وبلىس ورتالىقتارىنداعى مال باعاسى ءارتۇرلى دەڭگەيدە. جاعدايعا بايلانىستى قولجەتىمدى باعامەن توقتىنى دا قۇرباندىققا شالۋعا بولادى.

تاپسىرىس بەرۋشىدەن تۇسكەن قاراجات مال يەسىنە، ياعني ساتۋشىعا تىكەلەي بەرىلەدى. ويتكەنى بۇل دەلدالدىق قىزمەت ەمەس. كورسەتىلگەن سوماعا قاساپشىنىڭ قىزمەتى عانا كىرەدى. ال قۇرباندىق ەتىن بولشەكتەپ، مۇقتاج جاندارعا تاراتۋ سىندى بارلىق ۇيىمداستىرۋ جۇمىستارى مەشىت جاماعاتى مەن ەرىكتىلەردىڭ كومەگى ارقىلى تەگىن جۇزەگە اسادى. بۇل قۇربان شالۋعا تاپسىرىس بەرۋشى ازاماتتار ءۇشىن ۇلكەن جەڭىلدىك.

التىنشى، سايت ارقىلى تاپسىرىس قابىلداپ، قۇرباندىق ەتىن كومەككە ءزارۋ جاندارعا تاراتۋ تاجىريبەسى تۇركيا، مالايزيا، يندونەزيا، بىرىككەن اراب امىرلىكتەرى سىندى بىرقاتار مۇسىلمان مەملەكەتتەرىندە بۇرىننان قالىپتاسقان جۇيە. بۇل جىل سايىنعى يگى داستۇرگە اينالعان. جوبانىڭ باستى ەرەكشەلىگى – قۇرباندىق ەتىن تۇگەلدەي مۇقتاج ازاماتتارعا تاراتۋ.

جەتىنشى، اتالعان جوبا سانيتارلىق تالاپتاردى ساقتاي وتىرىپ، حالىقتىڭ ءومىرى مەن دەنساۋلىعىن ساقتاۋدى كوزدەيدى. سونىمەن قاتار جوبا ماقساتى – كومەككە اسا ءزارۋ ازاماتتاردى قولداپ، ولارعا ۇلىق مەيرامدا قۋانىش سىيلاۋ، از دا بولسا قايعى-مۇڭىن سەيىلتۋ. قۇرباندىق شالۋدىڭ نەگىزگى ءمانى وسى.

Abai.kz