اقىن، م. ماقاتاەۆ اتىنداعى سىيلىقتىڭ يەگەرى، قر ەڭبەك سىڭىرگەن قايراتكەرى، قازاقستان ايتىس اقىندارى مەن جىرشى تەرمەشىلەردىڭ حالىقارالىق وداعىنىڭ توراعاسى ءجۇرسىن ەرمان بيلىك پارتياسى جاريالاعان پارتياىشىلىك ىرىكتەۋ – پرايمەريزگە قاتىساتىنىن مالىمدەدى.

ول «نۇر وتاننىڭ» پارتياىشىلىك ىرىكتەۋ دوداسىنا ارنالعان «سايلاۋالدى» ۇگىت-ناسيحات ءسوزىن جاريالاپ، وندا مەملەكەتتىك ءتىل مەن جەر ماسەلەسىن، كوپ بالالا وتباسىلار مەن الەۋمەتتىك از قامتىلعان وتباسىلاردىڭ ماسەلەلەرىن شەشۋگە نيەتتى ەكەنىن جەتكىزگەن.

ءجۇرسىن ەرمان الماتى قالاسىنىڭ مەدەۋ اۋدانىنىڭ اتىدان ءتۇسىپ جاتقان كورىنەدى. ءوز ۇنەۋىندە «قازاقستاننىڭ تيتۋلدى ۇلتىنىڭ مۇددەسىن قورعايمىن»، - دەپ سويلەپتى.

مەنىڭ ماقساتىم – قازاقستاننىڭ تيتۋلدى ۇلتىنىڭ مۇددەسىن قورعاۋ!

ءجۇرسىن ەرمان:

- ەلىمىزدەگى ەڭ ىرگەلى پارتيا – «نۇر وتان» بيىل ەل تاريحىندا تۇڭعىش رەت پارتياىشىلىك ىرىكتەۋ – پرايمەريز وتكىزىپ جاتىر.

ونىڭ ماقساتى – پارتياعا جاڭا ادامداردى تارتۋ. ەكىنشىدەن، قوعامعا جانى اشيتىن، پوزيتسياسى بەرىك، بەلسەندى ازاماتتاردى ىرىكتەۋ.

مەن دە وسى پرايمەريزگە قاتىسىپ جاتىرمىن. مەنىڭ پەشەنەمە – قازاقتىڭ ۇلتتىق ونەرى ايتىستى ءتىرىلتۋ، جانداندىرۋ، قالپىنا كەلتىرۋ جۇمىستارى بۇيىرعان ەكەن. سونى بۇرىن قاتاردا ءجۇرىپ، اق تەر، كوك تەر بوپ اتقارساق، ەندىگى جەردە بيىك مىنبەردى پايدالانىپ، قازاقتىڭ ۇلتتىق ونەرىن دامىتۋعا جاڭادان ۇلەس قوسسام، سوعان مۇمكىندىك جاساسام دەيمىن.

بۇل ۇلتتىڭ رۋحىن كوتەرەتىن، ەڭسەسىن بيىكتەتەتىن ونەر. قانىن قىزدىراتىن، باسىن ۇيىستىراتىن، بىرلىككە، تاتۋلىققا شاقىراتىن ونەر. مىنە، وسى سالادا كوپتەگەن پروبلەمالار بار. مەن جالعىز مەدەۋ اۋدانىنىڭ مۇددەسىن قورعايمىن دەپ ايتا المايمىن. قازاق ۇلتىنىڭ مۇددەسىن قازاقتىڭ جاناشىر ازاماتى رەتىندە كوتەرگىم كەلەدى. بىرنەشە باستى ماسەلەلەردى توقتالىپ ايتايىن:

بىرىنشىدەن، پارلامەنت دەگەنىمىز – ۇلى ۇلتتىق جينالىس. سول پارلامەنتىمىزدىڭ قازاق تىلىندە سويلەمەيتىنىن ايتىپ، بايبالام سالعالى نەشە جىل؟.. بىراق، جاعداي وزگەرگەن جوق. بۇل الەمدە ۇلگى مەملەكەت ءوزىنىڭ ۇلى جينالىسىن كورشى مەملەكەتتىڭ، باسقا ەلدىڭ تىلىندە وتكىزۋ دەگەن نە؟ وسىعان وراي، مىناۋ پرايمەريزدەگى ىرىكتەۋ كەزىندە قازاق تىلىندە، مەملەكەتتىك تىلدە سويلەي المايتىن ازاماتتار پارلامەنتكە قاراي وتپەۋى كەرەك. سوعان توسقاۋىل كەرەك دەپ ەسەپتەيمىن.

ەكىنشىدەن، ءتىل ماسەلەسى جىرلاي-جىرلاي جاۋىر بولدى. شەشىلمەي-اق قويدى. «ءتىلى جوعالعان ۇلتتىق ءوزى دە جوعالادى» دەگەن ءسوزدى بىلەسىزدەر. قازاق ءتىلىن مەملەكەتتىك تىلگە بارلىق دەڭگەيدە اينالدىرۋ ءۇشىن كۇرەس ءجۇرۋى كەرەك. مەملەكەت تاراپىنان، زاڭ شىعارۋشى ورگان تاراپىنان ناقتى شارالار قابىلدانۋى كەرەك. وسى ماسەلە شەشىمىن تاباتىن ۋاقىت بولدى دەپ ويلايمىن.

ءۇشىنشى، بارلىعىمىزدى تولعاندىراتىن جەر ماسەلەسى. قازاقتىڭ جەردەن باسقا بايلىعى قالعان جوق. ونىڭ استىنداعى، ۇستىندەگى بايلىقتارىنىڭ بارلىعى تالان-تاراجعا ءتۇسىپ كەتتى. ەندىگى جەردە جەر ماسەلەسى شەشىمىن تابۋى كەرەك. جاقىندا پرەزيدەنت قاسىم-جومارت توقاەۆ: «جەر ساتىلمايدى»، - دەپ مالىمدەدى. بىراق، بۇل زاڭدىق، كونستيتۋتسيالىق كۇشى جوق، پىكىر عانا! ناقتى زاڭ قابىلدانۋى كەرەك! قازاقتىڭ جەرى ەشكىمگە ساتىلماۋى دا، جالعا دا بەرىلمەۋى كەرەك!

كوپ جەرلەرىمىز لاتيفۋنديستەردىڭ قولىندا. مىڭداعان گەكتەر جەرلەردى الىپ العان. ول جەرلەردى نە وزدەرى يگەرمەيدى، نە شارۋا باستايمىن دەگەن كاسىپكەرلەرگە مۇرشا بەرمەيدى. سوندىقتان جەردى مەملەكەت يەلىگىنە قايتارۋ كەرەك. جاقىندا عانا سولتۇستىك قازاقستاندا 900 مىڭ گەكتار جەر مەملەكەت يەلىگىنە قايتارىلدى. بىراق، بىزدە ءالى بوس جاتقان جەرلەر كوپ. سونىڭ بارلىعىن مەملەكەتكە قايتارىپ، كاسىپكەرلەردىڭ ءىس باستاۋىنا مۇمكىندىك بەرۋ كەرەك. جەر ءبىزدىڭ ۇلتتىق بايلىعىمىز، قۇندىلىعىمىز!

پرايمەريزگە قاتىسۋداعى مەنىڭ ماقساتىم – قازاقستاننىڭ تيتۋلدى ۇلتىنىڭ مۇددەسىن قورعاۋ! ءوزىم ءتۇسىپ جاتقان مەدەۋ اۋدانى الماتىداعى ەڭ شۇرايلى، الەۋەتتى اۋدان عوي. وسى حالىقتىڭ ءال-اۋقاتىن جاقسارتۋ. ەلدىڭ ەكونوميكاسىن كوتەرۋگە باعىتتالعان شۇعىل شەشىمدەرگە قول قويۋ.

قازىر ەلدە كوپ بالالى انالاردىڭ پروبلەماسى، جەتىم-جەسىر، جوق-جىتىكتىڭ پروبلەماسى العا شىعىپ تۇر. سونى شەشۋ ءۇشىن ناقتى قادامدار جاسالۋى كەرەك. سوزدەن ىسكە كوشەتىن ۋاقىت كەلدى. وسى ماسەلەلەردى شەشۋگە قولىمنان كەلگەنشە ۇلەس قوسسام دەيمىن.

Abai.kz