جاپونيادا ءوتىپ جاتقان XXXII جازعى وليمپيادا ويىندارىنىڭ اياقتالۋىنا دا ساناۋلى كۇندەر قالدى. قازاقستاندىق سپورتشىلار بۇل وليمپيادا ويىندارىنا سپورتتىڭ 27 تۇرىنەن 96 جولداما العان بولاتىن.

33 سپورت تۇرىنەن 339 مەدال جيىنتىعى ساراپقا سالىنىپ جاتقان بۇل دودادا قازاقستان 7 قولا مەدال الىپ، جالپى ەسەپتە 76 ورىندا تۇر. ال، وزىمىزبەن كورشىلەس وزبەكستان 32 ورىنعا شىقسا، قىرعىزستان 67 ورىندا تۇر.

قازاقستاندىق سپورتشىلار وليمپيادا ويىندارىنا قر ۇلتتىق وليمپيادالىق كوميتەتى ارقىلى بارادى. 1990 جىلى قۇرىلعان كوميتەتتىڭ 2015 جىلدان بەرگى توراعاسى ميللياردەر كاسىپكەر - تيمۋر قۇلىباەۆ ەكەن.

ال، ۆيتسە-پرزەدينتتەرى تىزىمىندە: قر پرەمەر-ءمينيسترى – اسقار مامين, «قازاقستان حالىق بانكى» اق باسقارما ءتورايىمى - ءۇمىت شاياحمەتوۆا, ميلليونەر – قايرات بورانباەۆ, قر ورتالىق سايلاۋ كوميسسياسىنىڭ توراعاسى - بەرىك يماشەۆ, ەكس-مينيستر، استانانىڭ بۇرىنعى اكىمى - ادىلبەك جاقسىبەكوۆ سىندى شەنەۋنىكتەر بار.

تولىق قۇرام مىنانداي:

قر ۇوك پرەزيدەنتى - تيمۋر اسقارۇلى قۇلىباەۆ;

جالپى سۇراقتار بويىنشا ۆيتسە-پرەزيدەنت - ابۋلگازين دانيار رۋستەمۇلى;

پاراليمپيادالىق سپورت تۇرلەرى بويىنشا ۆيتسە – پرەزيدەنت - قايرات سوۆەتايۇلى بورانباەۆ;

جازعى سپورت تۇرلەرى بويىنشا ۆيتسە-پرەزيدەنت - ادىلبەك رىسكەلدىۇلى جاقسىبەكوۆ;

قىسقى سپورت تۇرلەرى بويىنشا ۆيتسە-پرەزيدەنت  - اسقار ۇزاقپايۇلى مامين;

حالىقارالىق ىنتىماقتاستىق ماسەلەلەرى بويىنشا ۆيتسە-پرەزيدەنت - كريۋكوۆ اندرەي الەكساندروۆيچ;

قازاقستان گيمناستيكا فەدەراتسياسىنىڭ پرەزيدەنتى - ءۇمىت بولاتحانقىزى شاياحمەتوۆا;

اتقارۋشى كوميتەت مۇشەسى - سەرىك ساپيەۆ;

قر ۆولەيبول فەدەراتسياسىنىڭ پرەزيدەنتى - نۇرتاي ابىقاەۆ;

بەسسايىس فەدەراتسياسىنىڭ پرەزيدەنتى - بەرىك ءماجىتۇلى يماشەۆ;

تەننيس فەدەراتسياسىنىڭ پرەزيدەنتى - بولات جاميتۇلى وتەمۇراتوۆ;

اۋىر اتلەتيكا فەدەراتسياسىنىڭ پرەزيدەنتى - تۇسىپبەكوۆ جانات راشيدۇلى;

جەڭىل اتلەتيكا فەدەراتسياسىنىڭ پرەزيدەنتى - دانيال كەنجەتايۇلى احمەتوۆ;

شاڭعى سپورتى تۇرلەرى قاۋىمداستىعىنىڭ پرەزيدەنتى - دياس تولەۋتايۇلى سۇلەيمەنوۆ.

سونىمەن قاتار، سپورتشىلاردىڭ وليمپياداعا بارۋىنا مەملەكەت تاراپىنان بولىنەتىن بارلىق قاراجات وسى كوميتەتكە كەلىپ تۇسەدى. ال، وسى جىلدىڭ مامىر ايىندا مادەنيەت جانە سپورت ۆيتسە-ءمينيسترى ەرلان قوجاعاپانوۆ توكيودا وتەتىن وليمپيادا ويىندارى ءۇشىن ۇلتتىق وليمپيادا كوميتەتىنە 15 ملرد تەڭگەگە جۋىق قاراجات بولىنەتىنىن ايتقان بولاتىن.

«ءبىز بۇل باعىتتا ۇلتتىق وليمپيادا كوميتەتىمەن بىرلەسىپ جۇمىس جاساپ جاتقانىمىزدى بىلەسىزدەر. قۇرىلعان ۇلتتىق كوماندالاردىڭ بارلىعى وسىندا شوعىرلانعان. 2017 جىلعى زاڭ بويىنشا بارلىق قاراجات ۇلتتىق وليمپيادا كوميتەتى ارقىلى وتەدى. بىزدە وليمپيادالىق ەمەس سپورت تۇرلەرى عانا قالدى. توكيوداعى وليمپيادا ويىندارىنا ءبىز مينيسترلىك ارقىلى ۇلتتىق وليمپيادا كوميتەتىنە شامامەن 15 ميلليارد تەڭگە جىبەردىك»، - دەگەن ەدى قوجاعاپانوۆ وكق بريفينگىندە.

ايتا كەتەيىك، «kp.ru» سايتى: «قازاقستان پوستكەڭەستىك ەلدەر ىشىندە سپورتشىلارعا تولەنەتىن سىياقى مولشەرى بويىنشا كوشباسشى»، - دەپ جازعان.

«بۇرىنعى كسرو  ەلدەرى ىشىندە مەدال ءۇشىن كوپ اقشا تولەيتىن ەل -  قازاقستان. ولار الەمدەگى ەڭ كوپ سىياقى مولشەرىن تاعايىنداعان - 250 000 دوللار. ال مۇنداي سىياقى تاعايىنداۋ ارقىلى قازاقتار تاۋەكەل ەتپەيدى دەپ ويلاماۋ كەرەك. مىسالى، ريو -2016 -دا قازاقستان ءۇش التىن عانا الدى»، - دەيدى ماقالادا.

ماسەلەن، بيىل قازاقستاندا: التىن مەدال العان سپورتشىعا - 250 مىڭ دوللار، ال كۇمىسكە - 150 مىڭ دوللار، قولاعا  - 75 مىڭ دوللار بەرىلمەك. رەسەيدە بۇل كورسەتكىش ەداۋىر از. التىنعا - 4 ميلليون رۋبل (54 مىڭ دوللار), كۇمىسكە - 2,5 ميلليون رۋبل (34 مىڭ دوللار), قولاعا - 1,7 ميلليون رۋبل (23 مىڭ دوللار) بولىنگەن.

وسى ارقىلى قازاقستان وليمپيادا مەدالى ءۇشىن ەڭ كوپ اقشالاي سىيلىق بەرەتىن 10 ەلدىڭ قاتارىنا كىرگەن.

بيىلعى وليمپياداداعى ساتسىزدىكتەر ءۇشىن سپورتشىلار مەن باپكەرلەر شتابى عانا ەمەس، ۇلتتىق وليمپيادا كوميتەتى دە جاۋاپتى ەكەنىن ەسكەرسەك، جوعارىدا اتتارى اتالعان ازاماتتار دا ء(ار ءتۇرلى لاۋازىمداعى شەنەۋنىكتەر) ۇوك باسشىلىعىنداعى ورىندارىن بوساتۋلارى كەرەك-اق!

تاقىرىپقا تۇزدىق رەتىندە ايتا كەتەيىك، ءبىز وسىعان دەيىن قازاق سپورتىنىڭ قوجاسى - مينيسترلەر مەن ميلليونەرلەر ەكەنىن بىرنەشە مارتە جازدىق.  سونىمەن، قازاق سپورتىنا باسشىلىق ەتەتىن مينيسترلەر مەن ميلليونەرلەر كىمدەر؟ قاراڭىز:

قر شايبالى حوككەي فەدەراتسياسىنىڭ پرەزيدەنتى – اسقار مامين (قر پرەمەر-ءمينيسترى);

قر جەڭىل اتلەتيكا فەدەراتسياسىنىڭ پرەزيدەنتى – دانيال احمەتوۆ (شقو اكىمى);

قر ترياتلون فەدەراتسياسىنىڭ قۇرمەتتى پرەزيدەنتى – كارىم ءماسىموۆ (قر ۇقك توراعاسى);

قر ات سپورتى فەدەراتسياسىنىڭ پرەزيدەنتى – بەرىك يماشەۆ (قر ورتالىق سايلاۋ كوميسسياسىنىڭ توراعاسى). بەرىك ءماجيتۇلى جالعىز ات سپورتى تۇرلەرىنە باسشىلىق ەتپەيدى ەكەن. ول سونداي-اق، قر قازىرگى بەسسايىس فەدەراتسياسىنىڭ پرەزيدەنتى. ال بەرىك يماشەۆتىڭ ۇلى ءالجان بەرىكۇلى يماشەۆ – قر الپينيزم جانە قۇزعا شىعۋ فەدەراتسياسىنىڭ پرەزيدەنتى ەكەن;

قر سپورتتىق اتۋ فەدەراتسياسىنىڭ پرەزيدەنتى – ارىستانبەك مۇحامەديۇلى (قر ۇلتتىق مۋزەي ديرەكتورى);

قر دزيۋدو فەدەراتسياسىنىڭ پرەزيدەنتى – قايرات قوجامجاروۆ (سەنات دەپۋتاتى);

قر ۇلتتىق كونكيشىلەر فەدەراتسياسىنىڭ پرەزيدەنتى – بولات جامىشەۆ (ماسق ديرەكتورلار كەڭەسىنىڭ توراعاسى);

قر گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى – ساۋات مىڭباەۆ (بيىل تامىزعا دەيىن «قازاقستان تەمىر جولى» اق توراعاسى بولدى);

قر ۆولەيبول فەدەراتسياسىنىڭ پرەزيدەنتى – نۇرتاي ابىقاەۆ (ۇقك ەكس-توراعاسى). ابىقاەۆ تا ەكى بىردەي فەدەراتسياعا قوجالىق ەتىپ وتىرعان ادام ەكەن. ول سونداي-اق، قر گولف فەدەراتسياسىنىڭ دا پرەزيدەنتى;

قر كوگالداعى حوككەي فەدەراتسياسىنىڭ پرەزيدەنتى – سەرىك ۇمبەتوۆ (ەكس-اكىم، ەكس-دەپۋتات);

قر فۋتبول فەدەراتسياسىنىڭ پرەزيدەنتى – ادىلبەك جاقسىبەكوۆ (بۇرىنعى ءپا جەتەكشىسى);

قر تەننيس فەدەراتسياسىنىڭ پرەزيدەنتى – بولات وتەمۇراتوۆ (ميللياردەر);

قر تاەكۆاندا فەدەراتسياسىنىڭ پرەزيدەنتى – ۆياچەسلاۆ كيم (ميللياردەر);

قر ۆەلوسپورت فەدەراتسياسىنىڭ پرەزيدەنتى – نۇرلان سماعۇلوۆ (ميلليونەر);

قر بوكس فەدەراتسياسىنىڭ پرەزيدەنتى – كەڭەس راقىشەۆ (ميلليونەر).

سپورتقا ءۇش قايناسا سورپاسى قوسىلمايتىن وسى ازاماتتار (شەندىلەر) وزدەرى باسقارىپ وتىرعان فەدەراتسيانىڭ دامۋى ءۇشىن قانشالىقتى ۇلەس قوستى؟ ۇزاق جىلداردەن بەرى ءتۇرلى مەملەكەتتىك لاۋازىمدى قىزمەتتەردى اتقارعان، اتقارىپ كەلە جاتقان دانيال احمەتوۆ، اسقار مامين، ادىلبەك جاقسىبەكوۆ، بەرىك يماشەۆ، قايرات قوجامجاروۆ ت.ب. ازاماتتار وزدەرى باسشىلىق ەتىپ وتىرعان سپورت سالاسىنىڭ ناعىز ماماندارى دەۋ قيىن. ءدال وسى جايت قازاق سپورتىنىڭ دامۋىنا تۇساۋ بولىپ كەلەدى. بۇعان قوسا، سپورت سالاسىنداعى جەڭ ۇشىنان جالعاسقان جەمقورلىققا دا وسى مينيستر-ميلليونەرلەردىڭ جاۋاپكەرشىلىگى بار...

نۇربيكە بەكسۇلتانقىزى

Abai.kz