جالپى، انا ءتىلىمىزدىڭ ەلىمىزدىڭ تەرىستىگىندەگى مۇشكىل ءحالى بۇگىندەرى ەشكىمگە دە تاڭسىق ەمەس. بۇل جەردە وزگە ءتىلدىڭ باسىمدىلىعى قايدا بارسىڭ دا «مەن مۇندالاپ» قارسى الدىڭان شىعا كەلەدى. وسى وڭىرگە اكىم بولىپ كەلگەندەردىڭ بارلىعى دەرلىك الدىمەن قازاققا، ونىڭ تىلىنە ەمەس، ورىنتاعىنا جايعاسقان بويدا وزگە ۇلت وكىلدەرىنە، ونىڭ تىلىنە باسىمدىق بەرۋگۋە تىرىسادى.

ماسەلەن، مەن ءبىزدىڭ قوستاناي وبلىسىندا وتكەن القالى جيىنداردىڭ ءبىرىنىڭ دە انا تىلىمىزدە وتكەندىگىن ەستىگەن دە، كورگەن دە ەمەسپىن. ول تۇگىلى قازاقشا جازىلعان ارىز-شاعىمدارعا دا «ءجۇردىم-باردىم» قارايدى. انا تىلىمىزدەن شىعاتىن ازعانتاي عانا باسىلىمدارعا دا كوزقاراس وسىنداي.

مۇنى از دەسەڭىز، كورشى رەسەي ەلىنىڭ ءانشى، ارتىسسىماقتارىن تورىمىزگە شىعارىپ، تالتاڭداتىپ قوياتىن ءوز قانداستارىمىزدىڭ وسىنداي سوراقى قىلىعى دا انا تىلىمىزبەن قاتار، مادەنيەتىمىزدى دە تۇقىرتا تۇسەتىن سىڭايلى.

ماسەلەن، جاقىندا عانا وسىنداعى «گلوريا» دەپ اتالاتىن مەيرامحانالىق-قوناق ۇيلىك كەشەننىڭ ديرەكتورى گۇلۆيرا قۇدايقۇلوۆا ءبارىمىزدى دە جەرگە قاراتىپ كەتتى. بۇل حانىم رەسەيدىڭ بەلگىلى ارتىستەرى مەن انشىلەرىنىڭ فانەرلىك مانەكەندەرىن ءوز مەيمانحانسىنا ءىلىپ قويىپ، جەردەن جەتى قويان تاپقانداي ەلدەن ەرەكشە قۋانىپ وتىر. گۇلۆيرا جازيتقىزىنىڭ ايتۋىنا قاراعاندا، بۇل جەرگە رەسەي انشىلەرى سوناۋ الدىڭعى جىل-اق، قونىس تەپكەن ەكەن. ال بىلتىرعى جىلى ولارعا ۆالەري مەلادزە مەن ديما بيلان قوسىلىپ، قاراسى كۇرت كوبەيىپتى. ەندى بۇل ىسكەر ايەلدىڭ ويىنشا مەيرامحانالارعا ادام لىق تولاتىن كورىنەدى.

مۇمكىن، سولاي دا شىعار، كىم ءبىلىپتى؟.. پايدا تابۋدىڭ كوزىن بىلەتىن جاندارعا قارسى ايتار داۋىمىز جوق. الايدا وسىناۋ كورشى ەلدىڭ انشىلەرىنىڭ قاتارىنان ءوز تالانتارىمىزعا ورىن تيۋمەۋىن نەمەن تۇسىندىرەمىز؟ مەلادزە مەن بيلانعا تەڭ كەلەتىن ءانشى بىزدە مۇلدەم جوق بولعانى ما؟ وزگەسىن بىلاي قويعاندا، اتاعى كۇللى الەمگە جايىلعان ديماشتىڭ ءوزى نەگە تۇرادى؟ مۇمكىن، اڭگىمە ول جەرگە قويۋعا لايىقتى انشىلەرىمىزدىڭ تابىلماۋىندا ەمەس شىعار؟ بالكىم، مۇنىڭ استارىندا ءوزىمىزدىڭ ءتول ونەرىمىزگە مۇرىن شۇيىرە قاراۋ، ولاردى ورىستاردىڭ قاسىندا ەكىنشى سورتتى ساناۋ سەكىلدى كورشىمىزدەن جۇققان اۋرۋ ما ەكەن؟ ايتپاقشى، رەسەيدىڭ انشىلەرىنىڭ بارلىعى دەرلىك ءپۋتيننىڭ ۋكرايناعا جاساعان اگرەسسياسىن اشىق قولداعاندارى بارىمىزگە بەلگىلى. ەندەشە، وسىنداي انشىلەردى بىزگە اكەلىپ ناسيحاتتاۋ ارقىلى ءبىز ولارمەن تىلەكتەس ەكەندىگىمىزدى ءبىلدىرىپ وتىرمىز با؟

جالپى، ويلانباي ىستەگەن ىستەن ءتۇبى وپىق جەيتىنىمىزدى ۇمىتپاعان ءجون شىعار.

جايبەرگەن بولاتوۆ

Abai.kz