ەلىمىزدە، ءار پرەزيدەنت سايلانعان سوڭ، حالىق الدىندا انت بەرەدى. سول سەكىلدى، پرەمەر-مينيستر مەن مينيسترلەر دە تاعايىندالعاننان كەيىن، انت بەرەدى.

مەنىڭ ايتايىن دەگەنىم، نەگە وبلىس اكىمدەرى تاعايىندالعاندا، انت بەرمەيدى. ولار، تۇتاس ايماقتارعا باسشىلىق ەتپەي مە؟! جانە ءبىزدىڭ ەلىمىزدىڭ وبلىستارى كىشىگىرىم مەملەكەتتەردىڭ اۋماعىنان ۇلكەن بولماسا، كەم تۇسپەيدى. ءتىپتى، ايتارى جوق، ۇلكەن دە. سوندىقتان، ولاردىڭ دا ءوز وبلىس تۇرعىندارىنىڭ الدىندا، مەملەكەتتىك تىلدە  انت بەرگەنى دۇرىس-اق. بۇل، سول اۋماقتىڭ ەل-جۇرتىنىڭ وعان دەگەن سەنىمىنىڭ  ورنىعۋىنا ۇلكەن سەبەپ بولار ەدى. سونداي-اق، جەمقورلىققا وڭايلىقپەن جولاماس تا ەدى. تاعى ءبىر قوسارىم، سول اۋماقتىڭ ەكونوميكاسىن جاقسارتىپ، تۇرعىنداردىڭ  الەۋمەتتىك جاعدايىن كوتەرۋمەن قاتار، ولارعا مىنانى دا جۇكتەۋ كەرەك سىياقتى.

ءبىرىنشى: ءوزى اكىم بولىپ قىزمەت اتقاراتىن وبلىستا مەملەكەتتىك ءتىلدىڭ تۇبەگەيلى  ورنىعۋىنا جاعداي جاساۋ، مۇمكىندىگىنشە كومەكتەسۋ. 

ەكىنشى: سول ولكەنىڭ ەلدىمەكەندەرى مەن اۋدان، قالا اتاۋلارىنىڭ مەملەكەتتىك  تىلدە اتالۋىنا قولقابىسىن تيگىزۋ جانە كوشەلەر مەن داڭعىلداردىڭ   قازاقشالاۋىنا كوڭىل اۋدارۋ.   

ءۇشىنشى: سول وڭىردەگى ورىس ءتىلدى مەكەمەلەر مەن باسقارمالاردا، جاۋاپكەرشىلىگى  شەكتەۋلى كاسىپ ورىنداردا مەملەكەتتىك ءتىلدىڭ - ءىس تىلىنە اينالۋىنا سەپتىگىن تيگىزۋ، قازاق ءتىلىن وقىتاتىن كۋرستار ۇيىمداستىرۋ جانە وسى جاققا تولىپ كەتكەن (سولتۇستىك، شىعىس وبلىستاردا) ماركەت، بازار، امبەباب دۇكەندەردىڭ جانە وزگە دە كەڭسە، عيمارات اتاۋلارىن قازاقشا اتالۋىنا جول اشۋ، ورنىقتىرۋ.

مىنە، وسىلاردى ءاربىر وبلىس اكىمدەرىن تاعايىنداعاندا، ولارعا مىندەتتەۋ، سونىمەن قاتار، بۇلاردىڭ اتقارعان جۇمىسىنان ءار توقسان جانە جىل سايىن ەسەپ  العاندا، وسىلاردى دا قاتاڭ قاداعالاپ وتىرۋ.

بۇل ارينە، قوستاناي، سولتۇستىك قازاقستان، اقمولا، پاۆلودار، قاراعاندى، سول  سەكىلدى، ورىس تىلدىلەرى باسىم وزگە دە وبلىستاردان تالاپ ەتۋ. مەنىڭ پىكىرىمشە، سوندا عانا مەملەكەتتىك ءتىل مارتەبەسىن العان قازاق ءتىلىنىڭ اۋقىمى كەڭەيىپ،  قاناتىن كەڭگە جايارى انىق. ايتپەسە، قوستاناي وبلىسىنىڭ بۇرىنعى اكىمى ارحيمەد مۇحامبەتوۆ ءوزى اكىم بولىپ تۇرعاندا، وسى باعىتتا ەشقانداي جۇمىس اتقارعان جوق. اشەيىن ءجۇردى دە كەتتى. ءتىپتى، تورعاي جاقتى دا ايتارلىقتاي دامىتپادى. ونداي اكىمدەردىڭ كەرەگى قانشا؟! قازىرگى، قۇمار اقساقالوۆتا سولتۇستىك قازاقستان وبلىسىندا جۇرگەندە،  ءبىزدىڭ  قاسيەتتى ءتىلىمىزدى  دامىتۋعا ەشقانداي كوڭىل بولمەدى، ءتىپتى وسى باعىتتا شىبىق باسىن سىندىرمادى دەۋگە بولادى. اقمولا مەن پاۆلودار وبلىسى دا سولاردىڭ قاتارىندا. ەگەر ءبىز، ەندى كەشىگەتىن بولساق، وسى وڭىرلەردى قازاق ەلىنەن الشاقتاتىپ الامىز. ارتى قيىن بولادى. مىنە، وسى جاعدايلارعا بيلىكتەگىلەر، اسىرەسە، اتقارۋشى ۇكىمەت (پراۆيتەلستۆو) اسا تياناقتى قاراپ، نازاردا ۇستاپ وتىرۋى كەرەك -اق سەكىلدى.

بەيسەنعازى ۇلىقبەك،

قازاقستان جۋرناليستەر وداعىنىڭ مۇشەسى

Abai.kz