كەشەلى بەرى جاڭاوزەندىكتەردى، دۇرىسى، قانداستاردى قارالاعان جازبالار جاڭبىردان كەيىنگى ساڭىراۋقۇلاقتاي قاپتادى. تانىمال بلوگەرلەردىڭ ءماتىنى وزگەرگەنمەن، ءمانى وزگەرمەگەن ويسىماقتارى وقىعان جۇرتتىڭ نارازىلىعىن تۋعىزدى.

بىردەي ويلايتىن ولاردىڭ ايتۋىنشا، استاناعا تۇراقتى جۇمىس تالاپ ەتىپ بارعان بەلسەندىلەردىڭ كوبى وزبەكستان مەن تۇركمەنستاننان كەلگەن قانداستار ەكەن.

بلوگەرلەردىڭ كەيبىرى جۇمىسسىزداردى: «ەسىكتەن كىرىپ، ءتور سۇراپ وتىر»، - دەپ ايىپتايدى. نە ەسىڭىزگە ءتۇستى؟

ءيا، 2011 جىلى دا ءدال وسى ءسوز جەلدەي ەسكەن. وعان دەيىن دە، ودان كەيىن دە باس كوتەرگەن حالىقتىڭ اراسىنان قانداستاردى قولىنا شىراق الىپ ىزدەيتىن. بۇل نە، ەل اراسىنا ىرىتكى سالۋ ما؟ حالىقتى جىك-جىككە ءبولىپ، ءبىر-بىرىمەن تالاستىرىپ قويعاندا كىم نە ۇتادى؟ قانداستاردىڭ شابىنا شوق تاستايتىن شاتپاقتاردىڭ ارتىندا تۇرعان قاي شالدۋار؟ وزگەگە كۇيە جاعۋ ءۇشىن، قولىڭ كۇيەلى بولۋى كەرەك، مۇنى باستاعان قاي ارامپيعىل؟

«قازمۇنايگاز» ۇلتتىق كومپانياسى: «بەرالى كومپانياسىنىڭ بۇرىنعى قىزمەتكەرلەرىنىڭ باستى تالابى – «وزەنمۇنايگاز» اق شتاتىنا جۇمىسقا ورنالاسۋ. باستاماشىل توپقا بۇل شارتتىڭ مۇمكىن ەمەس ەكەنى ايتىلدى. ۇيىمعا جۇمىسقا 9 مىڭ ادام تۇرعانى اتاپ ءوتىلدى.

كەلىسسوز جۇرگىزۋشىلەردىڭ بۇل تالابى قالا تۇرعىندارىنىڭ مۇددەلەرى مەن قۇقىقتارىنا قايشى كەلەدى»، – دەگەن حابارلاما تاراتتى.

ال بەلسەندىلەر بۇل ءسوزدى جوققا شىعارىپ، «قازمۇنايگازدى» وتىرىك اقپارات تاراتىپ وتىر دەيدى. سوندا قانداستاردى قارالاۋ قاشانعا دەيىن جالعاسا بەرمەك؟

Abai.kz