نازارباەۆ شەگەندەپ كەتكەن شەكارادان كۇدەباەۆتىڭ قاشىپ كەتكەنى ەستەرىڭىزدە بولار؟ الماتى وبلىسى پوليتسيا دەپارتامەنتىنىڭ بۇرىنعى باستىعى اقىرى ستامبۋلدا ۇستالىپتى. قازىر ۋاقىتشا ۇستاۋ يزولياتورىندا قاماۋدا وتىر.  ونىڭ قالاي قاشقانى، نەگە باس بوستاندىعىن تۇركيادان ىزدەگەنى كوپ ساراپشىنىڭ كۇلكىسىن كەلتىردى. ويتكەنى تۇركيامەن ارادا ەكستراديتسيا بويىنشا كەلىسىم بار ەكەنىن قاشاعان گەنەرال جاقسى بىلەتىن ەدى.

قازاقستاننىڭ جاڭارىپ كەتكەنى راس بولسا، كۇدەباەۆ ەندى بوستاندىقتان كەمى 8 جىل كۇدەرىن ءۇزۋى كەرەك. مۇنىڭ الدىندا سۇيىتىلعان مۇناي گازىن ساتىپ الۋ كەزىندە 14,5 ملرد تەڭگەنى قىلمىستىق جولمەن زاڭداستىرعانى ءۇشىن ايىپتالعان قايرات بورانباەۆ تا 8 جىلعا سوتتالعان. ال «قايرات بورانباەۆقا «ورتالىق ستاديون» ماڭىنان جەر الىپ بەرۋ ءۇشىن زاڭ تالاپتارىن بۇزعان» دەگەن سىبىس تاراعان تاعى ءبىر قاشاعان باۋىرجان بايبەك قاشان تۇتقىنعا تۇسەدى؟

كەي ساراپشىلار 2023 جىلدىڭ اياعىنا دەيىن جاقىندا عانا گەرمانيادان توبە كورسەتكەن باۋىرجان بايبەكتىڭ ۇستىنەن قىلمىستىق ءىس قوزعالادى دەيدى.  وعان الماتى قالاسىنىڭ جەرلەرىن وليگارحتارعا ۇلەستىرگەن دەگەن ايىپ تاعىلادى دەپ بولجايدى. دەرەككوزدەرگە سەنسەك، ماحيناتسيالار سانى بويىنشا بايبەك حراپۋنوۆتان كەيىن ەكىنشى ورىندا تۇر ەكەن. ءتورت جىل تۇكىرىگى جەرگە تۇسپەي الماتى قالاسىنىڭ اكىمى بولعان بايبەك مىرزا وسى ارالىقتا بىلىققا باتقان كورىنەدى.

ەكس-اكىمنىڭ «داۋىرلەگەن» كەزەڭى دەمالىس ايماقتارى مەن زاڭمەن قورعالاتىن جەرلەردى مەملەكەت مەنشىگىنەن شىعارىپ، وليگارحتارعا بەرۋمەن ەرەكشەلەندى. سونىڭ ناتيجەسىندە «ەسەنتاي»، «كوكتوبە» سىندى سانى كوپ ەليتالىق تۇرعىن ءۇي كەشەنى پايدا بولدى. مەدەۋ، بوستاندىق، ناۋرىزباي اۋداندارىنىڭ قۇرىلىس جوسپارلارى قايتا-قايتا تۇزەتىلدى. بۇدان باسقا، مەدەۋ جانە بوستاندىق اۋداندارىندا 116 گەكتاردان استام تابيعي زونالار مەن دەمالىس ورىندارى كوتتەدجدەر مەن كوپپاتەرلى ۇيلەر سالۋ ءۇشىن اقشالارى بار اق جاعالىلارعا ساتىلىپ كەتتى.

تۋعان ءھام تويعان جەرىنەن شىعانداپ كەتكەن بايبەكتىڭ جارلىعىمەن ءال-فارابي اتىنداعى قازۇۋ-دىڭ جەرلەرى «وميرەكس» پەن «اتلاس دەۆەلوپمەنت» فيرمالارىنىڭ دارگەيىنە وتكەن. ەڭ قىزىعى (تاڭعالاتىن جايت ەمەس), ەكى فيرمانىڭ دا نەگىزىن – قالاعان شەكارا شەگەندەگىش كىسىنىڭ ەركە قىزى دينارا قۇلىباەۆا.

ەكس-اكىم قازىر سولتۇستىك كيپردە دەگەن اقپارات بار. ال ونى جاڭا قازاقستان ەكستراديتسيالاي الا ما؟

اسىلان قۋانىشۇلى

Abai.kz