جاقىندا عانا ەلىمىزگە كەڭىنەن تانىمال ءبىر پورتالدان توبە شاشىمدى تىك تۇرعىزىپ، قۇيقامدى شىمىرلاتقان ءبىر ماقالا وقىدىم. بىرىككەن ۇلتتار ۇيىمىنىڭ كەلتىرگەن مالىمەتىنە قاراعاندا، جىل سايىن تاۋەلسىز قازاقستاندا 400 ايەل ءوزىنىڭ كۇيەۋىنىڭ قولىنان قازا تاباتىن كورىنەدى.

ەستىپ تۇرسىزدار ما، كۇيەۋىنىڭ قولىنان. وزگەلەردەن ەمەس. بۇل نە سۇمدىق سوندا؟ ەگەر «ءاي دەيتىن اكە، قوي دەيتىن قوجا» بولماسا، جاماعات بۇعان سەلقوستىق تانىتىپ وتىرا بەرسە، مۇنىڭ اياعى نەگە اكەلىپ سوعادى؟ «قاتىنىنا ەرەكشە باتىر» ەركەكتەرىمىز ءوز جۇبايلارىن ءبىرجولاتا قىرىپ تاستاعان سوڭ كىمگە ۇيلەنەدى؟ جالپى، ادام ولتىرگەنى ءۇشىن سوتتالىپ كەلگەن قانىشەر ەركەككە كىم بارادى؟ ۇيىندە كۇندە تاياق جەسە دە، بارار جەر، باسار تاۋى جوق بولعان سوڭ ءۇن-ءتۇنسىز كونىپ وتىرعاندارى قانشاما؟ ونىڭ سىرتىندا ەركەكتىڭ وزبىرلىعىنا شىداماي، اجىراسىپ كەتكەن اپا-قارىنداستىرىمىزدى كىم ساناپتى؟ ولاردىڭ وبال-ساۋاپتارى كىمنىڭ موينىندا؟ مۇمكىن، ءوز ۇلتىن مەنسىنبەي، جات جۇرتتىق جىگىتتىڭ ەتەگىنەن ۇستاپ، شەتەل اسىپ بارا جاتقان ارۋلارىمىز دا وسىنداي قاتىگەزدىكتەن سەسكەنەتىن شىعار؟ ولاي ەمەس دەپ كىم ايتا الادى؟

مەنىڭشە، مۇنىڭ ءبارى ءبىزدىڭ قازاقي قوعامدا ايەل ادامدى ەكىنشى سورتتىلاردىڭ قاتارىنا جاتقىزۋدان. كەلىن تۇسىرسە، «بالام ۇيلەندى» دەگەننەن گورى «ەندى كەلىن جۇمساپ، راقاتتاناتىن بولدىم» دەپ قۋانادى. ۇيگە بىرەۋدىڭ الديلەپ وسىرگەن قىزى ەمەس، سۋ تەگىن جۇمىس كۇشى كەلدى. وزىنىكى ەمەس، بوتەن بىرەۋدىكى، ايايتىن نەسى بار. وسىنى كورىپ تۇرعان ەركە شولجاڭ بالاسى دا ايانىپ قالسىن با؟! ونىڭ اياعى مىنە، جىل سايىن قىرشىن كەتىپ جاتقان 400 ايەل. بۇعان كىم توقتاۋ سالادى؟ ادۋىن ەنە مە، ەركە باي ما بولماسا سامارقاۋ پوليتسيا مەن مۇنداي ۇساق-تۇيەككە ۋاقىتى جوق سۋديالار ما؟

اڭگىمەگە تۇزدىق ءۇشىن. كۇنى كەشە عانا الماتى شاھارىندا «بالامدى كورسەتپەدىڭ» دەپ كۇيەۋى ايەلىن پىشاقتاپ ولتىرگەن جانە ونىسىن مويىندامايدى. اشۋ ۇستىندە بولاتىن ۇساق-تۇيەك كيكىلجىڭ دەپ ەسەپتەيدى. بۇل ءتىپتى كوڭىل بولۋگە تۇرمايتىن دۇنيە سياقتى...

ايتپاقشى، بىلتىر ءدال وسى قالادا بەلگىلى زاڭگەر ايەلىن 28 جەردەن پىشاقتاپ ولتىرگەن، جاۋىزعا نەبارى 1,5 جىل عانا جازا بەرىپتى. بۇل دا اشۋ ۇستىندە ءوزىن-ءوزى ۇستاي الماي قالىپتى. قازاقتىڭ قايسار ۇلدارىندا ونداي-ونداي بولىپ تۇرادى عوي. قانعا سىڭگەن ەركەكتىك ەركەلىك-داعى.

ال ءبىز قازاقتى قايتسەك كوبەيتەمىز دەپ شىرىلداپ ءجۇرمىز. قايتا قايتسەك قۇرىپ كەتپەيمىز دەپ دابىل كوتەرۋىمىز كەرەك شىعار. سىزدەر قالاي ويلايسىزدار؟

جايبەرگەن بولاتوۆ

Abai.kz