تمد بويىنشا ىستەردىڭ رەسەي دۋماسىنداعى كوميتەتىنىڭ توراعاسىنىڭ ءبىرىنشى ورىنباسارى، «ەدينايا روسسيا» پارتياسىنىڭ مۇشەسى دەپۋتات كونستانتين زاتۋلين كەزىندە ءبىزدىڭ مەملەكەت باسشىسىنا قاراتا: «ماسكەۋ سەنەن ءالى جەر داۋلاعان جوق»، - دەپ سەس كورسەتكەنى بار-تىن.

ەندى ونىڭ رەسەيدىڭ «ارنايى اسكەري وپەراتسياسىنا» قاتىستى شىندىقتى ايتقانى ءۇشىن ءوز باسى داۋعا قالدى. بۇل تۋرالى «ريدۋس» باسىلىمىنىڭ جورنالشىسى ماكسيم گولدشتەين العاشقىلاردىڭ ءبىرى بولىپ جازدى. سونىمەن، قازاق پەن قازاقستان دەسە، قاسقىرداي شابىناتىن دەپۋتات، ارعى ءتۇبى تاتار كونستانتين زاتۋلين نەدەن جازا باستى؟

ۋكراينا مۋلتيمەديالىق باسىلىمى حالىقارالىق «روسسيا سەگودنيا» ءباسپاسوز ورتالىعىندا تۇراقتى تۇردە «بىزگە قانداي ۋكراينا كەرەك؟» اتتى فورسايت-فورۋم وتكىزىپ وعان فيلوسوف ءام ساياساتتانۋشى الەكساندر دۋگين سياقتى اسىرە رەۆانشيستەردى شاقىرىپ، ورىس ءتىلدى الەمدى دۇرلىكتىرەدى. جانە وندا «ۋكراينا رەسەي ءۇشىن اياق استىنان جون ارقادان قادالاتىن قانجار» دەگەن وي تامىزىق ءتۇرلى قىرىننان ۇسىنىلىپ، ورىس ادامىنىڭ ساناسىن ۋلاپ جاتىر.

«ۆەدوموستي» گازەتىنىڭ سوزىنە سەنسەك، حالىقارالىق «روسسيا سەگودنيا» ءباسپاسوز ورتالىعىنداعى «بىزگە قانداي ۋكراينا كەرەك؟» فورسايت-فورۋمىندا  دەپۋتات كونستانتين زاتۋلين: «ارنايى اسكەري ءىس-ارەكەتتى رەسمي باستاعان كەزدە الدىمىزعا قانداي ماقسات قويعان ەدىك؟ ءبارىڭىزدىڭ ەستەرىڭىزدە بولار:  دەناتسيفيكاتسيا، دەميليتاريزاتسيا، ۋكراينانىڭ بەيتاراپتىعى جانە وسى ۋاقىتقا دەيىن زارداپ شەگىپ كەلگەن دونەتسك پەن لۋگانسك حالىقتىق رەسپۋبليكالارىنىڭ تۇرعىندارىن قورعاۋ. بۇگىنگى كۇنى وسى العا قويعاندارىمىزدىڭ قايسىسى بويىنشا ناتيجەگە قول جەتكىزدىك؟ بىردە-بىرىنە دە قول جەتكىزگەن جوقپىز. ونى ايتاسىزدار ولاردىڭ كەيبىرىنىڭ ەش ءمانىسى دە بولماي قالدى. مىسالى، ۋكراينانىڭ بەيتاراپتىعى. ەندىگى جەردە وسى ءبىر تالاپتى قويۋدىڭ قانداي ءمانىسى بار؟ ءدال قازىر ەشقانداي دا ءمانىسى جوق. ەگەر ول ءوز ءومىر ءسۇرۋىن ساقتاپ قالا السا، ەشقاشان بەيتاراپ بولا المايدى. ال، ەندى ءوز باسىم مىنا ساۋالدى قويماقپىن: وسى ارادا ۋكراينا مەملەكەت رەتىندە ءومىر ءسۇرۋىن توقتاتتى دەگەن سوزدەر ايتىلىپ قالدى، ۋكراينا زەلەنسكي جانە ونىڭ مۇراگەرلەرىنىڭ باسشىلىعىمەن ءوز ءومىر ءسۇرۋىن ودان ءارى جالعاستىرا ما، جوق پا؟ سىزدەرگە قاداپ ايتارىم، جالعاستىرادى، ارينە»، - دەگەن سوزدەرىمەن عانا قىلدان تايعان جوق. وعان دەيىن زاتۋلين كرەمل بۇلبۇلىنىڭ باعدارلاماسىندا «داۋلى جەرلەر تۋرالى» ءوز ويىن ايتىپ، رەۆانشيستىك رەسەيدى ءبىر شۋلاتقان ەدى.

ەندى باسىنا قارا بۇلت ءتونىپ، تمد بويىنشا ىستەردىڭ رەسەي دۋماسىنداعى كوميتەتىنىڭ توراعاسىنىڭ ءبىرىنشى ورىنباسارلىعى تۇگىل، «ەدينايا روسسيا» پارتياسىنىڭ مۇشەلىگىنەن شىعارىلىپ، دەپۋتاتتىعىنان ايىرىلاتىن ءسات تۋعان شاقتا كونستانتين زاتۋلين ءااى (سۆو) ءدال قازىر ەشنارسەگە قول جەتكىزبەسە دە، العا قويعان ماقساتىن جۇزەگە اسىرۋعا مىسىقتابانداپ جىلجىپ كەلەدى دەپ اقتالىپ الەككە ءتۇستى. وسى حاباردى تاراتۋشىلار «بىزگە قانداي ۋكراينا كەرەك؟» فورسايت-فورۋمىندا ايتقان ءسوزىمدى بۇرمالاپ جەتكىزىپ وتىر دەپ مالىمدەمە جاسادى.

«ەدينايا روسسيا» پارتياسىنىڭ باس كەڭەسىنىڭ حاتشىسى اندرەي تۋرچاك ءزاتۋليندى قاتال سوگىپ، وعان: «ءوز پىكىرىڭ ءوز ىشىڭدە بولسىن، بۇدان بىلاي جۇرت الدىنا شىققان شاقتا «ارانداتۋشى» ءام «اپەرباقاندىق»  تۇسىنىكتەرىڭدى سىرتقا شىعارماي جايىڭا ءجۇر»،- دەي كەلە: «سوسرەدوتوچيتسيا نا فۋنكتسياح سۆوەگو كوميتەتا، ۆاجنەيشەي يز كوتورىح، ناپروتيۆ، ياۆلياەتسيا ۋكرەپلەنيە سويۋزنيچەسكيح ي دوبروسوسەدسكيح وتنوشەني سو سترانامي بىۆشەگو سسسر»، - دەپ كەڭەس بەردى.

وسى فورۋمدا ۇنەمى ۋكراينا شاشىلعان ۋلى ءزاردىڭ ار جاعىندا بىزگە قاتىستى دا رەۆانشيستىك پىكىر جاتقان جوق پا دەگەن ويعا قالاسىڭ؟!

Abai.kz