كەشە رەسەيدىڭ ۇشاق اپاتىن تەرگەۋ كوميتەتى «ۆاگنەر» اتامانى پريگوجيننىڭ وپات بولعانىن رەسمي تۇردە راستادى. وسىلايشا ماۋسىمنىڭ اياعىنا تامان سوعىستىڭ ەل بىلمەيتىن تۇستارىن جاريا ەتىپ، ماسكەۋگە «ادىلەت جورىعىن» جاساعان وزىنە بەك سەنىمدى اتامان ارادا ەكى اي وتكەندە كوكتە اجال قۇشتى.

رەسەي باسشىسى پۋتين پريگوجيننىڭ «24 ساعاتتىق بۇلىگىنەن» كەيىن ەل الدىنا شىعىپ سويلەگەندە ونىڭ ارەكەتىن «ساتقىندىق»، «ارقادان پىشاق ۇرۋ» دەپ باعالاعان ەدى. سول كەزدە-اق ءپۋتيننىڭ وزىنە ساتقىندىقتى، باس كوتەرۋدى كەشىرمەيتىن مىنەزىنە قانىق باتىستىڭ بارلاۋ ورعاندارى پريگوجيىڭ تاعدىرىنىڭ شەشىلىپ قويعانىن، ءومىرىنىڭ ۇزاققا بارمايتىنىن بولجاپ قويعان ەدى. ءتىپتى، امەريكا پرەزيدەنتى بايدەننىڭ ءوزى: «مەن ول بولسام (پريگوجيندى مەڭزەپ) تاماق ىشكەندە دە وتە ساق بولار ەدىم» دەگەن ەدى. «ۆاگنەر» قولباسشىلارى مەرت بولعان ۇشاق اپاتىنان كەيىن امەريكانىڭ اتىن جاسىرعان لاۋازىمدى تۇلعالارى ۇشاقتىڭ جارىلعىش زاتتان اۋەدە جارىلعانىن، جاساندى سەرىكتىڭ رەسەيدىڭ اۋە قورعانىس جۇيەسىنىڭ توسىن قيمىلدارىن بايقاماعانىن ايتقان ەدى. قالاي بولعاندا دا پريگوجيننىڭ ءبىر بەتكەي ديكتاتورمەن دوستىعى مەن ويلانباي وت باسقان وسپادارلىعى تارازىعا تۇسكەندە، قارسى جاقتىڭ ونىڭ ءولىمىن تاڭداعانى انىق.

ماۋسىم ايىنىڭ باسىندا ۋكراينا تارابىنىڭ جاۋلانعان جەرلەرىن قايتارىپ الۋ ماقساتىندا جاپپاي قايتارما شابۋىلعا شىققانى بەلگىلى. باسىندا رەسەي اسكەرىنىڭ تاس قامالىن بۇزىپ، ىلگەرلەۋ ءۇشىن باتىس بەرگەن تانكلەردى الدىعا سالىپ، شابۋىلعا شىقتى. بىراق ورىس اسكەرى مينالاعان جەرلەردەن ايتارلىقتاي ىلگەرىلەي المادى. ارتىنان تاكتيكاسىن وزگەرتىپ، الىستان سوققى جاساۋ مەن شابۋىلدى بىرگە الىپ ءجۇرىپ، ايتارلىقتاي ناتيجەگە جەتتى. وسىنداي سوعىستىڭ ۇرىمتال تۇسىندا پريگوجين اسكەري بۇلىك باستادى. ونىڭ ارەكەتىنىڭ ءپۋتيننىڭ بيلىگى مەن الدىنعى شەپتەگى ورىس اسكەرىنىڭ شابۋىلىنا ايتارلىقتاي سوققى بولعانى انىق.

ءبىر اپتا بۇرىن، ۇشاق اپاتىنىڭ الدىندا ناتو ۋكرايناعا امەريكانىڭ جويعىش F16 ۇشاعىن بەرەتىن بولدى. الدىمەن نيدەرلاندى 42 دانا، دانيا 19, جيىنى 61 داناسىن بەرمەك. اعىلشىن ءتىلىن جەتىك بىلەتىن 10 ۇشقىش الەمدەگى ەڭ وزىق سوعىس ۇشاعىن مەڭگەرۋگە كىرىسىپ كەتتى. قالعاندارى ءتىل كۋرسىنان وتۋدە ەكەن. ۋكراينا اۋە وعلاندارى 2024 كىرگەندە ورىس كوگىنە شابۋىلعا شىقپاق.

رەسەي پرەزيدەنتى پۋتين مىرزا ەگەر ناتو ۋكرايناعا F16 سوعىس ۇشاعىن بەرسە، اتوم بومباسىن قولداناتىنىن ايتىپ، قورقىتىپ كەلگەن ەدى. باتىس تاعىدا ونىڭ قۇقايىن ەلەمەدى. قىزىل سىزىعىن اتتاپ ءوتتى. بۇل ارادا دا پريگوجيننىڭ سۇلباسى كورىنەدى. ونىڭ قىسقا مەرزىمدىك بۇلىگى رەسەي قورعانىسىنىڭ السىزدىگىن، اسكەري ەليتاسىنىڭ الاۋىزدىعىن، پۋتين بيلىگىنىڭ قىل ۇستىندە تۇرعانىن، ۋاقىت وتكەن سايىن وقشاۋلانىپ بارا جاتقانىن ايداي الەمگە جاريا ەتتى. ءبارىن باقىلاپ وتىرعان باتىس جاعا قادامدارعا بارىپ جاتىر. پريگوجيننىڭ ءولىمى دە تالاي تارتىستارعا جول اشارى انىق.

ەسبول ۇسەنۇلى

Abai.kz