قازاق ساۋدا ساقال سىيپاعانشا دەگەندى تەگىن ايتپاعان. بىراق نارىقتىق ەكونوميكا كىممەن ساۋدا جاساۋ كەرەكتىگىن، قالاي جاساۋ كەرەكتىگىن باستى ورىنعا قويادى، دەپ جازادى Mezgil.kz پورتالى. 

قازاقتار تەمەكى ءوندىرۋ جانە اراق شىعارۋدان رەسەيدى ارتقا تاستاپ، باسەكەگە قابىلەتتى ونىممەن وسى ەلدىڭ بۇل سالاداعى ءونىمىنىڭ اياق-قولىن بايلاپ تاستاعان ساتتە، نازارباەۆ بيلىگى ۇلتتىق بيزنەستىڭ مۇددەسىن ساتىپ كەتىپ، كاسىپكەرلەرىمىزدى تولاعاي تابىستان ايىرعان بولاتىن.

وسىلايشا ەاەو اياسىندا قازاق بيزنەسى رەسەيدىڭ كولەڭكەسىندە قالا بەردى. بىراق، بيلىك قاشاندا «رەسەيدىڭ cاۋدا ساياساتى تۇرعىسىنان ەل سەرىكتەسىمىز» ەكەنىن ۇنەمى ماقتانىشپەن ەسىمىزگە سالىپ وتىرادى.

وسى جولى دا سالدى.  مينيسترلەر كابينەتى سەيسەنبى كۇنگى حابارلاماسىندا رەسەيدى  قازاقستاندىق وندىرۋشىلەردىڭ باس يمپورتتاۋشىسى بولىپ قالا بەرەتىنى ايتىپ: «قازاقستاندىق وندىرۋشىلەر دايىن ءونىمىنىڭ اينالىمى 2023 جىلدىڭ ءبىرىنشى جارتىجىلدىعىندا 3 39,4 ملرد بولدى، بۇل وتكەن جىلدىڭ سايكەس كەزەڭىمەن سالىستىرعاندا 22%-عا جوعارى. ولاردىڭ ۇشتەن ءبىرى قازاقستاننان شيكىزاتتىق ەمەس تاۋارلاردى ەكسپورتقا تاسىمالداۋدان تۇرادى. 12,1 ملرد دوللار سوماسىنا ەكسپورتتىق جەتكىزىلىمدەردىڭ ەڭ كوپ كولەمى رەسەيگە، قىتايعا، وزبەكستانعا، تۇركياعا، الىس شەت ەلدەردەن — نيدەرلاندىعا، ۇلىبريتانياعا، جاپونياعا جونەلتىلەدى»، - دەپ مالىمدەدى.

ەندى حابارلامانىڭ مىنا ءبىر جەرىن تارقاتا ايتار بولساق: «وتاندىق تاۋار وندىرۋشىلەردىڭ سىرتقى نارىققا شىعۋىن قامتاماسىز ەتۋ ءۇشىن قازاقستان ساۋدا جانە ينتەگراتسيا مينيسترلىگى ەكسپورتتاۋشىلارعا مەملەكەتتىك قولداۋ شارالارىن كورسەتىپ وتىر. بۇل - ساۋدا ميسسيالارىن ۇيىمداستىرۋ، حالىقارالىق كورمەلەر مەن بيزنەس-فورۋمدارعا جونەلتۋ، وقىتۋ جوبالارى مەن باعدارلامالارىنا قاتىستىرۋ سىندى باعدارلار. وسىلايشا، اكسەلەراتسيا باعدارلاماسى قازاقستاندىق كومپانيالارعا جاڭا نارىقتى يگەرۋگە كومەكتەسەدى. بيىل باعدارلاماعا قاتىسۋ ءۇشىن تاماق، حيميا، توقىما جانە قىزمەت كورسەتۋ سالالارىن ەكسپورتتايتىن 111 كاسىپورىن تاڭدالدى. ەكسپورتتاۋشى كومپانيالارعا قولداۋ كورسەتۋ ءۇشىن ساۋدا-ەكونوميكالىق جوبالار ۇيىمداستىرادى»، - دەپ ناقتىلادى.

رەسەيدى سىرتقى ساۋدادا باسقا ەلمەن الماستىرۋ پروتسەسى ءجۇرىپ جاتىر، بىراق، ول ءبىز ويلاعانداي ەمەس، وتە باياۋ.

Abai.kz