1 ساۋىردەن بەرى وزبەكستان سىرداريا وزەنى ارقىلى قازاقستانعا 3,9 ملرد تەكشە مەتر سۋ جىبەردى. بۇل تۋرالى قر سۋ رەسۋرستارى جانە يرريگاتسيا مينيسترلىگى مالىمدەدى. 

وسىعان دەيىن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ وزبەكستانمەن جارتى جىل ىشىندە قازاقستانعا سىرداريا وزەنى ارقىلى 3,7 ملرد تەكشە مەتر سۋ جىبەرۋ تۋرالى مامىلەگە كەلگەن بولاتىن. ناتيجەسىندە وزبەك تاراپى كەلىسىلگەن سۋ كولەمىن 4 ايدا جىبەردى.

سۋارۋ كەزەڭىنىڭ سوڭىنا دەيىن وزبەكستان قازاقستانعا تاعى 1 ملرد تەكشە مەتر سۋ جىبەرەدى دەپ كۇتىلۋدە. بۇل ەلىمىزدىڭ وڭتۇستىك وڭىرلەرىندەگى شارۋالاردىڭ سۋارمالى سۋعا سۇرانىسىن تولىق قاناعاتتاندىرۋعا مۇمكىندىك بەرەدى.

بۇگىنگى تاڭدا شاردارا سۋ قويماسىندا 2,6 ملرد تەكشە مەتر سۋ بار، بۇل وتكەن جىلمەن سالىستىرعاندا 689 ملن تەكشە مەترگە ارتىق. شاردارا سۋ قويماسىنا جالپى كولەمى 3,9 ملرد تەكشە مەتر سۋ كەلدى.

ءوز كەزەگىندە شاردارا سۋ قويماسىنان سىرداريا وزەنىنىڭ تومەنگى اعىسىنا 3,6 ملرد تەكشە مەتر سۋ جىبەرىلدى. بۇل بىلتىرعى كورسەتكىشكە قاراعاندا 950 ملن تەكشە مەترگە ارتىق. قىزىلقۇم كانالىنا 700 ملن تەكشە مەتر سۋ، ال 400 ملن تەكشە مەتر سولتۇستىك ارال تەڭىزىنە جىبەرىلدى.

«كورشىلەرىمىزبەن توقتوعۇل جانە باحري-توچيك سۋ قويمالارىنىڭ جۇمىس كەستەسىن الدىن الا كەلىسۋدىڭ ناتيجەسىندە «دوستىق» مەملەكەتارالىق كانالىنىڭ قازاقستاندىق بولىگىنە سۋ تۇراقتى تۇردە كەلۋدە. قازىر اتالعان كانال ارقىلى ەلىمىزگە سەكۋندىنا 90 تەكشە مەتر سۋ كەلەدى. بۇل تۇركىستان وبلىسىنىڭ شارۋالارىن سۋارمالى سۋمەن تولىق قامتاماسىز ەتۋ ءۇشىن جەتكىلىكتى»، - دەدى سۋ رەسۋرستارى جانە يرريگاتسيا مينيسترلىگىنىڭ رەسمي وكىلى ءمولدىر ابدۋاليەۆا.

Abai.kz