بىرنەشە رەسەيلىك تەلەگرام-ارنالار رەسەيلىك ارميانىڭ كۋرسك وبلىسىندا كا-52 سوققىلاۋشى تىكۇشاعىن جوعالتقانى تۋرالى حابارلايدى. تاعى بىرنەشە رەسەيلىك تىكۇشاق اتىپ تۇسىرىلگەنى تۋرالى مالىمدەلدى.

بۇدان باسقا، رەسەيلىكتەر كۋرسك وبلىسىندا جويىلعان ەكى جۇك كولىگى مەن ت-62م تانكتەرىنىڭ زاقىمداعان سۋرەتتەرىن جاريالادى. Z-ارنالارىنىڭ اۆتورلارى تەحنيكانىڭ ترالداردا سىنعانىن جانە سوعىسقا كىرىسۋگە ۇلگەرمەگەنىن ايتىپ شاعىمدانادى.

رف قورعانىس مينيسترلىگى: «ۋكراينالىق اسكەرلەر كەشكە قاراي كۋرسك وبلىسىنان ۋكراينا اۋماعىنا ىعىستىرىلدى»، - دەپ مالىمدەيدى.

ۆەدومستۆونىڭ مالىمدەۋىنشە، ءبىر توپ شەكارادان وتكەن، ال ەكىنشىسىنىڭ جولىن «رەسەيلىك اسكەريلەر كەسكەستەگەن». بىراق كەيىن الدىڭعى كىرگەن توپ ۋكراينا جاققا كەرى قايتقان.

ۋكراينا جاعى مۇنى راستاعان جوق. قارۋلى كۇشتەرىنىڭ كۋرسك وبلىسىنداعى قانداي دا ءبىر شابۋىل ارەكەتتەرىن دە راستاعان جوق.

سونىمەن قاتار رەسەيلىك اسكەري تەلەگرام-ارنالار ۋكراينا اسكەرىنىڭ كۋرسك وبلىسىنداعى نيكولاەۆو-دارينو جانە دارينو ەلدىمەكەندەرىن باسىپ الىپ، ۇرىس جاساعانىن جازدى. ۋكرايندىق باق رەسەيلىكتەردىڭ تۇتقىنعا ءوز ەرىكتەرىمەن بەرىلگەنىن مالىمدەدى.

«ساعات 8-دەن باستاپ قارۋلى كۇشتەردىڭ 300 ادامدىق توبى 11 تانك پەن 22 بروندى ماشينانىڭ قولداۋىمەن كۋرسك وبلىسىنداعى رەسەيلىك پوزيتسيالارعا شابۋىل جاسادى. ورىن العان اتىس بارىسىندا قارۋلى كۇشتەردىڭ 16 بروندى تەحنيكاسى، ونىڭ ىشىندە 6 تانك جويىلدى»، - دەپ حابارلادى رەسەي قورعانىس مينيسترلىگى.

رەسەيلىك Z-ارنالار وتكەن ءتۇنى ۋكراينالىق اسكەريلەر ۋكراينانىڭ سۋمى وبلىسىنان رەسەيدىڭ كۋرسك وبلىسىنىڭ اۋماعىنا «باسىپ كىرۋگە» ارەكەتتەنگەنىن ايتادى. «دۆا مايورا» تەلەگرام-ارناسى: «ۋكراينا قارۋلى كۇشتەردىڭ شاعىن تاكتيكالىق توپتارى جەكەلەگەن ۋچاسكەلەردە رف قارۋلى كۇشتەرىنىڭ قورعانىسىنا بىرنەشە ءجۇز مەتر قاشىقتىققا دەيىن ەنە الدى»، - دەيدى.

جالپى اتالمىش ديۆەرسيالىق رەيدكە بايلانىستى رەسمي كيەۆ مۇلدە اقپارات بەرمەدى. قازىرگى اشىق دەرەككوزدەردە تاراپ جاتقان اقپاراتقا سۇيەنە وتىرىپ، ديۆەرسانتتاردىڭ سانى 150-200 ادام جانە بىرنەشە بروندى تەحنيكا (مۇمكىن جەڭىل بروندى اسكەري كولىك) ەكەنىن تۇسىنۋگە بولادى.

بۇل ارينە سوعىسقا ۇلكەن اسەرى بولا قويماس. نەگىزگى ماقساتى اقپاراتتىق جانە پسيحولوگيالىق ەففەكت الۋ. اسكەري تۇرعىدان رەسەيدى ۋكرايناعا كىرگىزۋى ءتيىس اسكەرىنىڭ ءبىرشاما بولىگىن وسى شەكارالاس وبلىستاردا ۇستاۋعا ءماجبۇر ەتۋ بولسا كەرەك. رەسەي قازىر اسكەري كۇشىنىڭ نەگىزىن تورەتسك قالاشىعىن الۋعا باعىتتاۋدا. ۋكرايناداعى وككۋپاتسيالىق اسكەرىنىڭ 30 پايىزدان استامى وسى ءبىر كىشىگىرىم قالاشىق ماڭىنا توپتاسقان. جاقىن ارالىقتا وعان بەلگورود پەن كۋرسكتا تۇرعان اسكەر بارىپ قوسىلۋى ءتيىس ەدى. مىنە، سول قوسىلۋى ءتيىس اسكەردىڭ ءبىراز بولىگىن وسى شەكارالاس ايماقتى كۇزەتۋگە قالدىرۋعا ماجبۇرلەۋ ارەكەتىنە ۇقسايدى.

سوڭعى رەت ۋكراين ديۆەرسانتتارى ناۋرىزدا وسىنداي شابۋىلدارعا شىققان. ول ساتتە اقش-تىڭ كومەگى توقتاپ، كونگرەسس ءالى كومەكتى ماقۇلداماعان ءسات ەدى. ۋكراينا تاراپى ۋاقىت ۇتۋعا جانە اسكەرگە رۋحتىق سەرپىلىس بەرۋگە تالپىنىپ، ديۆەرسيالىق رەيدتەر جاساعان بولاتىن.

Abai.kz