تالعاردا ءبىر شولمەك سىراعا بولا شىققان توبەلەستەن 16 جاستاعى شەرزات بولاتتىڭ قىرشىننان قيىلعانى قوعامدى ءدۇر سىلكىندىردى. ءار كەز سايىن وقيعاعا قاتىستى تىڭ دەرەك شىعىپ، جۇرتشىلىق ونىڭ بارىسىن الەۋمەتتىك جەلىدەن ءجىتى باقىلاپ وتىر. مارقۇمنىڭ جاقىندارى كۇدىكتىلەردىڭ كەيبىرى بۇرىن سوتتى بولعانىن جەتكىزگەن ەدى.

شەرزاتتىڭ جاقىندارى توبەلەسكە ۇل-قىزى ارالاس 13 ادام قاتىسقانىن ايتادى. رەسمي ورىندار تەك جەتى كۇدىكتى ۇستالعانىن حابارلاعان. قۇزىرلى مەكەمەلەر كۇدىكتىلەر تۋرالى اقپارات جاريالاماسا دا جەلىدە توبەلەسكە قاتىستى دەلىنگەن ادامداردىڭ اتى-ءجونى، ولاردىڭ سۋرەتتەرى تاراپ كەتتى. كەيىننەن تالعاردا ادام ولىمىنە ۇلاسقان توبەلەستىڭ بەينەجازباسى ءوشىرىلىپ تاستالدى دەگەن اقپارات تارادى. بىراق قۇزىرلى ورگاندار ول اقپاراتقا دەرەۋ پىكىر ءبىلدىردى.

«ءبىزدىڭ دۇكەندە تۇرعان ۆيدەونى الادى دا، ءوشىرىپ تاستاعان. ۆيدەو جوق دەيدى. ويلاڭدارشى، وسى ادىلدىك پە؟ ول ۆيدەودا ماگازينگە كىرگەن قىلمىسكەرلەر بار. سونى ءوشىرىپ تاستاعان. مەن سىزدەرگە ۆيدەونى كورىپ، قىلمىسكەرلەردىڭ ارقايسىسىن كورسەتە الام دەيمىن. ەندى كىمگە سەنەيىن. ايتىڭىزدارشى. قوسىڭدارشى دەسەم، ۆيدەونى ءوشىرىپ وتىر. نە ءۇشىن شىقپايمىن؟ بالام ءۇشىن شىعىپ وتىرمىن. مەن ولسەم ءولىپ كەتەيىن، باسقا جاسوسپىرىمدەر مەرت بولماسىن»، – دەگەن ەدى مارقۇمنىڭ اكەسى.

بىراق ىشكى ىستەر مينيسترلىگى بۇل اقپارات شىندىققا ساي كەلمەيتىنىن مالىمدەدى.

«الەۋمەتتىك جەلىلەر مەن بۇقارالىق اقپارات قۇرالدارىندا تالعار اۋدانىنداعى قاي̆عىلى وقيعا بولعان جەردەن بەي̆نەباقىلاۋ كامەرالارىنىڭ جازبالارى ءوشىرىلدى دەگەن جالعان اقپارات تاراۋدا. سوتقا دەي̆ىنگى تەرگەپ-تەكسەرۋ شەڭبەرىندە بارلىق قولدا بار بەي̆نەجازبالار پوليتسيا تاراپىنان تاركىلەنىپ، قىلمىستىق ءىس ماتەريالدارىنا زاتتاي̆ دالەل رەتىندە تىركەلگەنىن حابارلاي̆مىز. قازىرگى ۋاقىتتا تەرگەۋ بارىسىندا بارلىق بەي̆نەجازبالار زەرتتەلىپ، وقيعاعا قاتىسۋشىلاردىڭ ارەكەتتەرىنە قۇقىقتىق باعا بەرىلەتىن بولادى»، – دەلىنگەن ءىىم حابارلاماسىندا.

اشىق سوتتى تالاپ ەتەمىز

مارقۇمنىڭ اكەسى سوت اشىق ءوتۋىن سۇراپ باس پروكۋرور بەرىك اسىلوۆقا ۇندەۋ جاسادى.

ال سالتانات نۇكەنوۆانىڭ اعاسى ايتبەك امانگەلدى بوزبالانىڭ وتباسىنا تەگىن ادۆوكات تاۋىپ بەردى. بەلگىلى زاڭگەر ءلاززات احاتوۆا تالعارداعى 16 جاستاعى بالانىڭ ولىمىنە قاتىستى ماسەلەدە كۇدىكتىلەردى ءوز بەتىنشە جاسالاۋعا تىرىسپاي زاڭعا باعىنۋعا شاقىردى.

سۋرەتتەر ulysmedia.kz سايتىنان الىندى.

شەرزاتتىڭ ءۇيى ورتكە وراندى

سەنبى كۇنى شەرزاتتىڭ ءۇيى ورتەندى دەگەن اقپارات لەزدە تارادى. ارتىنشا مارقۇم شەرزات بولاتتىڭ اجەسى جۇمابيكە نۇرىموۆا بالاسى – مارقۇم شەرزاتتىڭ اكەسى قارجاۋباي نۇرىموۆقا بىرەۋلەر حابارلاسىپ، قوقان-لوققى جاساپ جاتقانىن ايتتى.

«بالاما قوڭىراۋ سوعىپ، «بالاڭنىڭ جانىنان كورىڭدى قازا بەر» دەپ قورقىتىپ جاتىر. بىزگە كومەككە ادام كەرەك. كەلگەن اكىمدەرگە دە، جۋرناليستەرگە دە ايتىپ جاتىرمىن. كورشىلەر ۇيىڭىزگە ادامدار كىرگەن دەپ ايتىپ جاتىر. ەسىكتى اشىپ، كىرگەن، ارالاپ جۇرگەن، بىراق ەشتەڭە الماعان دەگەندى ايتتى. كورشىلەر قاراۋىلدا وتىر. بالالار قورقىپ، «ۇيگە بارايىق» دەدى. مەن «جوق، بالامنىڭ قىرقى ءوتسىن، ماسەلەنى بىرجاقتى ەتىپ الايىق، قاتارلاسىپ جاتساق تا وسى ۇيدە بولىڭدار» دەدىم. رۇقسات بەرمەدىم. سونىڭ ارقاسىندا ولار امان قالدى.

ءبىر كورشىم «تاتە، كەشە ساعات 5-تە جۇمىسقا كەتىپ بارا جاتقاندا ءنومىرسىز ەكى «مەرسەدەس» كولىگى كوشەنى اينالىپ جۇرگەن، سوسىن كەتىپ بارا جاتقان سوڭ سىزدەردى شوشىتپايىن دەپ ايتپادىم. تاڭەرتەڭ قايتىپ كەلە جاتسام، سول كولىكتەر تاعى تۇر ەكەن. جوعارى ورگاندارعا ايتپادىڭىزدار ما ادام بەرسىن دەپ» دەدى. مىنە، ءۇي ورتەندى، بالام ءولدى. سودان كەيىن عانا كۇزەتۋگە ەسىگىمىزدىڭ الدىنا پاترۋل كولىگىن بەردى. وعان دەيىن ۇكىمەتىمىز قيمىلداۋعا بولاتىن ەدى. مەنىڭ تاڭعالاتىنىم، ولاردىڭ (قىلمىس جاساعان ادامداردىڭ – رەد.) ۇيىنە، كوشەسىنە پاترۋل كولىگىن بەرىپ قويىپتى. ءبىزدى شابۋىلدايدى دەپ. ۇكىمەت سولاردىڭ ءسوزىن سويلەپ تۇرعان سياقتى»، – دەيدى مارقۇم شەرزات بولاتتىڭ اجەسى.

ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ پەن الماتى وبلىسىنىڭ پروكۋرورى بەرىك اداموۆ تالعاردا بولعان وقيعاعا، ياعني مارقۇم بولعان شەرزات بولاتتىڭ وتباسىنا تيەسىلى ءۇيدىڭ ورتەنۋىنە بايلانىستى ءىستىڭ ءمان-جايى تۋرالى باياندادى.

باۋىرجان الەنوۆتىڭ ايتۋىنشا، قىلمىس جاسالعان ساتتەن باستاپ تالعار اۋدانىندا ءمينيستردىڭ ءبىرىنشى ورىنباسارى باستاعان ءىىم ورتالىق اپپاراتى قىزمەتكەرلەرىنەن قۇرالعان جەدەل-تەرگەۋ توبى جۇمىس ىستەپ جاتىر.

«جەدەل-تەرگەۋ توبى قۇرىلىپ، قىلمىس جاسالعان جەردە مۇقيات تەكسەرۋ جۇمىستارىن جۇرگىزىلىپ، بەينەباقىلاۋ كامەرالارىنداعى جازبالار قارالىپ جاتىر. اۋلالار مەن ەسەپتە تۇرعان تۇلعالار تەكسەرىلىپ جاتىر. وتباسىنىڭ تۇرعىلىقتى جەرىن پوليتسيا قىزمەتكەرلەرى پاترۋلدەپ ءجۇر. وقيعا بولعان كەزدە ءورت بولعان ۇيدە ەشكىم بولماعان. وتباسى باسقا مەكەنجايدا بولعان. قىلمىسكەرلەر ۇستالىپ، مىندەتتى تۇردە جاۋاپقا تارتىلادى. سونىمەن قاتار جالعان اقپارات تاراتپاۋعا شاقىرامىن»، – دەدى ىشكى ىستەر ءمينيسترىنىڭ ءبىرىنشى ورىنباسارى باۋىرجان الەنوۆ.

الماتى وبلىسىنىڭ پروكۋرورى بەرىك اداموۆ تەرگەۋ بارىسى تۋرالى باس پروكۋرورعا ەسەپ بەرەتىنىن جەتكىزدى.

«بۇگىندە ارنايى پروكۋرورلار ءۇيدى ورتەۋ فاكتىسىن تەرگەپ جاتىر. وقيعا ورنىنان بارلىق ايعاق الىنىپ، ولار بويىنشا ءتيىستى ساراپتامالار تاعايىندالدى. ءبىز ساراپتاما ناتيجەلەرىن كۇتۋدەمىز، ودان كەيىن قوسىمشا اقپارات بەرىلەدى. بۇگىنگى تاڭدا وسى ءىس بويىنشا كوپتەگەن جالعان اقپارات تاراتىلۋدا. ازاماتتارعا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلاتىنىن ەسكەرتكىم كەلەدى»، – دەدى الماتى وبلىسىنىڭ پروكۋرورى بەرىك اداموۆ.

تالعار قالاسىنداعى وقيعا بۇكىل ەلدىڭ نازارىندا. قۇزىرلى ورگاندار تەك رەسمي اقپاراتتارعا عانا سەنۋگە شاقىرادى.

Abai.kz