سەنات دەپۋتاتى، ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى سۇيىندىك الداشەۆكە اشىق حات!

سۇيىندىك تاسەمەنۇلى!

ءسىز مەنىڭ «ءسىز...», «قۇرمەتتى...» دەگەن سوزدەردەرمەن جازعان حاتتارىما پىسقىرىپ تا قاراعان جوقسىز!

سوسىن، ول سوزدەردى لاقتىرىپ تاستاپ، تىكە «سەنگە» كوشكەنىمدى جۇرت جاقسى بىلەدى دەپ ويلايمىن.

بىراق، وسى «اشىق حاتتى» جازاردا، بىرىنشىدەن، باق دەگەن كيەلى قارا شاڭىراقتى، ەكىنشىدەن، اباي اتامىزدىڭ اتىمەن اتالاتىن «Abai.kz» سايتىن سىيلاپ، امالسىزدان «سىزگە...» كوشۋىمە تۋرا كەلدى.

ءسىز «سەنات» دەگەن قاستەرلى ينستيتۋتتى سىيلاماساڭىز، ول – ءوز شارۋاڭىز جانە ول ءسىزدىڭ ءوز دەڭگەيىڭىزگە بايلانىستى شارۋا!

ال، «ءتورتىنشى بيلىك» دەگەن اتى بار باق-دەگەن كيەلى قارا شاڭىراقتىڭ تورىندە «سەن!» دەپ وعاش سويلەۋگە مەنىڭ بەتىم شىدامايدى ەكەن.

سىزدەن ەمەس، ارينە، «Abai.kz-ءتىڭ» مارتەبەلى وقىرمانىنان ۇيالدىم.

سوندىقتان، قانىم قارايىپ تۇرسا دا، حاتىمدى «سىزبەن» باستاپ، مۇمكىندىكتىڭ بارىنشا، «سىزبەن» اياقتاۋعا تىرىسايىن. الدا-جالدا «سەنگە» كوشىپ كەتسەم، «Abai.kz-ءتىڭ» مارتەبەلى وقىرماندارى، مەنى كەشىرىپ قويىڭىزدار!

سۇيىندىك تاسەمەنۇلى!

مەن قۋانىش ايتاحانوۆتى كورسەم، الپىس مەتر جەردەن اتتان ءتۇسىپ سالەم بەرۋگە دايىنمىن;

مەن سۆەتلانا جاقياقىزى جالماعامبەتوۆانى كورسەم، كوزىمە جاس الىپ، قولىنان ءسۇيىپ امانداسامىن;

مەن نۇرلان ءورازاليندى كورسەم، ولگەن اكەم مۇقيبەك ءتىرىلىپ كەلگەندەي قۋانىپ، موينىنا اسىلامىن;

مەن جابال ەرعاليەۆپەن اپتاسىنا بولماسا دا، ايىنا ءبىر رەت تەلەفون سوعىپ، امانداسىپ تۇرامىن;

مەن مۇرات باقتيارۇلىن تۋعان اعامداي كورەمىن، ول كىسى دەگەندە ىشكەن اسىمدى جەرگە قويامىن.

مەنىڭ تاعى وسى كوشى-قون ءۇردىسىن رەتتەۋگە ارنالعان زاڭدارعا بايلانىستى جازعان «پارلامەنت ءۇيى بۇرحاندار مۇلگىپ وتىراتىن بۇتحانا ەمەس!» دەگەن ماقالامدى «جاس الاشتان» وقىپ، مۇرات باقتيارۇلى مەنى ءوزى ىزدەپ تاۋىپ العان بولاتىن.

سودان مۇرات اعا كىشىرەيىپ قالعان جوق. قايتا، مەن ارقىلى مەنىڭ تاعدىرلاس اعالارىممەن تانىسىپ، بۇل كۇندە ءبىزدىڭ ەڭ ءبىر ارقا سۇيەر تىرەگىمىزگە اينالىپ كەتتى...

قىسقاسى، بۇل كىسىلەر دە قازىر ءسىز وتىرعان سەناتتىڭ ءبىر كەزدەگى دەپۋتاتتارى بولعان. قازاق كوشى 2013 جىلى تيمۋر قۇلىباەۆ پەن كارىم ءماسىموۆ دەگەن ەكى پالەكەتتىڭ قاستاندىعىنا ۇشىراپ، شەتتەن ورالعان ەتنيكالىق قازاقتارعا بەس جىلسىز ازاماتتىق بەرىلمەيتىن قاتاڭ زاڭ قابىلدانار ءتۇستا، جاندارىن سالىپ كۇرەسكەن بولاتىن. سەناتتىڭ تورىنەن بىرىنەن كەيىن ءبىرى ءسوز الىپ، ۇلى كوشتى قىزعىشتاي قورعاعان بولاتىن.

نۇرلان ورازالين اعامىز ارنايى مالىمدەمە جاساپ، ول مالىمدەمەسىن «قازاق ادەبيەتى» گازەتىنە باستىرعانى ءالى ەسىمىزدە.

ءسويتىپ، اتالعان قاتاڭ زاڭدى سەنات ءبىر جولعا ماجىلىسكە قايتاردى. بىراق، بەس جىل ەمەس، ءتورت جىلسىز ازاماتتىق بەرىلمەيتىن نورما ماقۇلدانىپ كەتتى.

ال، سەرىك اقىلباي دەگەن نەمەنى كورسەم، جەرگە ءبىر تۇكىرەم دە، تەرىس اينالىپ كەتەمىن!

سەبەبى، ول نەمەنىڭ سول كەزدەگى: «...سىرتتان كەلىپ جاتقان اعايىندارىمىزدىڭ ۇكىمەتكە دەگەن كوزقاراسى ءبىر­جاقتى بولماي تۇرعانى بايقالادى», - دەپ، سول تيمۋر قۇلىباەۆ پەن كارىم ءماسىموۆ دەگەن ەكى پالەكەتتىڭ سويىلىن سوققانىن ەشقاشان كەشىرە المايمىن!

وسى جولداردى جازىپ وتىرعان اۋىت مۇقيبەك دەگەن پاقىرىڭىزدىڭ تۇڭعىش پرەزيدەنتتىڭ اتىنا جازعان «ناعاشىما حات» دەگەن «اشىق حاتى» انا ەكى پالەكەتتىڭ باسىن تۋالەتكە تىعىپ، قاتاڭ زاڭدى التى ايعا جەتكىزبەي قالپىنا كەلتىرۋ تۋرالى جارلىق شىعارتقانىن بۇكىل دۇنيەجۇزىنىڭ قازاقتارى بىلەدى!

سۇيىندىك تاسەمەنۇلى!

اڭگىمە بۇنىمەن بىتكەن جوق.

سول قاتاڭ زاڭنىڭ جوباسى قايتا قاراۋ ءۇشىن پارلامەنتكە تۇسكەننەن كەيىن، ءماجىلىستىڭ سول كەزدەگى دەپۋتاتتارى گۇلنار سەيتماعانبەتوۆا، الدان سمايىل، قۇتتىقوجا ىدىرىسوۆ، نۇرتاي سابيليانوۆ، مايرا ايسينا، مەرۋەرت قازبەكوۆا، باقىتبەك سماعۇل، الماس تۇرتاەۆتاردان قۇرالعان جۇمىس توبىنىڭ توعىز اي بويى ىشىندە ءجۇردىم.

جۇمىس توبىنىڭ جەتەكشىسى – ءسىزدىڭ جەرلەسىڭىز گۇلنار سەيتماعانبەتوۆا اپكەم بولدى.

گۇلەكەڭ بۇل جۇمىس توبىن ءوزى سۇراپ الىپ، اكەسىنە تانىتىپ وتىرىپ جۇرگىزدى.

قانداي ۇسىنىس دايىنداپ اپارام، قۇداي تىلەۋىڭدى بەرگىر، گۇلنار سۇلەيمەنقىزى بىرەۋىن قالدىرماي تالقىعا سالىپ وتىردى.

ءسىز سەكىلدى تىرسەگىنە سيگەن كەرتارتپالار ول كەزدە دە بولدى. ولاردىڭ تىرسەگىن ءوزىم قيىپ وتىردىم. جەتى اتاسىن جەزدەي قاقتاپ سىنايمىن، كەلەسى جولى بالەمدەردىڭ تىزەلەرى دىرىلدەپ تۇراتىن.

مەن ءماجىلىستىڭ بەسىنشى شاقىرىلىمىنىڭ وسى اتى اتالعان دەپۋتتارىن بىرگە تۋعان تۋىسىمداي كورەمىن. گۇلنار سۇلەيمەنقىزىمەن ۇنەمى تەلەفون ارقىلى سويلەسىپ، سول ءبىر وتكەن كۇندەردى ەسكە الىپ تۇرامىز. مارقۇم قۇتتىقوجا ىدىرىسوۆ اعامىزدىڭ ارۋاعىنا بىلگەن دۇعامدى وقىپ، بەتىمدى سىيپاپ جۇرەمىن...

قىسقاسى، سەنات پەن ءماجىلىستىڭ جوعارىداعى مەن اتتارىن اتاعان دەپۋتتارىنىڭ ءاربىرى تۇلعا!

ولاردىڭ اتاقتارى مەن ابىرويلارى قانشا بيىك بولعانىمەن، ءبارى شەتىنەن كىشىپەيىل، الدى كەڭ كىسىلەر.

مەنى كورسە، ۇلكەن باستارىمەن اماندىق سۇراپ، ارقامنان قاعىپ، اق تىلەكتەرىن جاۋدىرىپ جاتادى...

قاشان سۇرانسام، كۇتتىرمەي قابىلدايتىن. جاس دەمەي، شەتتەن كەلدىڭ دەمەي، ادامشا سويلەسە بىلەدى. ءوتىنىشىمدى ايتقان جەرىمە جىبەرىپ نەمەسە پارلامەنتتىڭ تورىنەن وزدەرى كوتەرىپ، قاشان وڭ شەشىلگەنشە تىنىم تاپپايتىن...

مىنە، بۇگىن قانداستارىمىز وسى دەپۋتاتتاردىڭ ىقپالىمەن سول كەزدە قابىلدانعان ءتيىمدى نورمالاردىڭ قىزىعىن كورىپ، العىستارىن ايتۋدا...

سۇيىندىك تاسەمەنۇلى!

وسى حاتتى جازاردا، ءسىزدىڭ ءومىربايانىڭىزدى تاعى ءبىر مارتە وقىپ شىقتىم.

قۇداي-اۋ، ءسىز دە قاسيەتتى ماڭعىستاۋدىڭ تۋماسى ەكەنسىز عوي! جەرلەستەرىڭىزدەن سۇراپ ءبىلدىم، ءسىز دە ادايدىڭ ۇرپاعى ەكەنسىز...

ماڭعىستاۋ دەسە بولدى، ءبىزدىڭ ويىمىزعا بىردەن ورالاتىنى – قاسيەتىڭنەن اينالايىن ادايلار!

شىنىن ايتسام، باسقا تۋىسقاندارىم رەنجىمەسىن، ماڭعىستاۋدى قويىپ، بۇكىل باتىس ءوڭىردىڭ تۇرعىندارى ماعان اداي بولىپ، اداي قۇساپ سەزىلەدى.

سۇيىندىك تاسەمەنۇلى!

ءسىز بىلەسىز بە، ءابىش كەكىلباەۆ دەگەن قازاقتىڭ وسى زامانعى ءال-ءفارابيى بولعان.

ءابىش اعا مارقۇم شەتتەگى اعايىندار تۋرالى قانداي وسيەت ايتىپ كەتكەنىن ەستىپ پە ەدىڭىز؟!

ءسىز ءابىش اعانى بىلمەيتىن، ءسوزىن ەستىمەگەنگە ۇقسايسىز!

ەندەشە، وقىڭىز، ءابىش اعا مارقۇم: «سىرتتان كەلگەن اعايىندى ءتىرىلىپ كەلگەن اكەڭدەي، مايداننان جاراقاتتانىپ قايتا ورالعان ءوز باۋىرىڭداي اسا ارداقتاي ءبىلۋ كەرەك. ءومىر بويى كورمەي، قىرىقتان كەيىن كورگەن پەرزەنتىڭدەي قاتتى ءسۇيۋىڭ كەرەك، قادىرلەۋىڭ كەرەك! ولاردىڭ ءجونى باسقا بولۋى كەرەك قازىرگى قازاق قاۋىمىندا!! بۇل قايدان كەلدى، بۇل – قالپاق، بۇل – وزبەك، بۇل – قىتاي، بۇل – ءشۇرشىت دەيتىن اڭگىمەنى قويۋ كەرەك! ولاردى ءبىرىنشى كەزەكتە جاقسى كورۋ كەرەك!», - دەگەن بولاتىن!

شاماسى، ءسىز ءابىش اعانى تانىمايتىن، مىنا وسيەتىن ەستىمەگەن ادام سەكىلدىسىز.

ەگەر، ابەكەڭدى تانيتىن، شىعارمالارىن وقىعان، سوزدەرىن تىڭداعان بولساڭىز، مىناداي يتتىككە بارمايتىن ەدىڭىز!

مەن اتاجۇرتقا ورالعان سوڭ، ادايدىڭ اردا تۋعان ازاماتتارىمەن اعا-باۋىر، دوس بولىپ ارالاستىم.

قازاقتىڭ عاجايىپ اقىنى، مارقۇم ەسەنعالي راۋشانوۆ مەنى تۋعان باۋىرىنداي كورەتىن. «اۋىتىم-اۋىتىم!»، - دەپ، استاناعا كەلسە ىزدەپ جۇرەتىن. ءتۇننىڭ جارىمىندا تەلەفون سوعىپ، ماقالالارىمدى وقىعانىن ايتىپ، دەمەپ وتىراتىن.

2020 جىلى مەن ءماجىلىس سايلاۋىنا تۇسپەك بولىپ، پرايمەريزگە قاتىسقانىمدا، ەسەنعالي اعا «قازاق ادەبيەتى» گازەتىنە «اۋىلداستىڭ تايى وزسىن...»  دەگەن اتپەن ارنايى ماقالا جازىپ: «مىسالى، كوشى-قون ماسەلەلەرى، شەكارالىق ايماقتاعى قازاقتاردىڭ حال-احۋالى، ولار ءۇشىن بەلگىلەنگەن نەمەسە بەلگىنەنۋگە ءتيىستى كومەكتەر، اداپتاتسيالانۋ، ءبىلىم الۋداعى ىقتيار حات، ازاماتتىق الۋداعى جەڭىلدىكتەر سەكىلدى تولىپ جاتقان پروبلەمالاردى سول ورتادان شىققان مەنىڭ اۋىت ءىنىم جاقسى بىلەدى...», - دەپ، اق جول تىلەگەنى بار.

ونىڭ بەر جاعىندا كەشە عانا مەملەكەتتىك سىيلىقتى قانجىعاسىنا بايلاعان سۆەتقالي نۇرجان اعامىز: «اداي مەن قىزاي بىرگە تۋعان...»، - دەپ، مەنى بولە قىلىپ، ەركەلەتۋمەن كەلەدى.

ءماجىلىستىڭ قازىرگى دەپۋتاتى ەدىل جاڭبىرشين دە ادايدىڭ قۇلىنى!

ول دا مەنىڭ ءبىر اۋىز ءسوزىمدى جەرگە تاستاماي، «قانداس» مارتەبەسىن جانە قازاقستان ازاماتتىعىن الۋ ءۇشىن ءوتىنىش بىلدىرگەن ادامداردىڭ ۇلتى قازاق ەكەنىن كوميسسيا ارقىلى انىقتاۋ ءتارتىبىن زاڭداستىرىپ، ونى جەرگىلىكتى اتقارۋشى ورگانداردىڭ قۇزىرەتىنە بەرگىزدى.

ايتپاقشى، جاي قاتارداعى ادامداردى قويىپ، پرەزيدەنتتەردىڭ ءوزى ايتىپ جۇرەتىن «ءار قازاق – مەنىڭ جالعىزىم!» دەگەن ولەڭدى دە سول قاسيەتتى ماڭعىستاۋدىڭ ادايى – سابىر اداي جازعان جوق پا؟!

سۇيىندىك تاسەمەنۇلى!

سەناتتىڭ ءسىز جانە ءسىز باسقارىپ وتىرعان كوميتەتى تيمۋر قۇلىباەۆ پەن كارىم ءماسىموۆ دەگەن ەكى پالەكەتتىڭ ۇلى كوشكە وسىدان ون جىل بۇرىنعى جاساعان يتتىگىن قايتالاپ، كوشىپ كەلۋشىلەردى قونىستاندىرۋ ءۇشىن ۇكىمەت ارنايى بەكىتكەن سەگىز وبلىستان باسقا، توعىز وبلىس پەن استانا، الماتى، شىمكەنت – ءۇش قالاعا ءوز ەركىمەن كوشىپ كەلىپ، قونىستانعىسى كەلەتىن ەتنيكالىق قازاقتارعا «قانداس» مارتەبەسى بەرىلمەيتىن ەتىپ، «حالىقتىڭ كوشى-قونى تۋرالى» زاڭىنا 20-باپتىڭ 5) تارماعىن ەنگىزىپ تاستايسىزدار!

ەندى وسى نورمانىڭ شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەپ تاستاعانىن، ونىڭ قازاقستان رەسپۋبليكاسىنىڭ كونستيتۋتسياسىنىڭ 21-بابىنا مۇلدە قايشى ەكەنىن ايتىپ، سەنات توراعاسى ماۋلەن اشىمباەۆتىڭ جانە وسى نورمانى ماقۇلداعان سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى بولعان ءسىزدىڭ اتىڭىزعا حات جازعانىما جارتى جىلدان استى.

ماۋلەن ساعاتحانۇلىنىڭ پارمەنىمەن ەڭبەك جانە حالىقتى الەۋمەتتىك قورعاۋ مينيسترلىگىنىڭ جاۋاپتى باسشىلارىن قاتىستىرا وتىرىپ، سەناتتا جينالىس تا ءوتتى.

سول جينالىستا ءجوندى جاۋاپ بەرمەي، جۇرە تىڭدادىڭىز!

ودان قالسا، جەتى-سەگىز مارتە جازعان حاتىمدى سەنات توراعاسىنا جەتكىزبەي، ەڭبەك جانە حالىقتى الەۋمەتتىك قورعاۋ مينيسترلىگىنە لاقتىرا بەرەسىز، لاقتىرا بەرەسىز!

ءتىپتى، اتالعان مينيسترلىكتىڭ بەرگەن جاۋابىن «سۇيىندىكتىڭ سۋ كەشپەيتىن جاۋابى» دەپ اتاپ: «مىسالى، سۇيىندىك تاسەمەنۇلى دەگەن ازامات وتباسىمەن قىتايدان الماتى وبلىسى، رايىمبەك اۋدانى، قاراساز اۋىلدىق وكرۋگىنە كوشىپ كەلدى دەيىك...», - دەپ، ءوزىڭىزدى مىسالعا الا وتىرىپ، 20-باپتىڭ 5) تارماعىنىڭ شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەپ تاستاعانىن، ونىڭ قازاقستان رەسپۋبليكاسىنىڭ كونستيتۋتسياسىنىڭ 21-بابىنا مۇلدە قايشى ەكەنىن باقايشىعىنا دەيىن تالداپ بەردىم!

كەشە (13 قاراشا) ول حاتىمدى دا ەڭبەك جانە حالىقتى الەۋمەتتىك قورعاۋ مينيسترلىگىنە تاعى لاقتىرا سالدىڭىز...

سۇيىندىك تاسەمەنۇلى!

ايتىڭىزشى، سوندا ءسىز ءوزى قايدان شىققان پالەكەتسىز؟!

بايقايمىن، وسى 20-باپتىڭ 5) تارماعىنىڭ ارتىندا ءالى سول تيمۋر قۇلىباەۆ تۇرعان سەكىلدى.

نەگىزى، ءسىز جانە ءسىز باسقارىپ وتىرعان كوميتەت بۇل نورماعا ورە تۇرەگەلىپ قارسى شىعىپ، وتكىزبەي تاستاۋى كەرەك قوي.

جوق، سىزدەر، كەرىسىنشە، بۇل قارعىس اتقىر نورمانى قوس قولدارىڭىزدى كوتەرىپ، قولداپ بەرە سالدىڭىزدار.

ءسىزدىڭ 1994 جىلدان باستاپ، 2012 جىلعا دەيىن «كازترانسويل» اق-نىڭ باتىس فيليالىندا جاۋاپتى قىزمەتتەر اتقارعانىڭىزدى ەسكەرسەك، دەمەك ءسىز دە قۇلىباەۆتىڭ قۇلاقكەستى ادامى بولۋىڭىز ابدەن مۇمكىن!

سۇيىندىك تاسەمەنۇلى!

وڭ قۇلاعىڭىزبەن ەستىڭىز، ءارى-بەرىدەن كەيىن، سەنىڭ 20-بابىڭنىڭ مىنا 5) تارماعىڭنىڭ مەن ءۇشىن كوك تيىندىق قۇنى جوق!

ءوزىڭ دە بايقاعان بولارسىڭ، سەن جانە سەن باسقارىپ وتىرعان ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى بۇل نورمانى 2023 جىلعى ساۋىردە قابىلداپ جىبەردى. كۇزگە قاراي شەتتەن ورالعان اعايىندارىمىز «قانداس» مارتەبەسىن الا الماي شۋلاي باستاعاندا، «تامارانىڭ تالتايىپ تۇرىپ قابىلداتقان زاڭىنىڭ سيقى…» https://abai.kz/post/173984 دەگەن ءبىر ماقالا جازىپ ەدىم، ەڭبەك جانە حالىقتى الەۋمەتتىك قورعاۋ مينيسترلىگى زارەسى ۇشىپ، «قانداس» مارتەبەسىن بەرۋ ەرەجەسىنە وتىرىك «وزگەرىس» ەنگىزە قويىپ، «قانداس» مارتەبەسىن زاڭسىز تاراتا باستاعان جوق پا؟!

ەڭبەك جانە حالىقتى الەۋمەتتىك قورعاۋ مينيسترلىگىنىڭ ول وتىرىگى مەن زاڭسىزدىعىن, جوعارىدا ايتتىم عوي، سۇيىندىك تاسەمەنۇلى، ءوزىڭدى نارىنقولعا كوشىپ كەلگەن اعايىن رەتىندە مىسال ەتە وتىرىپ، ەكى مارتە دالەلدەپ بەردىم عوي!

سەن سول حاتتارىمدى، پىسقىرىپ تا قاراماستان، ەڭبەك جانە حالىقتى الەۋمەتتىك قورعاۋ مينيسترلىگىنە لاقتىرا سالدىڭ عوي، ەي!

سۇيىندىك تاسەمەنۇلى!

ون بەس جىلدان بەرى دەپۋتاتتارمەن سايكەسىپ جۇمىس ىستەپ كەلەمىن عوي، ءدال مۇنداي تاسباۋىرلىقتى، ۇياتسىزدىقتى، ارسىزدىقتى، نامىسسىزدىقتى كورگەن ەمەسپىن!!

سەن اتالعان نورمانى ءوزىڭ باسقارىپ وتىرعان كوميتەتىڭمەن قابىلدادىڭ با، ەندى ونىڭ شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەپ تاستاعانىن جانە ونىڭ قازاقستان رەسپۋبليكاسى كونستيتۋتسياسىنىڭ 21-بابىنا مۇلدە قايشى ەكەنىن جىگىتشە مويىنداۋىڭ كەرەك!!

جوعارىدا ايتتىم عوي، تاعى قايتالايمىن، سەن قابىلداعان 20-بابىڭنىڭ 5) تارماعىنىڭ مەن ءۇشىن كوك تيىندىق قۇنى جوق!

كورىدىڭ عوي، شەتتەن كەلگەن اعايىندار «قانداس» مارتەبەسىنسىز قالعان جوق! مەنىڭ ءبىر ايعايىممەن قۇزىرلى مينيسترلىكتىڭ ءوزى وتىرىك «ەرەجە» جاساپ، زاڭسىز بەرىپ تۇرعان سوڭ، ولار ول مارتەبەنى الۋعا ءماجبۇر بولدى.

ءسويتىپ، قازاقستان ازاماتتىعىنا قول جەتكىزدى. ارينە، قاتتى قينالدى...

بىراق، بۇل – قاسىم-جومارت توقاەۆتىڭ: «ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ – باستى مىندەت. بۇل ماسەلە بويىنشا مەنىڭ كوزقاراسىم – ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس»، - دەگەن ۇستانىمىنا مۇلدە قايشى!

سەندەر وتىرىك «ەرەجە» جاساپ، جالعان جاۋاپ بەرىپ، ويلارىڭا كەلگەندەرىڭدى ىستەپ جاتىرسىڭدار...

ەندەشە، سۇيىندىك تاسەمەنۇلى، قويانبۇلتاقتى دوعارىپ، سەن 20-باپتىڭ 5) تارماعىنىڭ  شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەپ تاستاعانىن جانە ونىڭ قازاقستان رەسپۋبليكاسى كونستيتۋتسياسىنىڭ 21-بابىنا مۇلدە قايشى ەكەنىن ءسوزسىز مويىنداۋىڭ كەرەك!

سۇيىندىك تاسەمەنۇلى!

«نەگە؟!» دەيتىن شىعارسىڭ!

نەگەسىن ايتايىن، تىڭدا!

پارلامەنتتىڭ قوس پالاتاسى «حالىقتىڭ كوشى-قونى تۋرالى» زاڭعا «اتا جولى» كارتاسىن ەنگىزىپ، اتالعان كارتانى العان ەتنيكالىق قازاقتاردىڭ قۇقىقتارى مەن مىندەتتەرىن بەكىتپەي، پرەزيدەنتىمىز قاسىم-جومارت توقاەۆتى بۇكىل دۇنيەجۇزىنىڭ قازاعىنا وتىرىكشى قىلدىڭدار!

ماۋلەن ساعاتحانۇلىنا راحمەت، جاقىندا – 14 قازاندا مەنىڭ وسى كەلەڭسىز ماسەلەگە قاتىستى حاتىما جاۋاپ بەرىپ: «اۋىت مۇقيبەك، ءسىزدىڭ «اتا جولى» كارتاسىنا قاتىستى حاتىڭىزدى قاراستىرىپ، قولدانىستاعى زاڭ نورمالارىندا «اتا جولى» كارتاسىن العان ەتنيكالىق قازاقتاردىڭ قۇقىقتارى مەن مىندەتتەرى بەكىتىلمەگەنىن حابارلايمىز», - دەپ، سەنات اقىرى مويىندادى!

ول از بولعانداي، بىلەسىڭ بە، ەندى سەنىڭ باسشىلىعىڭمەن قابىلدانعان 20-باپتىڭ 5) تارماعى پرەزيدەنتىمىز قاسىم-جومارت توقاەۆتى بۇكىل الەمنىڭ الدىندا تاعى ۇياتقا قالدىرىپ وتىر!

سەن بۇل نورمانىڭ شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەپ تاستاعانىن جانە ونىڭ قازاقستان رەسپۋبليكاسى كونستيتۋتسياسىنىڭ 21-بابىنا مۇلدە قايشى ەكەنىن بىلمەيدى ەمەس، وتە جاقسى بىلەسىڭ! بىراق، بۇتىنا جىبەرىپ قويعان بالا قۇساپ، ونى مويىنداۋدان قورقىپ، ەكى كوزىڭ باقىرايىپ وتىرسىڭ!

سۇيىندىك تاسەمەنۇلى!

ماعان سەنىپ قوي! ماعان سەنبەسەڭ، قازاقستاننىڭ بۇكىل زاڭگەرلەرىن جيىپ تەكسەرت، ارسىزدىقپەن مويىنداماي وتىرعانىڭ بولماسا، 20-باپتىڭ 5) تارماعى شەتتەن ورالعان ەتنيكالىق قازاقتاردىڭ تۇرعىلىقتى مەكەندى ءوز قالاۋىنشا تاڭداپ الۋ قۇقىعىن شەكتەيدى جانە بىرىككەن ۇلتتار ۇيىمى باس اسسامبلەياسىنىڭ رەزوليۋتسياسىمەن 1948 جىلعى 10 جەلتوقساندا قابىلداعان ادام قۇقىقتارىنىڭ جالپىعا بىردەي دەكلاراتسياسىنىڭ 13-بابى مەن قازاقستان رەسپۋبليكاسى كونستيتۋتسياسىنىڭ 21-بابىنا مۇلدە قايشى!

سول ءۇشىن، ماڭعىستاۋلىقتاردىڭ ابىرويىنا داق تۇسىرمەي، قولىڭمەن ىستەگەن بۇل قاتەلىكتى موينىڭمەن كوتەر! شىندىقتى جىگىتشە مويىندا!

ازار بولسا، سەناتتىڭ دەپۋتاتتىعىنان كەتەرسىڭ. وندا تۇرعان ەشتەڭە جوق. ۇلتتىڭ تاعدىرى، پرەزيدەنتتىڭ بۇگىنگى بەدەلى مەن ەرتەڭگى تاريحي ورنى ءۇشىن ءبىر دەپۋتاتتىڭ سەناتتان كەتكەنى – تۇككە تۇرعىسىز دۇنيە!

سەناتورلىقتان كەتسەم، كومۋسىز, مولاسىز قالام با دەپ قورىقپا!

قايتا، جىرتىق ابىرويىڭ ارتادى، ءابىش اعامىزدىڭ ارۋاعىن ريزا ەتەسىڭ، ادايلاردىڭ الدىندا بەتىڭ جارىق، ەڭسەڭ بيىك بولادى...

ەڭ باستىسى، بۇكىل قازاقتىڭ رۋحىن اسقاقتاتىپ تۇرعان ماڭعىستاۋلىقتاردىڭ ابىرويىنا داق تۇسىرمەشى، اينالايىن اعاتاي!

اۋىت مۇقيبەك

رەداكتسيادان: Abai.kz ەركىن اقپارات الاڭى. مۇندا وي جارىستىرىپ، پىكىر تالاستىرۋعا قازاقستاننىڭ ءاربىر ازاماتى قۇقىلى. ماقالا اۆتورىنىڭ پىكىرى رەداكتسيا ۇستانىمىن بىلدىرمەيدى جانە ماقالادا اتى اتالعان جەكەلەگەن تۇلعالار جاۋاپ بەرەمىن دەسە، پورتال بەتىندە جاريالايتىن بولامىز!

Abai.kz