پارلامەنت دەپۋتاتتارى مۇددەلى مەملەكەتتىك ورگاندارعا بىرىڭعاي ۋاقىت بەلدەۋى ماسەلەسىنە قاتىستى عىلىمي-زەرتتەۋ جۇمىسىن الداعى جىلدىڭ ناۋرىز ايىنا دەيىن اياقتاۋدى تاپسىردى. بۇل تۋرالى ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ ۇكىمەت مۇشەلەرىنىڭ قاتىسۋىمەن وتكەن فراكتسيانىڭ كەڭەيتىلگەن جيىنىندا ايتتى.

سۋرەتتى تۇسىرگەن: ءالي عالىم

بەلسەندى پىكىر الماسۋ بارىسىندا ءماجىلىس دەپۋتاتتارى ۇكىمەت مۇشەلەرىنە بىرىڭعاي ۋاقىت بەلدەۋىن ەنگىزۋگە قاتىستى ازاماتتاردى تولعاندىرعان وزەكتى ساۋالداردى جەتكىزدى. اتاپ ايتقاندا، ماجىلىسمەن ج. ءاشىمجانوۆ الماتى وبلىسىنىڭ، جەتىسۋ وبلىسىنىڭ جانە وزگە دە وڭىرلەردىڭ تۇرعىندارىنان دەپۋتاتتىق كورپۋس اتىنا كەلىپ تۇسكەن كوپ وتىنىشكە نازار اۋداردى. دەپۋتات ە. سايروۆ ۇيلەسىمدى قوعام قۇرۋ ءۇشىن پارلامەنت پەن ۇكىمەتتىڭ وسى ماسەلە بويىنشا ءبىرتۇتاس ۇستانىمى بولۋعا ءتيىس ەكەنىن مالىمدەدى. دەپۋتات يۋ. كۋچينسكايا مۇنداي ماسەلە ۇكىمەت قاۋلىسى دەڭگەيىندە شەشىلمەي، زاڭ دەڭگەيىندە رەتتەلۋى كەرەك دەگەن پىكىر ءبىلدىردى.

دەپۋتاتتار ر. زايتوۆ, ۇ. تۋماشينوۆ، ن.سابيليانوۆ، ە. جاڭبىرشين، ب. ناجىمەتدينۇلى، ن. دەمەنتەۆا، د. مۇقاەۆ جانە تاعى دا باسقالار ءوز وي-پىكىرلەرى مەن ۇسىنىستارىن ءبىلدىردى. سونداي-اق، ساۋدا جانە ينتەگراتسيا ءمينيسترى ارمان شاققاليەۆ, عىلىم جانە جوعارى ءبىلىم ءمينيسترى ساياسات نۇربەك, دەنساۋلىق ساقتاۋ ءمينيسترى اقمارال ءالنازاروۆا بايانداما جاسادى.

فراكتسيا جيىنىن قورىتىندىلاي كەلە ءماجىلىس سپيكەرى ۋاقىت بەلدەۋىن وزگەرتۋ – قوعامدا ەڭ كوپ تالقىلاناتىن تاقىرىپتىڭ ءبىرى ەكەنىن اتاپ ءوتتى. ول مۇنداي شەشىمدەردى الدىن-الا ەگجەي-تەگجەيلى تالداۋ جانە كەڭىنەن تالقىلاۋ ارقىلى قابىلداۋ كەرەك ەكەنىن جەتكىزدى. بۇل قادام قوعامعا ءتيىمدى ءتۇسىندىرۋ جۇمىسىن جۇرگىزۋگە مۇمكىندىك بەرەدى. وسىعان بايلانىستى، ۇكىمەت بىرىڭعاي ۋاقىت بەلدەۋىنە كوشۋدىڭ اسەرى تۋرالى كوپفاكتورلى عىلىمي-زەرتتەۋ جۇمىسىن جۇرگىزۋ جونىندە شەشىم قابىلدادى. اتالعان شەشىم بىرقاتار سۇراقتىڭ جاۋابىن بەرۋگە ءتيىس.

«ۋاقىتتىڭ وزگەرۋى، ەڭ الدىمەن، ازاماتتارىمىزدىڭ دەنساۋلىعى مەن ءال-اۋقاتىنا، تۇرمىسىنا قالاي اسەر ەتەتىنىنە قاتىستى ناقتى جاۋاپ الۋىمىز كەرەك. وسى ماسەلەگە باس ءمان بەرۋ قاجەت. سونىمەن قاتار، ۇكىمەت ايتىپ وتىرعان ءۇش جىل – تىم ۇزاق مەرزىم دەپ ەسەپتەيمىن. زەرتتەۋ جۇمىسىن ءۇش ايدا اياقتاعاندارىڭىز ءجون. الداعى جىلدىڭ ناۋرىز ايىندا زەرتتەۋ قورىتىندىلارىمەن جانە ناقتى شەشۋ جولدارى بار ۇسىنىستارمەن كەلەسىزدەر دەگەن ۇمىتتەمىز»، – دەدى ەرلان قوشانوۆ ۇكىمەت مۇشەلەرىنە قاراتا ايتقانى سوزىندە.

Abai.kz