يراننىڭ يادرولىق باعدارلاماسى قازىر الەم جۇرتى ىزۋ-قىزۋ تالقىلاپ جاتقان تاقىرىپتاردىڭ بىرىنە اينالدى. باتىستاعى بەلدى باسىلىمدار – «The Telegraph» پەن «The New York Times» يراننىڭ يادرولىق قارۋى تۋرالى قاتار-قاتار ماقالالار جاريالادى. بۇگىن سولارعا شولۋ ۇسىنباقپىز.

اۋەلى «The New York Times» نە دەيدى؟

اقش-تىڭ سىرتقى بارلاۋىنان العان مالىمەتتەردى تىلگە تيەك ەتكەن «NYT» ءوز ماقالاسىندا:

«يران عالىمدارى يادرولىق قارۋ جاساۋدىڭ جىلدام ءادىسىن مەڭگەرۋدە. بۇل ءۇشىن عالىمدار مەن ينجەنەرلەردىڭ قۇپيا توبى جاساقتالعان. ولار يادرولىق وتىن قورىن ءبىر جىلدان از ۋاقىت ىشىندە قارۋعا اينالدىرۋ ءۇشىن جۇمىس ىستەپ جاتىر»، - دەپ جازدى.

باسىلىمنىڭ جازۋىنشا، ترامپتىڭ ءبىرىنشى پرەزيدەنتتىك مەرزىمىندە اقش يرانمەن «يادرولىق كەلىسىمنەن» شىققان. سودان بەرى يران ۋراندى بايىتۋ جۇمىستارىن قايتا باستاعان.

قازىر يرانعا 4-5 يادرولىق وقتۇمسىقتى جاساۋ ءۇشىن 60%-عا دەيىن بايىتىلعان ۋران جەتكىلىكتى. ال 90%-دىق بايىتۋ دەڭگەيىنە جەتۋ ءۇشىن نەبارى بىرنەشە كۇن قاجەت.

اقش مەملەكەتتىك حاتشىسى ماركو رۋبيو تەگەراننىڭ يادرولىق قارۋ جاساۋ ارەكەتىنە بايلانىستى: «اقش-تىڭ يرانعا قىسىمىن ارتتىرۋ قاجەت»، - دەپ مالىمدەدى.

ال «The Telegraph» نە دەيدى؟

ۇلىبريتانيا سىرتقى بارلاۋىنىڭ دەرەكتەرىن ءسوزمىسال ەتكەن «The Telegraph» باسىلىمى:

«يران بيلىگى الىس قاشىقتىققا سوققى جاسايتىن جانە يادرولىق وقتۇمسىقتى الىپ ۇشۋعا قابىلەتتى زىمىران جاساۋدا. زىمىران 2900 شاقىرىمدى ەڭسەرە الادى جانە ەۋروپا ەلدەرى مەن يزرايل اۋماعىنا جەتەدى»، - دەپ جازادى.

«The Telegraph» باسىلىمى البانيا مەن فرانتسيادا قىزمەت ەتەتىن يراننىڭ ۇلتتىق قارسىلاسۋ كەڭەسىنىڭ (NCRI) اقپاراتىنا سۇيەنە وتىرىپ جازدى.

اتالعان وپپوزيتسيالىق كەڭەس يران بيلىگىنە قارسى ارەكەت ەتەدى جانە ەۋروپا بارلاۋشىلارىنا يراننىڭ ەو اۋماعىنداعى تىڭشىلارى جايلى بىرنەشە مارتە ناقتى اقپارات بەرگەن. اتالعان زىمىران سولتۇستىك كورەيامەن بىرلەسە وتىرىپ جاسالۋدا. زىمىراندى جاساۋ عارىشتى يگەرۋ جوباسى رەتىندە بۇركەمەلەنگەن.

Abai.kz