الماتى قالاسىنىڭ جاستارى ۇلى جەڭىستىڭ 80 جىلدىعىنا ارنالعان الەۋمەتتىك جەلىلەردەگى پاتريوتتىق چەللەندجدەرگە قاتىستى. #باتىردىڭۇرپاعىمىن جانە #مويپرادەدگەروي حەشتەگتەرىمەن وتكەن ونلاين-اكتسيالار تاريحي جادىمىزدى ساقتاپ، ەرلىك رۋحىن دارىپتەۋگە باعىتتالدى. 

#باتىردىڭۇرپاعىمىن چەللەندجى — باتىر بابالاردىڭ ەرلىگىن ۇلىقتاۋ مەن جاستاردى ۇلتتىق قۇندىلىقتارعا تاربيەلەۋ ماقساتىندا ۇيىمداستىرىلدى. جاستار Instagram جانە TikTok جەلىلەرىندە بەينەجازبالار، ولەڭدەر مەن ەستەلىكتەرمەن ءبولىسىپ، جەڭىستىڭ ءمانىن جەتكىزدى.  

الماتىلىق بلوگەر اننا توروسياننىڭ اتاسىنا ارناعان العىس حاتى الەۋمەتتىك جەلىدە ەرەكشە اسەر قالدىردى. ول ءوز جازباسىن حات تۇرىندە جاريالاعان: 

«قىمباتتى اتا، مەن ومىرگە كەلمەي تۇرىپ سەن بۇل دۇنيەدەن ءوتىپ كەتىپسىڭ. بىراق مەن سەنى سارعايعان سۋرەتتەر مەن اجەمنىڭ اڭگىمەلەرىنەن بىلەمىن. سەن سوعىستى تۇگەل ارتيللەريست بولىپ وتكەرىپ، وردەن تاعىپ، كوزىندەگى ۇنسىزدىكپەن ۇيگە ورالدىڭ. سەن شايقاستار جايلى سيرەك، كوبىنە جوعالعان دوستارىڭ مەن ءبىز كۇتكەن بەيبىتشىلىك تۋرالى ايتاتىنسىڭ. بۇگىندە مەن ءومىر ءسۇرىپ، وقىپ، ارمانداي الامىن – سەبەبى سەن مويىمادىڭ. راقمەت ساعان، اتا.»

#مويپرادەدگەروي اكتسياسى اياسىندا قاتىسۋشىلار ءوز اتالارى تۋرالى اڭگىمەلەپ، فوتوسۋرەتتەر مەن ارحيۆتىك دەرەكتەردى جاريالادى. بۇل حيكايالار ۇلى وتان سوعىسىنا قاتىسقان جانداردىڭ ءومىر جولىن جاس ۇرپاققا جەتكىزۋدىڭ اسەرلى فورماتىنا اينالدى. 

سونداي-اق، ءوزىنىڭ وتباسى جايلى جۇرەك تەبىرەنتەرلىك ەستەلىگىمەن ديانا نامولينوۆسكايا ەسىمدى قولدانۋشى دا ءبولىستى. ول ءوزىنىڭ جازباسىن ارداگەر اتاسى گاۆريلگە ارنادى: 

«قىمباتتى اتا گاۆريل، سەنىمەن تىلدەسىپ ۇلگەرمەگەنىمە قاتتى وكىنەمىن. بىراق سەنىڭ ەسىمىڭ ءبىزدىڭ وتباسىمىزدا قاسيەتتى اماناتتاي ساقتالادى. سەن مايدانعا وتە جاس كۇيىڭدە اتتانىپ، امان ورالاتىنىڭدى دا بىلمەدىڭ. جاۋىنگەرلىك جورىقتاردان ءوتتىڭ، سۋىق پەن ۇرەيگە، جوعالتۋلاردىڭ ازابىنا ءتوزدىڭ. بىراق سونىڭ بارىنەن سوڭ قايتا تۇرىپ، العا باسا بەردىڭ. ساعان قاتىستى ايتىلعان ەستەلىكتەردە سەن تەك سولدات ەمەس، كەڭ پەيىلدى ادام بولعانىڭ ايتىلادى – سوڭعى نانىندى بولىسكەن، حات جازا الماعان جولداستارىڭنىڭ ورنىنا ۇيگە حات جازىپ بەرگەن، ۇنەمى ۇيگە ورالۋدى ارمانداعان ەكەنسىڭ. سەن ورالدىڭ. ءۇي تۇرعىزدىڭ. بالالارىڭدى ءوسىردىڭ. ەندى سەنىڭ نەمەرە، شوبەرەلەرىڭ – ءبارى سەنىڭ كىم بولعانىڭدى بىلەدى. جىل سايىن جەڭىس كۇنى مەن ىشتەي ساعان العىس ايتامىن. ءومىر ءۇشىن، توزىمدىلىك ءۇشىن، جەڭىس ءۇشىن راقمەت، اتا!»

چەللەندجدەرگە تانىمال بلوگەرلەر مەن قوعامدىق پىكىر كوشباسشىلارىنىڭ قاتىسۋى — جاستار اراسىنداعى قىزىعۋشىلىقتى ارتتىرىپ، اكتسيانىڭ كەڭ اۋقىمدا تارالۋىنا ىقپال ەتتى. 

جالپى ەكى چەللەندجدىڭ الەۋمەتتىك جەلىدەگى قامتۋ كورسەتكىشى 20 000-نان استى. 100-دەن استام جاستار ءوز جازبالارىن جاريالاپ، ونىڭ ىشىندە جاستار ۇيىمدارىنىڭ مۇشەلەرى، كوللەدج جانە جوعارى وقۋ ورىندارىنىڭ ستۋدەنتتەرى، مەكتەپ وقۋشىلارى مەن بەلسەندىلەر بولدى. 

مۇنداي باستامالار تاريحتى ۇلىقتاپ قانا قويماي، ۇرپاقتار ساباقتاستىعىن نىعايتادى. ءاربىر جاس ءوز وتباسىنىڭ تاريحىن ماقتانىشپەن ايتىپ، «مەن — باتىردىڭ ۇرپاعىمىن» دەۋگە مۇمكىندىك الادى. 

Abai.kz