اقش پرەزيدەنتى ترامپتىڭ پارسى شىعاناعى ەلدەرىنە ساپارى ءوز مارەسىنە جەتتى.

ساۋد-ارابياسىنان كەيىن كاتارعا ات باسىن تىرەدى. ەل استاناسى دوحانىڭ باتىس وڭتۇستىگىنە ورنالاسقان اقش اسكەري بازاسىندا اسكەريلەردىڭ الدىندا ءسوز سويلەدى. ەكى تاراپتىڭ 42 ميلليارد دوللارلىق قارۋ-جاراق كەلىسىمىنە قول قويعانىن اتاپ ءوتتى. كاتار بيلىگى اقش اسكەري بازاسىن جاڭالاۋعا 10 ميلليارد دوللار بولگەنى دە ايتىلدى.

ترامپ ساۋد-ارابياسىندا دا قۇنى 742 ميلليارد دوللارلىق كەلىسىمگە قول جەتكىزگەن ەدى.

ال ءابۋ-دابيدە الداعى 10 جىلدا ءباا اقش ەكونوميكاسىنا 1 تريلليون 400 ميلليارد دوللار قۇياتىنى ءمالىم بولدى.

وسى جولى ترامپ بيىلدان باستاپ ءباا-نە جىل سايىن جاساندى ينتەللەكتكە قاجەت ءچيپتىڭ 500 مىڭ داناسىن بەرىپ تۇرۋعا ۋادە بەردى. ساراپشىلار بۇل كەلىسىم جۇزەگە اسسا ءباا – اقش پەن قىتايدان كەيىنگى الەمنىڭ ءۇشىنشى جي ورتالىعىنا اينالادى دەپ بولجاپ وتىر. ترامپ پەن بىرگە جۇرگەن اقش ساندىق تەحنولوگيا الىپتارى ساۋد-ارابياسىمەن دە جي سالاسىن دامىتۋعا كەلىسىم جاساسقان ەدى. ايتا كەتەرلىگى بايدەن بيلىگى «قىتايعا بەرۋى مۇمكىن» دەپ ورتا شىعىس ەلدەرىنە چيپ بەرۋدى شەكتەگەن بولاتىن.

ترامپتىڭ جومارتتىعى قازىردىڭ وزىندە اقش پەن الەم ەلدەرىندە قىزۋ تالقىلانىپ جاتىر. سىني پىكىرلەردىڭ دەنى قىتاي مەن اراب ەلدەرىنىڭ ساياسي بايلانىسى وتە تىعىز بولعاندىقتان ترامپ رۇقسات ەتكەن جوعارى ساپالى چيپكەردىڭ دەنى قىتايدىڭ قولىنا ءوتىپ، كوممۋنيستىك ەلدىڭ اسكەري الەۋەتىن جاڭا دەڭگەيگە كوتەرۋى مۇمكىن دەپ قاۋىپتەنەدى.

ال سالا ماماندارى ساياساتكەرلەردەن بولەك كوزقاراستا. ولار ءباا-ءنىڭ ساندىق ورتالىعىن اقش كومپانياسى باسقاراتىنىن العا تارتادى.

كورىپ وتىرعانىمىزداي، بۇرىن ارابتىڭ باي ەلدەرىنىڭ مۇنايى قىتاي مەن اقش-تىڭ كوز قۇرتىنا اينالسا، ەندى اتالعان ايماق ەكى الپاۋىتتىڭ جي باسەكەسى الاڭىنا اينالعالى وتىر.

Abai.kz