الماتى قالاسى جاستار ساياساتى باسقارماسى مەن توتەنشە جاعدايلار دەپارتامەنتى بىرلەسىپ، قالا جاستارىنا ارنالعان سەيسميكالىق قاۋىپسىزدىك بويىنشا اقپاراتتىق شارالاردى باستالدى. بۇل باستاما ەلىمىزدەگى ەڭ سەيسميكالىق بەلسەندى ايماقتاردىڭ ءبىرى سانالاتىن الماتى قالاسىندا جاستاردىڭ قاۋىپسىزدىك مادەنيەتىن ارتتىرۋدى كوزدەيدى. 

اتالعان شارالار قالاداعى جوعارى وقۋ ورىندارىندا جۇيەلى تۇردە ءوتىپ جاتىر. وندا ستۋدەنتتەرگە جەر سىلكىنىسى، تابيعي اپاتتار مەن توتەنشە جاعدايلار كەزىندە ءوزىن-ءوزى ۇستاۋ ەرەجەلەرى، قاۋىپسىزدىك الگوريتمدەرى جان-جاقتى تۇسىندىرىلۋدە. سونىمەن قاتار، تابيعي اپات نەمەسە ادامداردىڭ قاتەلىگىنەن ورىن الاتىن ورتتەردىڭ الدىن الۋ، العاشقى مەديتسينالىق كومەك كورسەتۋ، زارداپ شەككەندەرگە پسيحولوگيالىق قولداۋ كورسەتۋ سىندى ماڭىزدى تاقىرىپتار قوزعالدى. 

بۇل شارانىڭ باستى ماڭىزدىلىعى – جاستار اراسىندا توتەنشە جاعدايلارعا دايىن بولۋ مادەنيەتىن قالىپتاستىرۋ. الماتى قالاسى – تەك ءىرى مەگاپوليس قانا ەمەس، سونىمەن قاتار سەيسميكالىق تۇرعىدان كۇردەلى ايماق. مۇنداي جاعدايدا ءاربىر ازامات، اسىرەسە جاستار، قانداي دا ءبىر توتەنشە وقيعا بولعان كەزدە ءوز ءومىرىن قورعاپ قانا قويماي، اينالاسىنداعى ادامدارعا دا كومەك كورسەتە الۋى قاجەت. بۇل تەك جەكە قاۋىپسىزدىك ەمەس، تۇتاس قوعام قاۋىپسىزدىگىنە قوسىلعان ۇلەس. وسىنداي شارالار ارقىلى جاستارعا داعدارىس جاعدايىندا شەشىم قابىلداۋ، سابىر ساقتاپ، ناقتى ارەكەت ەتۋ قابىلەتتەرىن دامىتۋعا مۇمكىندىك بەرىلەدى. 

— بۇگىنگى شارا ارقىلى مەن ءوزىم ءۇشىن كوپ جاڭا اقپارات الدىم. مەنىڭ ويىمشا، ءاربىر ازامات توتەنشە جاعداي كەزىندە "نە ىستەۋ كەرەك؟" دەگەن سۇراققا جاۋاپ بەرە الۋى كەرەك. الداعى ۋاقىتتا وسىنداي شارا وتسە، مىندەتتى تۇردە قاتىساتىن ەدىم، — دەدى شاراعا قاتىسقان ستۋدەنت ەربولات مۇسابەكوۆ.

اقپاراتتىق قاۋىپسىزدىك جۇمىستارى – الدىن الۋدىڭ ەڭ ءتيىمدى ءتاسىلى. قاۋىپ-قاتەر تۋىنداعان ساتتە عانا ەمەس، وعان دەيىن دايىن بولۋ – زاماناۋي قوعامنىڭ باستى قاعيدالارىنىڭ ءبىرى. وسى ورايدا، جاستار ساياساتى باسقارماسى مەن تجد-نىڭ بىرلەسكەن باستاماسى جاستارمەن تۇراقتى جۇمىس جۇرگىزىپ، قاۋىپسىزدىك سالاسىنداعى ساۋاتتىلىقتى ارتتىرۋدىڭ ناقتى مىسالى بولىپ وتىر. 

جوسپار بويىنشا، مۇنداي شارالار تەك جوعارى وقۋ ورىندارىمەن شەكتەلمەي، الداعى ۋاقىتتا قالامىزداعى بارلىق كوميۋنيتي ورتالىقتارىندا دا وتكىزىلەتىن بولادى. وندا جاستارمەن ينتەراكتيۆتى فورماتتا كەزدەسۋلەر ۇيىمداستىرىلىپ، سيمۋلياتسيالىق جاتتىعۋلار مەن پراكتيكالىق ساباقتار ارقىلى قاۋىپسىزدىك داعدىلارى ۇيرەتىلمەك.

Abai.kz